July 2016

साउन ९ । ब्राजिलको रियो दि जेनेरियोमा हुन गइरहेको ओलम्पिक खेलकुदमा भाग लिन जाने नेपाली खेलाडीहरुलाई नेपाली सेनाले बिदाइ गरेको छ ।
नेपाली सेनाका प्रधानसेनापति राजेन्द्र क्षत्रीले शुक्रबार राजधानीमा ७ खेलाडी तथा ५ प्रशिक्षकलाई बिदाइ गरेका हुन् ।
आगामी भदौ २१ गतेदेखि हुन गइरहेको ओलम्पिक खेलकुदमा नेपालका एथ्लेटिक्स खेलाडीहरु हरिकुमार रिमाल र सरस्वती भट्टराई, पौडी खेलाडीहरु शिरिष गुरुङ र गौरिका सिंह, जुडोकी फुपु लामु खत्री, तेक्वान्दोकी निशा रावल र आर्चरीका जीतबहादुर मोक्तान सहभागी हुँदैछन् ।
गौरिका र जीतबहादुरबाहेक अरु ५ खेलाडीहरु नेपाली सेनामा आवद्ध छन् ।
यसैगरी, प्रशिक्षकतर्फ तेक्वान्दोकी संगीना वैद्य, पौडीका ईश्वर कार्की, एथ्लेटिक्सका पुष्प ओझा, जुडोकी देबु चौधरी र आर्चरीका दीपकराज गुरुङ पनि रियो ओलम्पिकका लागि ब्राजिल जाँदैछन् ।
७ खेलाडी तथा ५ प्रशिक्षकलाई प्रोत्साहनस्वरुप प्रधानसेनापति क्षत्रीले व्यक्तिगत्रुपले जनही २५ हजार रुपैयाँ प्रदान गरेका छन् ।
पौडी खेलाडी गौरिका हाल प्रशिक्षणकाक्रममा इंग्ल्यान्डमा छिन् भने अरु सबै खेलाडी तथा प्रशिक्षकहरुलाई सेनाले शुभकामनासहित बिदाइ गरेको हो ।
कार्यक्रममा नेपालका विभिन्न व्यवसायिक प्रतिष्ठानहरुबाट खेलाडीलाई खेल पोशाक तथा सामग्री प्रदान गरिएको थियो ।
नेपाली सेनाले आयोजना गरेको कार्यक्रमलाई व्यवसायिक प्रतिष्ठानहरु गोल्छा अर्गनाइजेसन, ज्योती समूह, वैद्य समूह, बास्किन रबिन्स आइसक्रिम र म नेपाली मेरो नेपाल अभियानले सहयोग गरेका थिए ।

साउन ९  । इंग्ल्याण्ड भ्रमणमा शतप्रतिशत विजयी नतिजा निकाल्दै नेपाली राष्ट्रिय क्रिकेट टोली स्वदेश फर्किएको छ ।
आगामी साउन २९ र ३१ गते विश्व क्रिकेट लिग च्याम्पियनसिपअन्तर्गत् नेदरल्यान्ड्सविरुद्ध हुने खेलको तयारीका लागि इंग्ल्यान्ड गएको नेपाली टोली शुक्रबार अपराह्न स्वदेश फर्किएको हो ।
नेपाली टोलीले लन्डनस्थित क्रिकेट सुरुआत भएको लर्ड्स मैदानमा विश्वकै पुरानो मेरिलेबोन क्रिकेट क्लबविरुद्ध ऐतिहासिक खेल खेल्दै ४१ रनको विजयी नतिजा निकालेको थियो ।
भ्रमणकाक्रममा स्थानीय टोलीहरुसँग त्यसअघि खेलेका चार खेलमा पनि नेपालकै जित भएको थियो ।
पारस खड्काको कप्तानीमा इंग्ल्यान्ड गएको टोलीले सम्पूर्ण मैत्रीपूर्ण खेल जितेसँगै नेदरल्यान्ड्सविरुद्ध उच्च प्रदर्शन गर्ने बिश्वास लिइएको छ ।
भ्रमणकाक्रममा नेपाली बलरहरुले कसिलो बलिङलाई निरन्तरता दिँदा ब्याट्सम्यानहरुले पनि प्रदर्शनमा सुधारको संकेत गरेका छन् ।
यद्यपि, सुरुआतीक्रमका ब्याट्सम्यानहरुले जस्तो प्रदर्शन मध्यक्रमका ब्याट्सम्यानहरुले गर्न नसक्नु प्रशिक्षक जगत टमाटाका लागि चुनौतीको विषय बनेको छ ।
विशेषगरी सुवाश खकुरेल, विनोद भण्डारीलगायतको आत्मविश्वास अझै फर्कन नसकेको देखिएको छ ।
शरद भेषावकर, पारस खड्का ज्ञानेन्द्र मल्लको राम्रो प्रदर्शन, सागर पुन, बसन्त रेग्मी, सोमपाल कामीलगायतको ‘अलराउन्ड’ प्रदर्शन र राजु रिजाल, सन्दीप लामिछानेलगायतका नयाँ खेलाडीहरुको उच्चप्रदर्शनले नेपाली टोली हौसिएको छ ।
इंग्ल्यान्ड भ्रमणमा गरेको प्रदर्शनका आधारमा अन्तिम टोलीको टुंगो लगाउँदै नेपाली टोली विश्व क्रिकेट लिग च्याम्पियनसिपअन्तर्गत् चौंथो चरणको खेल खेल्न नेदरल्यान्ड्स जानेछ ।

