बार्सिलोना शीर्ष स्थानमा

कार्तिक २३ । नेयमारको शानदार गोलसँगै भिल्लारियललाई पराजित गरेको बार्सिलोना ला लिगा फुटबलको शीर्ष स्थानमा उक्लिएको छ ।

इएल क्लासिको भिडन्त अघि रियल मड्रिडले सेभिल्लासँग ३-२ को अप्रत्यासित हार ब्यहोर्दा बार्सिलोनाले भिल्लारियललाई ३-० ले हराएको छ ।

नाउ क्याम्पमा भएको खेलमा भिल्लारियलले बार्सिलोनालाई पहिलो हाफ बराबरीमा रोकेको थियो । तर, ६० औं मिनेटमा नेयमारले गोल गर्दै घरेलु टोलीलाई अग्रता दिलाए ।

७० औं मिनेटमा पाएको पेनाल्टीमा गोल गर्दै लुइस स्वरेजले अग्रता दोब्बर पारे । ८५ औं मिनेटमा ब्राजिलियन स्टार नेयमारले शानदार गोल गरे ।

दुई डिफेण्डरको बीचमा रहेका नेयमारले सुरुमा स्वरेजले दिएको पास छातीले कन्ट्रोल गरे । भिल्लारियलका फुल ब्याक कोष्ट बलतर्फ आउँदै गरेका देखेपछि उनले कोष्टको टाउको माथिबाट बल फि्लक गरे र उत्कृष्ट भली गोल गरे ।

नेयमारको यो गोलसागै बार्सिलोना ३-० ले विजयी भएको छ र लिगको शीर्ष स्थानमा उक्लिएको छ । उसको ११ खेलबाट २७ अंक छ । दोस्रो स्थानमा झरेको रियल मड्रिडको २४ अंक छ ।