कार्तिक २६ । रुसका राष्ट्रपति भ्लादिमिर पुटिनले विश्व एन्टी डोपिङ एजेन्सी वाडाले रुसलाई सबै खाले एथ्लेटिक्स प्रतियोगितामा प्रतिबन्ध लगाउन सुझाव दिएपछि यसको उचित छानबिन गर्न माग गरेका छन् ।
राष्ट्रपति पुटिनले बिश्व एन्टी डोपिङ एजेन्सी वाडालाई व्यवसायिक रुपमा कामकारबाही अघि बढाउन सुझाव दिँदै उचित छानबिनकोमाग पनि गरेका हुन ।
आफ्नो देशका खेलाडीमाथि छानबिन गर्न पाउनुपर्ने भन्दै पुटिनले वाडाको निर्णय सच्याउन माग गरेका छन् ।
रुसी खेलाडीमा डोपिङको डरलाग्दो अवस्था रहेको र रुस सरकारले समेत यसलाई ढाकछोप गर्न खोजेको निष्कर्ष निकाल्दै समितिले रुसलाई एथ्लेटिक्सबाटै प्रतिबन्ध लगाउन सुझाव दिएको थियो ।
विश्व एन्टी डोपिङ एजेन्सी वाडाले दुई दिन अघी सार्वजनिक गरेको प्रतिवेदन अनुसार रुसमा डोपिङलाई सरकारले नै समर्थन गर्दै आएको छ ।
सन् २०१२ मा भएको लण्डन ओलम्पिकमा अधिकांश एथ्लेटिक्स खेलाडीले प्रतिबन्धित शक्तिवद्र्धक औषधी सेवन गरेको निष्कर्ष निकाल्दै छानविन समितिले ती खेलाडीको नमुना परीक्षणलाई प्रभावित पारिएको समेत बताएको छ ।
प्रतिवेदन अनुसार एथ्लेटिक्सका ५ खेलाडी र ५ प्रशिक्षकलाई आजिवन प्रतिबन्ध लगाउनुपर्ने देखिएको छ । तर ती खेलाडी र प्रशिक्षकको नाम भने गोप्य राखिएको छ । आगामी ओलम्पिकमा रुसलाई प्रतिबन्ध लगाई थप छानविन गर्न प्रतिवेदनले सुझाव दिएको छ ।
छानविन समितिको प्रतिवेदनले डोपिङका कतिपय घटनामा विश्व एथ्लेटिक्स महासंघ आई.ए.ए.एफ.लाई समेत दोषी देखाइएको छ ।
Post a Comment
Thanks.