असार २७। आज बिहान सम्पन्न युरो कपको अन्तिम खेलमा पोर्चुगलले फ्रन्सलाई १-० ले पराजित गरेको छ र पहिलो अन्तराष्ट्रिय उपाधि जितेको छ ।
पोर्चुगल दुई पटक विश्वकपको सेमिफाइनलमा पुगेको थियो भने युरो २००४ को फाइनलमा हारेको थियो । तर, अब १३ औं अन्तराष्ट्रिय प्रतियोगितामा पोर्चुगल सफल भएको छ ।
मेस्सीको अर्जेन्टिना, जसको फुटबल इतिहास गर्बिलो छ । दुई पटक विश्वकप र १४ पटक कोपा अमेरिकाको उपाधि जितेको छ । तर, १९९३ देखि उपाधिविहीन छ र मेस्सी र उनको टिम पछिल्लो पाँच मध्ये चार पटक कोपा अमेरिकाको उपविजेतामा सिमित रहृयो भने २०१४ को विश्वकपको फाइनलमा पनि पराजित भयो ।
पछिल्लो कोपा अमेरिकाको फाइनलमा व्यहोरेको हारपछि मेस्सीले अन्तराष्ट्रिय फुटबलबाट सन्यासको घोषणा गरिसककेका छन् । र, अन्तराष्ट्रिय फुटबलको उपाधि जित्ने अबसर गुमाएका छन् ।
सात महत्वपूर्ण प्रतियोगिता खेलेको रोनाल्डो भने अहिले आएर सफल भएका छन् र, पोर्चुगललाई पहिलो उपाधि दिलाएका छन् ।
भलै चोटका कारण रोनाल्डोले २५ औं मिनेटमा मैदान छाडे, यहाासम्मको यात्रामा उनको कप्तानी र प्रेरणादायी भूमिका रहेको छ ।

असार 25 l सानिमा बैंक लिमिटेडले नेपाली राष्ट्रिय क्रिकेट टोलीका युवा खेलाडी सन्दिप लामिछानेलाई दुई वर्षका लागि प्रायोजन गर्ने सम्झौता गरेको छ ।
संस्थागत सामाजिक उत्तरदायित्वको अन्तर्गत सानिमा बैंकले लामिछानेलाई मासिक रुपमा प्रायोजित रकम प्रदान गरी खेल जीवनमा अभ्यस्त रहन प्रेरित गर्ने भएको छ ।
एक समारोहमा बैंकका प्रमुख कार्यकारी अधिकृत भुवन दाहाल र क्रिकेटर लामिछानेबीच सम्झौतापत्रमा हस्ताक्षर भयो । लामिछानेले लेग ब्रेक बलिङ स्टाइलमा उत्कृष्ट प्रदर्शन गर्दै आएका छन् ।
उनीले बंगलादेशमा सम्पन्न आईसीसी अण्डर १९ विश्वकपमा उत्कृष्ट प्रदर्शन गर्दै ‘वल्र्ड ड्रिम टिम’ मा स्थान बनाएका थिए । प्रमुख कार्यकारी दाहालले सम्पूर्ण लामिछानेलाई प्रयोजन गर्न पाएकोमा खुसी व्यक्त गरे ।

