March 2016

चैत १८ । राजधानीमा जारी प्रथम दक्षिण एसियाली महिला बास्केटबल च्याम्पियनसिपमा नेपालले लगातार दोस्रो जित हासिल गरेको छ ।

पहिलो दिन बंगलादेशलाई ९२–२६ ले हराएको नेपालले ‘राउन्ड रोविन लिग’को दोस्रो खेलमा बुधबार माल्दिभ्सलाई ७७–३६ ले हरायो ।
नेपालको जितमा स्नेहा श्रेष्ठले २४ स्कोर गरिन् । स्नेहालेबंगलादेशविरुद्धको खेलमा २६ स्कोर गरेकी थिइन् ।
चौथो क्वार्टरमा १२–१७ ले पछि परेको नेपाल त्यसअघिका क्वार्टरमा भने निकै अगाडि थियो ।
नेपालले पहिलोमा २२–०, दोस्रोमा १९–१३ तथा तेस्रोमा २४–६ को अग्रता हासिल गरेको थियो ।
प्रतियोगितामा श्रीलंकाले पनि लगातार दोस्रो जित हासिल गरेको छ ।
पहिलो दिन माल्दिभ्सलाई हराएको श्रीलंकाले दोस्रो बुधबार दिन भुटानलाई ११२–३१ ले पराजित गर्‍यो ।
प्रतियोगिताअन्तर्गत् बिहीबार बंगलादेश र माल्दिभ्स तथा भुटान र नेपालबीचको खेल हुनेछ । 

चैत १८ । न्युजिल्याण्डलाई हराउँदै इङ्ल्यान्ड विश्वकप ट्वेन्टी–ट्वेन्टी क्रिकेट प्रतियोगिताको फाईनलमा प्रवेश गरेको छ ।
भारतको दिल्लीमा बुधबार राति सम्पन्न खेलमा इङ्ल्यान्ड ७ विकेटले विजयी भएको हो । पहिले ब्याटिङ गरेको न्युजिल्याण्डले निर्धारित २० ओभरमा ८ विकेट गुमाएर १५३ रन बनायो । न्युजिल्याण्डकालागि कोलिन मुनरोले ४६ रन तथा केन विलियम्सनले ३२ रन जोडे ।
जवाफमा १५४ रनको लक्ष्य इङ्ल्यान्डले १८ औं ओभरमा ३ विकेट गुमाएर पुरा गर्‍यो । इङ्ल्यान्डका लागि सुरुवाती व्याट्सम्यान जेसन रोयले ७८ रन जोडे ।
५० बल सामना गरेका रोयले ११ चौका र २ छक्का प्रहार गरे । जितसँगै इङ्ल्यान्डले विश्वकप ट्वेन्टी ट्वेन्टी क्रिकेटको फाइनलमा प्रवेश गर्दै दोस्रो पटक उपाधि जित्ने सम्भावना बलियो पारेको छ भने पराजित टोली न्युजिल्याण्डको पहिलो उपाधि जित्ने सम्भावना टुंगियो ।
विश्वकप क्रिकेटको दोस्रो सेमिफाईनलमा आज भारतले वेष्ट इन्डिजको सामना गर्नेछ । भारतको मुम्बईमा हुने खेल नेपाली समय अनुसार बेलुकी सवा ७ बजे सुरु हुनेछ । आजको खेलमा भारतका लागि विराट कोहली तथा वेष्ट इन्डिजका क्रिश गेललाई हेर्न लायक खेलाडीको रुपमा लिइएको छ ।
दुबै टोलीले यसअघि विश्वकप ट्वेन्टी ट्वेन्टी क्रिकेटको उपाधि जितिसकेका छन् ।


चैत १७ । भारतमा जारी विश्वकप ट्वेन्टी ट्वेन्टी क्रिकेट प्रतियोगिताका सेमिफाईनल खेलहरु आजबाट हुँदैछन् ।
प्रतियोगिताको पहिलो सेमिफाइनल खेलमा आज न्यूजिल्याण्ड र इङ्ल्याण्ड भिड्ने छन् । खेल दिल्लीको फिरोज शाह कोटला मैदानमा हुनेछ ।
सुपर टेन चरणमा अपराजित एकमात्र टोली न्यूजिल्याण्डसमूह विजेता हो भने इङ्ल्याण्ड अर्को समूहको उपविजेता हो ।
प्रतियोगिताको दोस्रो सेमिफाइनल खेलमा भोलि मुम्बईमा आयोजक भारतसँग वेष्ट इन्डिज भिड्ने छ । वेष्ट इन्डिज आफ्नो समुहको विजेता हो भने भारत उपविजेता बन्दै अन्तिम चारमा प्रवेश गरेको हो ।
यसपटकको विश्वकप टि ट्वेन्टी क्रिकेटमा साविक विजेता श्रीलंकासहित दावेदार टोलीहरु अष्ट्रेलिया र दक्षिण अफ्रिका सुपर टेन चरणबाटै घर फर्किएका छन् ।

