पुस १८ । भारतको सिलीगुडीमा जारी चौंथो साफ महिला च्याम्पियनसिप फुटबलको सेमिफाइनलमा आज दिउँसो नेपाल र भारत भिड्दैछन् ।
खेल नेपाली समयअनुसार दिउँसो सवा २ बजे कन्चनजंघा मैदानमा हुँदैछ । यो खेल जितेर नेपाली महिला टिमले अहिलेसम्मकै ठूलो कीर्तिमान रच्न चाहन्छ ।
नेपाल यसअघिका तीनओटै संस्करणको फाइनलमा भारतसँग पराजित हुँदै उपविजेतामा समेटिएको थियो ।
यो खेल जित्यो भने नेपालले भारतलाई हराएको कीर्तिमान राख्नेछ ।
नेपाल समूह ‘ए’को समूह विजेता बन्दै तथा भारत समूह ‘बी’को उपविजेता बन्दै सेमिफाइनलमा पुगेको हो ।
खेलअघिको ‘प्रिम्याच कन्फ्रेन्स’मा आइतबार बोल्दै नेपाली टिमका मुख्य प्रशिक्षक कुमार थापाले नेपालको यसपटकको रणनीति सफल भइरहेकाले भारतविरुद्ध पनि उत्कृष्ट प्रदर्शन गर्ने ठोकुवा गरेका छन् ।
उनले भारतीय खेलाडीहरु आक्रमणमा विश्वास गर्ने भएकाले नेपाली डिफेन्डरले बललाई रोक्न सक्नुपर्नेमा जोड दिएका छन् ।
नेपालले समूह चरणमा भुटानलाई ८–० ले, माल्दिभ्सलाई ९–० ले तथा श्रीलंकालाई १–० ले पराजित गरेको थियो ।
नेपालका लागि सावित्रा भण्डारीले प्रतियोगितामा ११ गोल गरिसकेकाले भारतविरुद्ध पनि उनैले गोल बर्साउने अपेक्षा गरिएको छ ।
यो खेलमा पराजित भए अहिलेसम्मकै सफलतामा पूर्णविराम लाग्ने भएकाले पनि भारतविरुद्धको खेल नेपालका लागि ‘गर या मर’कोरुपमा रहेको छ ।
अर्को सेमिफाइनलमा बंगलादेश र माल्दिभ्स भिड्नेछन् ।
Post a Comment
Thanks.