असार २४ l एन्टोइन ग्रिजम्यान चम्किएपछि विश्वबिजेता जर्मनीलाई हराउँदै आयोजक फ्रान्स जारी युरोकप फुटबलको फाइनलमा प्रबेश गरेको छ ।
मार्सेलीमा भएको खेलमा जर्मनीलाई २-० गोलले पराजित गर्दै घरेलु टोली फ्रान्सले आइतबार पोर्चुगलसँगको उपाधि भीडण्त पक्का गरेको हो ।
फ्रान्सका लागि दुवै गोल एथ्लेटिको मडि्रडका सुपरस्टार एन्टाेइन ग्रिजम्यानले गरेका थिए ।
पहिलो हाफको अन्तिम मिनेटमा पाएको पेनाल्टी अवसरलाई ग्रिजम्यानले गोलमा परिणत गर्दै फ्रान्सलाई अग्रता दिलाएका थिए ।
जर्मन क्याप्टेन बास्टियन स्वाइन्सटाइगरले डिबक्सभित्र हृयाण्ड गरेपछि रेफ्रीले फ्रान्सलाई पेनाल्टीको अवसर दिएका थिए ।
त्यसअघि जर्मनले फ्रान्सलाई निक्कै दवावमा राखेको थियो । मुख्य खेलाडी मारियो गोमेज, सामी खेडिरा तथा स्टार डिफेण्डर म्याट हृयूमल्सबिना मैदानमा उत्रिएको जर्मनीले पहिलो हाफमा घरेलु टोलीलाई दवावमा राखेको थियो ।
पहिलो हाफमा जर्मनीका ४ प्रहार फ्रान्सेली गोलकिपर तथा क्याप्टेन हृयुगो लोरिसले बिफल पारेका थिए । दोस्रो हाफमा पनि जमर्नीका स्ट्राइकरले गोलका केहि अवसर खेर फालेका थिए । खेलमा अधिकांश समय बल आफ्नो नियन्त्रणमा लिएको जर्मनीले गोल गर्न सकेन । आजको खेलमा मारियो गोमेजको अभाव जर्मनीलाई खड्किएको थियो ।
भेलड्रोम रंगशालामा ५१ हजारभन्दा बढी घरेलु समर्थकमाझ फ्रान्सेली टोलीले जर्मनीलाई हराउँदै ब्राजिल विश्वकपको क्वाटरफाइनलमा ब्यहोरेको १-० को हारको बदलासमेत लिएको छ ।
यता फ्रान्सेली सुपरस्टार एन्टोइन ग्रिजम्यानले जारी प्रतियोगितामा आफ्नो गोलसङ्ख्या ६ पुर्‍याएका छन् । उनी प्रतियोगितामा सर्बाधिक गोलकर्ताको सूचीमा पहिलो नम्बरमा छन् । साथै उनी सन् १९८४ को युरोपछि ठूला प्रतियोगितामा धेरै गोल गर्ने पहिलो फ्रान्सेली खेलाडी पनि बनेका छन् ।
फ्रान्स र पोर्चुगलबीचको फाइनल खेल आगामी आइतबार राति पौने १ बजे फ्रान्सको राष्ट्रिय रंगशालामा हुनेछ । पोर्चुगल यसअघि वेल्सलाई हराउँदै प्रतियोगितको फाइनलमा पुुगिसकेको छ ।

असार २३ l युरोकपमा मड्रिड युद्ध सकियो र क्रिष्टियानो रोनाल्डो मड्रिडको ‘राजा’ बनेका छन् ।
हो, युरोकपको पहिलो सेमिफाइनलमा वेल्स र पोर्चुगलको खेललाई स्पेनिस जाइन्ट रियल मड्रिडका दुई स्टार खेलाडी रोनाल्डो र ग्यारेथ बेलबीचको भिडन्तका रुपमा पनि हेरिएको थियो ।
बिहीबार विहान भएको खेलमा बेलको टिमलाई २-० ले हराउादै रोनाल्डोको टिम फाइनलमा पुगेको छ । र, खेलमा पहिलो गोल रोनाल्डोले नै ५० औं मिनेटमा गरेका थिए ।
यो हारले वेलको युरोकप २०१६ को यात्रामा पूर्णविराम लागेको छ ।
र, मड्रिडको ‘राजा’ रोनाल्डो बनेका छन् ।
तर, वेल्सलाई पहिलो सहभागितामा नै अन्तिम चारसम्म पुग्याउन बेलले गरेको योगदान उल्लेखनीय छ ।