चैत १७ । पहिलो दक्षिण एसियाली महिला बास्केटबल प्रतियोगिता मंगलबारदेखि काठमाडौंमा सुरु भएको छ ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा जारी प्रतियोगितामा नेपालले विजयी सुरुआत गरेको छ ।

नेपालले मंगलबार बंगलादेशलाई ९२–२६ को फराकिलो अन्तरले पराजित गरेको हो । नेपालका लागि स्नेहा श्रेष्ठ एक्लैले२५ स्कोर गरिन् ।

प्रतियोगिताअन्तर्गत् पहिलो दिनको पहिलो खेलमा श्रीलंकाले माल्दिभ्सलाई १०६–३७ को फराकिलो अन्तरले पराजित गर्‍यो ।

नेपाल बास्केटबल संघको आयोजनामा जारी पाँचदिने प्रतियोगितामा दक्षिण एसियाका पाँच राष्ट्रको सहभागिता छ ।

दोस्रो दिन दिउँसो २ बजे भुटानले श्रीलंकासँग तथा अपराह्न साढे ४ बजे नेपालले माल्दिभ्ससँग खेल्ने कार्यक्रम छ । 

चैत १७ । अन्तराष्ट्रिय मैत्रिपूर्ण फुटबलअन्तर्गत मंगलबार राति भएको खेलमा नेदरल्याण्ड्सले इङ्ल्यान्डलाई २–१ ले हराएको छ ।
इङ्ल्यान्डकै ऐतिहाँसिक वेम्बले रंगशालामा भएको खेलमा घरेलु टोलीका जेमी भार्डीले पहिलो गोल गरे । तर दोस्रो हाफमा पाहुना टोलीका भिन्सेन्ट यान्सेन र लुसियानो नरसिंहले एक–एक गोलगर्दै नेदरल्याण्ड्सलाई विजयी गराए ।
अघिल्लो हप्ता जर्मनीलाई हराउँदै हौसिएको इङ्ल्यान्ड मंगलबार रातिको हारपछि भने निराश भएको छ । उता जर्मनीले मंगलबार राति भएको अर्को मैत्रिपुर्ण खेलमा ईटालीलाई ४–१ को फराकिलो अन्तरमा हराएको छ ।
जर्मनीमै भएको खेलमा घरेलु टोलीका लागि टोनी क्रुश, मारियो गोत्जे, योनास हेक्टर र मेसुत ओजीलले एक–एक गोल गरे । ईटालीका अल शरावीले एक गोल फर्काए ।
अन्तराष्ट्रिय मैत्रिपुर्ण फुटबल अन्तर्गत मंगलबार राति भएका अन्य खेलमा फ्रान्सले रुसलाई ४–२ ले, पोर्चुगलले बेल्जियमलाई २–१ ले, स्कटल्याण्डले डेनमार्कलाई १–० ले तथा आईसल्याण्डले ग्रिसलाई ३–२ ले हराएका छन् ।

चैत १५ 
 । नेपाली राष्ट्रिय फुटबल टोलीले मैत्रिपूर्ण खेलमा मलेसियाको २२ बर्ष मुनिको टोलीसँग बराबरीमै चित्त बुझाएको छ । मलेसियाको क्वालालम्पुरमा भएको खेल १-१ गोलको बराबरीमै सकिएको हो ।
खेलको ३७ औं मिनेटमा गोल गर्दै भरत खवासले नेपाललाई प्रारम्भिक अग्रता दिलाए पनि ८७ औं मिनेटमा कमजोर डिफेन्सको फाइदा उठाउँदैमलेसियाले गोल गरेको थियो ।
यो बराबरीले भने नेपालले अझै टिममा सुधार गर्नुपर्ने स्पष्ट भएको छ । यो खेललाई केही समयअघि नेपाली टोलीको जिम्मेवारी सम्हालेका जापानी प्रशिक्षक ग्योतोकु कोजीको परीक्षाको रुपमा लिइएको थियो । तर नेपाली टिमले भने यसअघिका खेलमा गर्दै आएको गल्तीलाई दोहोर्‍याएको छ ।
कोजीले यो खेल आफ्ना लागि नेपाली खेलाडी चिन्ने अवसर भएको बताउँदै टोलीमा अधिकांश युवा खेलाडी भएकाले उनीहरुमा सिक्ने, जित्ने र राम्रो फुटबल खेल्ने चाहना र क्षमता भएको बताएका छन् ।
बिराज महर्जनको कप्तानीमा मैदानमा उत्रिएको नेपाली टोलीमा बिमल घर्तिमगर, अञ्जन बिष्ट, अनन्त तामाङ, रोहित चन्दलगायतका केही प्रमुख खेलाडी भने उपस्थित थिएनन् ।

