नेपालले आज दक्षिण अफ्रिकासँग खेल्ने

माघ २० । दृष्टिविहीन विश्वकप ट्वेन्टी–ट्वेन्टी क्रिकेटको तेस्रो खेलमा आज नेपालले दक्षिण अफ्रिकाको सामना गर्दैछ ।

प्रतियोगितामा लगातार दुई खेल हारेको नेपाल आज पहिलो जीतको खोजीमा हुनेछ । १० टोली सहभागि दृष्टिविहीन विश्वकपमा नेपाल मात्रै टेष्ट नखेल्ने राष्ट्र हो ।

प्रतियोगिताको पहिलो खेलमा अष्ट्रेलियासँग १० विकेटले हारेको नेपाल हिजो भएको दोस्रो खेलमा बंगलादेशसँग ५९ रनले पराजित भयो ।

बंगलादेशले दिएको २ सय ४ रनको लक्ष्य पछ्याएको नेपाल २० ओभरमा ८ विकेटको क्षतिमा १ सय ४४ रनमै समेटियो ।

नेपालका लागि कीर्तन श्रेष्ठ दुवालले ५५ रनको योगदान दिए । त्यसैगरी रमेशबहादुर बानियाँले १८ र सुनिल सुवेदी क्षेत्रीले १६ रन बनाउँदा अन्य कुनै पनि खेलाडीले दोहोरो रनको स्कोर बनाउन सकेनन् ।