असार २३ l क्रिष्टियानो रोनाल्डो र नानीले तीन मिनेटको अन्तरमा २ गोल गरेपछि वेल्सको ऐतिहासिक यात्रामा पूर्णबिराम लगाउँदै पोर्चुगल युरोकपको फाइनलमा पुगेको छ ।
पोर्चुगल १२ बर्षको अन्तरमा दोस्रो पटक युरोको फाइनलमा पुगेको हो । सन् २००४ मा घरैमा भएको प्रतियोगिताको फाइनलमा पोर्चुगलले ग्रिससँग पराजय ब्यहोरेको थियो ।
फ्रान्सको ल्योनस्थित ओलम्पिक रंगशालामा पहिलो हाफ गोलरहित बराबरी खेलेपनि दोस्रो हाफमा पोर्चुगलले सुरुवातमै २ गोल गर्न सफल भयो ।
५०औं मिनेटमा राफायल गुएरेइरोको कर्नर प्रहारलाई सदुपयाग गर्दै सुपरस्टार क्रिष्टियानो रोनाल्डोले पेनाल्टी एरियाबाट हेडमार्फत सुरुवाती गोल गरे ।
५३औं मिनेटमा भएको दोस्रो गोलमा पनि रोनाल्डोकै योगदार रहृयो र उनैको पासमा स्टार मिडफिल्डर नानीले सहजै बललाई जाली चुमाउन सफल भए ।
प्रतियोगितामा दुई पहेँलो कार्ड पाएर पोर्चुगलबिरुद्धको खेल गुमाएका आरोन राम्सेको अनुपस्थितिमा वेल्सको मिडफिल्ड कमजोर देखिएको थियो । उनको स्थानमा खेलेका एण्डी किङ र अर्का स्टार मिडफिल्डर जोय लेड्लीले पनि कुनै जादू देखाउन सकेनन् ।
अग्रपंक्तिमा ग्यारेथ बेलले पनि गतिलो साथ पाएनन् जति राम्सेसँग बेलको हुने गर्थ्यो । बेलले खेलमा केहि शशक्त लामो प्रहार गरेपछि पोर्चुगिज गोलराकले त्यसलाई सहजै बिफल पारे ।
टोटनहृयामका डिफेण्डर बेल डेभिसपनि दुई पहेँलोको प्रतिबन्धमा परेकाले वेल्सको रक्षापंक्तिपनि केहि धर्मराएको थियो । उनको स्थानमा आएका जेम्स केलिन्सले अपेक्षाकृत प्रदर्शन गर्न सकेका थिएनन् ।
त्यसको बिपरित पोर्चुगिज टोलीको प्रदर्शन भने प्रतियोगिताका अघिल्ला खेलहरुमा भन्दा निक्कै सुधारिएको थियो । चोटग्रस्त पेपेको अनुपस्थितिमा पनि पोर्चुगलको रक्षापंक्ति कमजोर देखिएन । त्यस्तै मिडफिल्डमा रेनाटो सान्चेसको प्रभाव अघिल्ला खेलहरुमा भन्दा बढि नै देखिन्थ्यो ।
अग्रपंक्तिमा रोनाल्डोले आफ्नो गोलसङ्ख्या तीन पुर्‍याएका छन् । यसअघि समूहको अन्तिम खेलमा हंगेरीबिरुद्ध उनले २ गोल गरेका थिए । अपेक्षाकृत प्रदर्शन गर्न नसकेर आलोचना ब्यहोरेको रोनाल्डो पनि वेल्सबिरुद्ध प्रभावकारी देखिए । त्यस्तै नानीले पनि प्रतियोगितामा आफ्नो गोल सङख्या ३ पुर्‍याए । समूह चरणमा उनले २ गोल गरेका थिए ।
पोर्चुगलले आज हुने जर्मनी र आयोजक फ्रान्सबिरुद्धको बिजेतासँग उपाधिका लागि आगामी आइतबार प्रतिस्पर्धा गर्नेछ ।

असार २२ । नेपालका दुई क्रिकेट खेलाडीहरु सुशन भारी र नरेशबहादुर बुढाऐर व्यवसायिक खेल खेल्न विदेश जाने भएका छन् ।
लेफ्ट आर्म स्पिन बलर सुशन इंग्ल्यान्डको कर्नवालमा रहेको फलमाउथ क्रिकेट क्लबबाट खेल्न जाँदैछन् ।
नेपाल क्रिकेट खेलाडी संघको सहयोगमा जाँदै गरेका सुशनले सो क्लबसँग खेल्दा बस्ने, खाने र फर्कने हवाई टिकट उपलब्ध हुने संघले जनाएको छ ।
उनी असोज दोस्रो सातासम्म इंग्ल्यान्डमा बस्ने पनि संघले जनाएको छ ।
त्यस्तै, नरेश क्यानडाको टोरन्टोमा रहेको ब्लुमफिल्ड क्रिकेट एकेडेमीमा रहेर कात्तिक दोस्रो सातासम्म खेल्नेछन् ।
उनलाई त्यहाँ खान बस्न र फर्कने टिकटको व्यवस्था भएको खेलाडी संघले जनाएको छ ।
दुबै खेलाडी बुधबार त्यसतर्फ जाँदैछन् ।

असार २२।  नेपालले बंगलादेशको राष्ट्रिय टोलीसँग दुई अन्तर्राष्ट्रिय मैत्रिपूर्ण फुटबल खेल खेल्नेभएको छ ।
एन्फाले जारी गरेको बिज्ञप्तिमा आगामी असार ३१ र साउन २ गते नेपाली राष्ट्रिय टोलीले बंगलादेशसँग उसैको मैदानमा दुई मैत्रिपूर्ण खेल खेल्नेछ । तर कुन रंगशालामा खेल्ने भन्नेबारे निश्चित भइनसकेको एन्फाले जानकारी दिएको छ ।
नेपालले आगामी नोभेम्बर २ देखि १५ सम्म आयोजना हुने एएफसी सोलिडारिटी कपमा सहभागिता जनाउँदैछ । त्यसका लागि जापानी प्रशिक्षक ग्यातुकी कोजीले टोलीलाई प्रशिक्षण दिइरहेका छन् । नेपाल र बंगलादेशबीचको यो खेल त्यही प्रतियोगिताका लागि तयारीको रुपमा हेरिएको छ ।
नेपाली राष्ट्रिय टोली गत पुसमा भारतमा सम्पन्न साफ च्याम्पियनसीपपछि अन्तर्राष्ट्रिय प्रतियोगिता बिहीन छ । त्यसयता नेपालले मलेसियाको अण्डर २२ टोली तथा लाओसको राष्ट्रिय टोलीबिरुद्ध मरुैत्रिपूर्ण खेल खेलेको थियो ।

असार २०।  फ्रान्सले पाँच गोल गर्दै आइसल्याण्ड गाथाको दुःखद समापन गरेको छ र युरो २०१६ को सेमिफाइनलमा विश्व विजेता जर्मनीसँगको भेट पक्का गरेको छ ।
सोमबार विहान भएको अन्तिम क्वार्टरफाइनलमा फ्रान्सले आइसल्ल्याण्डलाई ५-२ गोल अन्तरले हरायो । अन्तिमतिर दुईसहित पहिलो हाफमा घरेलु टोलीले चार गोल गर्दा स्टेड डे फ्रान्समा धेरैले विश्वास नै गर्न सकेका थिएनन् ।
भलै युरो २०१६ को यात्राको समापन आइसल्याण्डले चाहेको जसरी भएन तर, उसले जीवनरभरका लागि अविश्मरणीय क्षणको संगालो र हजारौं समर्थक बटुलेर घर फर्किएको छ
किनकी समूह चरणमा पोर्चुगललाई बराबरीमा रोकेको आइसल्याण्डले प्रि क्वार्टरफाइनलमा उपाधि दाबेदार इंग्ल्याण्डलाई पराजित गर्दै शनसनी मच्चाएको थियो ।
तर, सोमबार विहान भएको खेलमा फ्रान्सले सुरुदेखि नै दबाव कायम राख्यो । उसले १२ औं मिनेटमा ओलिभर जिरउडको गोलबाट अग्रता लिएको थियो । त्यसको ७ मिनेटपछि नै पल पोग्बाले गोल गर्दै घरेलु टोलीको अग्रता दोब्बर पारे ।
खेलको४२ औं मिनेटमा दिमित्री पयेटले गोल गरे भने ४५ औं मिनेटमा एन्टोनिओ गि्रजम्यानले गोल गर्दै फ्रान्सलाई पहिलो हाफमा नै ४-० को अग्रता दिलाए ।
दोस्रो हाफमा आइसल्याण्डले सुधारिएको प्रदर्शन गर्‍यो । ५६ औं मिनेटमा घरेलु समर्थकलाई स्तभ्द पार्ने गरी आइसल्याण्डका बोल्बियन सिगथोर्सनले गोल गरे । आइरिस समर्थकले यो गोलको खुसी धेरैबेर मनाउन पाएनन् । पााच मिनेटपछि नै जिरउडले व्यक्तिगत दोस्रो गोल गरे र फ्रान्सले ५-१ को अग्रता लियो ।
खेलको ८४ औं मिनेटमा बिर्किर बिआर्नेसनले गोल गरेपनि आइसल्याण्डको हार टार्न सकेनन् ।
आइसल्याण्डको शाहसिक यात्रा सकियो
समूह चरणको पहिलो खेलमा १-१ को बराबरीमा रोकिएपछि पोर्चुगलका कप्तान रोनाल्डोले भनेका थिए कि आइसल्याण्ड केही गर्न गइरहेको छैन । तर, उनी गलत सावित भए ।
युरो २०१६ अघिसम्म शायदै धेरैले यो देशको नाम सुनेका थिए, जसको जनसंख्या नै ३ लाख ३० हजार छ । तर, यो प्रतियोगितामा उनीहरुले आफ्नो देशलाई विश्व फुटबलको मञ्चमा प्रस्तुत मात्र गरेनन्, धेरै गाथाहरु लेख्न बाध्य पारे ।
समूह चरणमा उसले बराबरी मात्र खेलेन, अष्ट्रियालाई हराएर समूह उपविजेता बन्यो । र, पि्र क्वार्टरफाइनलमा उपाधि दाबेदार मानिएको इंग्ल्याण्डलाई शिकार बनायो ।
फान्सविरुद्धको खेलमा पनि पहिलो हाफमा अप्रत्यासित रुपमा ४ गोल आएर पनि उसले पटक्कै हार मानेन । र, उनीहरुले दोस्रो हाफमा २-१ को नजिता निकाल्दै हार नमान्ने चरित्र र जितप्रतिको भोक कति छ भन्ने देखाएका छन् ।
आइसल्याण्डका समर्थकहरुको समर्थन पनि गज्जब रहृयो । खासगरी ताली बजाउने शैली ।
भलै युरो २०१६ को यात्राको समापन आइसल्याण्डले चाहेको जसरी भएन तर, उसले जीवनरभरका लागि अविश्मरणीय क्षणको संगालो र हजारौं समर्थक बटुलेर घर फर्किएको छ ।

असार १९।  नेपाल स्क्वास र्‍याकेट्स संघका अध्यक्ष किशोर महर्जनले आफ्नी आमाको स्मृतिमा राष्ट्रिय स्क्वास प्रतियोगिता आयोजना गर्ने घोषणा गरे ।
धनलक्ष्मी स्मृति राष्ट्रिय स्क्वास प्रतियोगिता अगष्ट १ तारिखदेखि सातदोबाटोमा हुने भएको हो । प्रतियोगितामा पुरुष/महिला सिंगल्स, यु-१७ र यु-१३ ब्वाइज सिंगल्स तथा भेट्रान्स ५० वर्षमाथि पुरुष सिंगल्स गरी ५ स्पर्धामा प्रतिस्पर्धा हुने छ ।

असार १९। अरहान्तकेशर सिंह र भावना सुनवारले ओलम्पिक डेका अवसरमा आयोजित स्क्वास प्रतियोगिताको सिंगल्स उपाधि जितेका छन् ।
सातदोबाटोस्थित स्क्वास एकेडेमीमा शनिबार भएको पुरुष फाइनलमा अरहान्तले अमृत थापा मगरलाई ११-५, ११-४ र १२-१० को सोझो सेटमा पराजित गरे । प्रज्ज्वलप्रकाश प्रधान र सुरज श्रेष्ठ तेश्रो भए ।
महिलाको उपाधि भिडन्तमा भावनाले विपना ब्लोनलाई ११-५, ११-३ र ११-५ को सीधा सेटमा हराइन् । सपना ब्लोन र डोल्मा लामा तेश्रो बने ।
नेपाल स्क्वास र्‍याकेट्स संघ तथा नेपाल ओलम्पिक कमिटीअन्तर्गतको स्पोर्ट्स फर अल कमिसनद्वारा संयुक्त आयोजित प्रतियोगितामा अमिर ब्लोनले यु-१७ ब्वाइज सिंगल्स उपाधि जिते । उनले फाइनलमा माधव बाहेटीलाई ११-५, ७-११, ११-८ र ११-४ को सेटमा पाखा लगाए ।
भेट्रान्स ५० वर्षमाथि पुरुष सिंगल्समा सुदीपबहादुर सिंह पहिलो भए । उनले फाइनलमा किशोर महर्जनलाई ११-६, ११-४ र ११-५ ले पाखा लगाए ।
असार ९ गतेदेखि सुरु प्रतियोगितामा ६२ खेलाडीले विभिन्न चार स्पर्धामा प्रतिस्पर्धा गरेका थिए ।

असार १९।  इटलीलाई पेनाल्टी सुटआउटमा ५-६ ले पराजित गर्दै जर्मनी युरोकप २०१६ को सेमिफाइनलमा प्रवेश गरेको छ । ठूला प्रतियोगिताका फाइनल चरणमा जर्मनीले इटलीलाई हराएको यो पहिलो पटक हो ।
यसअघि विश्वकप र युरोकपमा भएको आठ भेटमा इटली अपराजित रहँदै आएको थियो ।
बोर्डोमा भएको खेलको निर्धारित र अतिरिक्त समयको खेल १-१ गोलको बराबरीमा टुंगिएपछि खेलको निर्णय टाइब्रेकरबाट लिइएको थियो ।
जसमा जर्मनीका जोनस हेक्टरले विजयी गोल गरे ।
संयोग पनि कस्तो भने ठूला प्रतियोगितामा भएको नवौं भेटमा इटलीमा पहिलो पटक हराउने क्रममा नवौं पेनाल्टी गोल नै निर्णाायक बन्न पुगेको छ ।
यसअघि टाइब्रेकरमा जर्मनीका थोमस मुलर, ओजिल र स्वाइन्सगाइटर चके । तर, इटलीका पनि जाजा, पेले र बोनुचीले गोल गर्न सकेनन् र २-२ भयो । सडन डेथ लगातार तीन पेनाल्टीमा दुबै टोलीले गोल गरे । इटलीका गिआचेरिनी, पारोला र डि सिलिओले गोल गरे भने जर्मनीका हृयामल्स, किमिच र बोटेङले गोल गरे ।
तर, नवौं प्रहारमा इटलीका डर्मिअन चुके । उनको प्रहार जर्मन गोलकिपर नुयुरले रोके । लगतै जोनस हेक्टरले गोल गर्दै विश्व विजेता जर्मनीलाई युरोपियन च्याम्पियनसिपको अन्तिम चारमा पुर्‍याए ।
जर्मनी ९० मिनेटभित्रै विजयी हुने देखिएको थियो । उसले ६५ औं मिनेटमा ओजिलको गोलबाट अग्रत लिएको थियो ।
तर, ७८ औं मिनेटमा इटलीले पेनाल्टी पायो । जर्मन डिफेण्डर जेरोमी बोटेङले अनावश्यक हृयाण्ड गर्दा उसले पेनाल्टी पाएको थियो, जसमा बोनुचीले गाले गरे । यो उनको करियरमै पहिलो पेनाल्टी गोल थियो ।
निर्धारित ९० मिनेटको खेल १-१ को बराबरीमा सकियो । थपिएको ३० मिनेटको खेलमा पनि दुबै टोलीबाट गोल हुन सकेन । र, निर्णय टाइब्रेकरबाट लिइयो ।
जर्मनीले १९७६ मा चेकोस्लोभाकियासाग हारेदेखि जर्मनी अहिलेसम्म पेनाल्टीमा चुकेको छैन । अब उसले आयोजक फ्रान्स र आइसल्याण्डको विजेतासाग सेमिफाइनल खेल्नेछ ।

युरोकपको सेमिफाइनलमा पोर्चुगल र वेल्सको भेट रोनाल्डो भर्सेस बेल हुनेछ ।
शनिबार विहान लिलेमा भएको खेलमा हजार्डको कप्तानीमा रहेको बेल्जियमको सुरुवात राम्रो थियो । हजार्डसँगै केभिन डि ब्रायेन र लुकाकु सहितको बेल्जियमले १३ औं मिनेटमा नै राड्जा नारिनगोलान्डको गोलबाट अग्रता पनि लियो । तर, यसलार्इ धेरैबेर जोगाइराख्न सकेन ।
३० औं मिनेटमा वेल्सका कप्तान एश्ले विलियम्सले बराबरी गोल फर्काए । तर, खेलको टर्निङ प्वाइन्ट भने ५५ औं मिनेटमा बन्यो, जतिबेला वेल्सका हल रोब्सन कानुले गोल गरे ।
Eden-Hazard
बल पोजिसन बेल्जियमकै पक्षमा थियो र उसले अझै पनि खेलमा र्फकने प्रयास जारी राख्यो । औं मिनेटमा साम भोक्सले गोल गर्दै युरो २०१६ को अन्तिम चारमा वेल्सलाई पुर्‍याए ।
अब हजार्डको युरो १०१६ को यात्रामा पुर्णविराम लागेको छ ।र, सेमिफाइनलमा पोर्चुगल र वेल्स भिड्ने भएका छन् ।

असार १८।  बेल्जियमलाई पन्छाउँदै वेल्स युरोकप २०१६ को नकआउट चरणमा प्रवेश गरेको छ । १९५८ मा विश्श्वकपको क्वार्टरफाइनल खेलेको वेल्सका लागि कुनै पनि ठूलो प्रतियागिताको मा यो नै ठूलो उपलब्धि हो ।
शनिबार विहानै भएको खेलमा वेल्सले बेल्जियमलाई ३-१ गोल अन्तरले पराजित गरेको हो ।
लिलेमा भएको खेलमा बेल्जियमले राम्रो सुरुवात गरेको थियो । र, १३ औं मिनेटमा नै राड्जा नारिनगोलान्डको गोलबाट अग्रता लिएको थियो ।
तर, यो खेललाई निरन्तरता दिन सकेन । ३० औं मिनेटमा वेल्सका कप्तान एश्ले विलियम्सले बराबरी गोल फर्काए । उनी खेलमा ठूलो शंका थियो, किनकी उनको काँधमा चोट लागेको थियो । तर, बेल्जियमविरुद्ध उनले नै कर्नरमा आएको बलमा हेडमार्फत बराबरी गोल फर्काए ।
पहिलो हाफ १-१ को बराबरीमा सकियो । दोस्रो हाफमा वेल्स हावी भयो । ५५ औं मिनेटमा हल रोब्सन कानुले गोल गरे भने ८५ औं मिनेटमा साम भोक्सले गोल गर्दै युरो २०१६ को अन्तिम चारमा वेल्सलाई पुर्‍याए ।

असार १७ । एएमए इभेन्ट्स प्रालिको आयोजनामा राजधानीमा प्रथम नेपाल फुटसल प्रिमियर लिग प्रतियोगिता आयोजना हुने भएको छ ।

काठमाडौं, ललितपुर र भक्तपुरमा रहेका फुटसल केन्द्रहरुले सहभागिता जनाउने उक्त लिग आगामी साउन १० गतेदेखि चार महिनासम्म सन्चालन हुनेछ ।

प्रतियोगितामा फुटसल केन्द्रका टोलीलेमात्र सहभागिता जनाउन पाउने र सहभागी टोलीहरुमध्येबाट उत्कृष्ट १६ टोली छनोट गरी ‘होम एन्ड अवे’को अवधारणामा लिग खेलाउने आयोजकको भनाइ छ ।

लिगको अन्त्यमा अंक तालिकामा शीर्ष स्थान ओगट्ने टोलीले विजेताकोरुपमा १० लाख रुपैयाँ र उपविजेताले ५ लाख रुपैयाँ पुरस्कार प्राप्त गर्नेछन् ।

यस्तै, आफ्नो विधामा उत्कृष्ट हुने खेलाडीले जनही ५० हजार रुपैयाँ प्राप्त गर्नेछन् ।

प्रत्योगितामा सहभागी हुने हरेक टोलीले १ जनासम्म ‘ए’ डिभिजन खेल्ने खेलाडी सहभागी गराउन पाउनेछन् ।

कार्यक्रमका संयोजक विवेक गौतमले फुटसल प्रिमियर लिग निकै महत्वकांक्षी योजना भएपनि आफूहरुले सम्पूर्ण तयारी गरेका कारण प्रतियोगिता सफल हुने दाबी गरेका छन् । 

असार १७।  स्पेनिस क्लव बार्सिलोनाका सुपरस्टार नेइमार र बार्यन म्यूनिखका डग्लास कोष्टा आसन्न रियो ओलम्पिकका लागि बढि उमेरको खेलाडीको रुपमा ब्राजिलियन टोलीमा छनौट भएका छन् ।
२३ बर्षमुनिको ओलम्पिक टोलीमा तीन खेलाडी बढि उमेरको राख्न पाउने नियम अनुसार ब्राजिलले घोषणा गरेको टोलीमा अर्का खेलाडी पाल्मेइरासका गोलरक्षक फर्नाण्डो प्रासपनि परेका छन् ।
ब्रजिलियन फुटबलको महारथी टोली सान्तोसका युवा स्ट्राइकर ग्याब्रियल बार्बोसापनि टोलीमा समाबेश गरिएका छन् । बार्बोसाले गत महिना ब्राजिलको राष्ट्रिय टोलीबाट डेब्यू गर्दै गोलसमेत गरेका थिए ।
ब्राजिलको उमेरसमूहको टोलीका प्रशिक्षक रोगेरियो मिकेलले टोलीको प्रशिक्षण गर्नेछन् । कोपा अमेरिकाको समूह चरणबाटै बाहिरिएपछि नियमित प्रशिक्षक डुंगा बर्खास्तीमा परेका थिए ।
बुधबार घोषणा गरिएको ब्राजिली ओलम्पिक टोली यस्तो छ ।
गोलकिपरः फर्नाण्डो प्रास र विल्सन
डिफेण्डरः मार्क्विन्होस, लुवान, रोड्रिगो काइयो, जेका, विलियम र डग्लास सान्तोष
मिडफिल्डरः थियागो माइया, रोड्रिगो डोउराडो, फ्रेड, राफिन्हा र फिलिप एण्डरसन
स्ट्राइकरः नेइमार, डग्लास कोष्टा, ग्याब्रियल जेसस, ग्याब्रियल बार्बोसा र लुआन

 असार १७।  पोल्याण्डलाई टाइब्रेकरमा ५-३ ले पराजित गर्दै पोर्चुगल युरोकप २०१६ को सेमिफाइनलमा प्रवेश गरेको छ । पोर्चुगल सेमिफाइनलमा पुगेको यो चौथो पटक हो ।
निर्धारित समय र अतिरिक्त समयको खेल १-१ को बराबरीमा सकिएपछि खेलको निर्णय टाइब्रेकरबाट लिइएको थियो ।
पोर्चुगलका गोलरक्षकले रुई प्याट्रिसियाले पोल्याण्डका ज्याकुब ब्लासचोकोब्स्कीको पेनाल्टी रोके भने रिकार्डो करिज्माले विजयी पेनाल्टी गोल गरे ।
यसअघि निर्धारत समयको खेलमा पोल्याण्डले दोस्रो मिनेटमा नै रोबर्ट लेभान्डोस्कीको गोलबाट अग्रता लिएको थियो । तर, ३३ औं मिनेटमा रेनाटो सान्चेसले बराबरी गोल गरे ।
सेमिफाइनलमा पुग्ने क्रममा पोर्चुगलले एउटा खेल पनि निर्धारित समयमा जितेको छैन । समूह चरणको तीन वटै खेलमा बराबरी खेलेको पोर्चुगल तेस्रो स्थानमा रहेको उत्कृष्ट चारमा पर्दै नकआउट चरणमा पुगेको थियो । प्रिक्वार्टरफाइनलमा उसले क्रोएसियालाई अतिरिक्त समयमा गोल गर्दै हरनएको थियो ।
इुरोपियन च्याम्पियनसिपमा अहिलेसम्म कुनै पनि टोली यसरी ९० मिनेटको खेलमा नजिति यतिलामो यात्रा गरेको थिएन । अझ रोचक त के भने पोर्चुगलले यो सिंगो प्रतियोगितामा १९ मिनेट मात्र खेलमा अग्रता लिएको छ ।
अब फाइनल प्रवेशका लागि पोर्चुगलले बेल्वियम र वेल्सको खेलको विजेतासँग खेल्नु पर्नेछ ।

ARENA NEWS

{picture#https://1.bp.blogspot.com/-TSSsOHmNA9g/Xrc8t2Oo7HI/AAAAAAAAChU/cyhWCseUQbI5bY_90tYKATlVBOVhKdofwCK4BGAYYCw/s1600/arena%2BNEWS%2Blogo%2B%25281%2529%2Bcopy.pngL} NEWS AND SPORTS {facebook#https://www.facebook.com/arena.np/} {twitter#https://twitter.com/arenanepal} {google#www.google.com/kpcat} {pinterest#https://www.pinterest.com/} {youtube#https://www.youtube.com/channel/UC_ISHKB5xxLJnGLep4Y3JEw} {instagram#www.instagram.com/}

Contact Form

Name

Email *

Message *

Powered by Blogger.