चैत १५ । अष्ट्रेलियालाई हराउँदै आयोजक भारत विश्वकप ट्वेन्टी ट्वेन्टी क्रिकेट प्रतियोगिताको सेमिफाइनलमा प्रवेश गरेको छ ।
मोहालीमा गएराति भएको खेलमा भारतले अष्ट्रेलियालाई ६ विकेटले हराएको हो । भारतको जितमा विराट कोहलीको अविजित ८२ रन महत्वपूर्ण रह्यो । १६१ रनको चुनौती पछ्याउने क्रममा भारतका लागि युवराज सिंहले२१ रन बनाए । अरु ब्याट्सम्यान भने क्रिजमा टिक्न सकेनन् ।
यसअघि पहिले ब्याटिङ गरेको अष्ट्रेलियाले निर्धारित २० ओभरमा ६ विकेट गुमाउँदै १६० रन जोड्यो । पाहुना टोलीका लागि आरोन फिन्चले सर्वाधिक ४३ रन बनाए ।
जितसँगै सेमिफाईनलमा पुगेको भारतले अब अन्तिम चारको भिडन्तमा वेष्ट इन्डिजको सामना गर्नेछ । प्रतियोगिताको अर्को सेमिफाईनल खेलमा न्यूजिल्याण्ड र इंग्ल्याण्ड भिड्नेछन् ।

चैत ९  । अखिल नेपाल फुटबल संघ (एन्फा)ले यही चैत १४ गते आइतबार मलेसियाको २२ वर्षमुनिको टिमसँग हुने मैत्रीपूर्ण खेलका लागि राष्ट्रिय फुटबल टोलीको घोषणा गरेको छ ।

नेपाली टोलीका मुख्य प्रशिक्षक ग्योउतोकु कोजीले सोमबार २३ सदस्यीय टोलीको घोषणा गरेका हुन् ।

भारतमा सम्पन्न १२औं दक्षिण एसियाली खेलकुद (साग)मा स्वर्णपदक जितेकाखेलाडीको बाहुल्यता भएको टोलीमा गोलकिपरमा विकेश कुथू, विशाल श्रेष्ठ र किरणकुमार लिम्बु छन् ।

डिफेन्डरमा विजय धिमाल, विराज महर्जन, देवेन्द्र तामाङ, दिनेश राजवंशी, जितेन्द्र कार्की, कमल श्रेष्ठ, मनबहादुर तामाङ, रविन श्रेष्ठ र रन्जित धिमाल छन् ।

त्यस्तै, मिडफिल्डरमा विशाल राई, हेमन गुरुङ, जगजित श्रेष्ठ, प्रकाश बुढाथोकी, सुजल श्रेष्ठ र सुनिल बल समावेश छन् ।

भरत खवास, विश्वास श्रेष्ठ, नवगुग श्रेष्ठ, रन्जन विष्ट र सुमन लामाले फरवार्ड लाइन सम्हाल्ने छन् ।

गत महिनामात्र नेपाली टोलीको जिम्मेवारी पाएका जापानी पूर्वराष्ट्रिय खेलाडीसमेत रहेका प्रशिक्षक कोजीले नेपालको फुटबल विकासका लागि सक्दो सहयोग गर्ने भन्दै खेलाडीहरुमा धेरै सम्भावना रहेको बताए ।

एक वर्षसम्म नेपालले कुनै अन्तर्राष्ट्रिय प्रतियोगिता खेल्ने कार्यक्रम नरहेकाले टोलीलाई व्यस्त राख्न मैत्रीपूर्ण खेलको अवधारणा ल्याएको अखिल एन्फाले जनाएको छ ।

नेपाली टिम १२ गते शुक्रबार राति मलेसिया जानेछ । 

चैत ९ । पर्यटकीय शहर धरानमा पाराग्लाइडिङ च्याम्पियनसीप हुने भएको छ । राष्ट्रिय खेलकुद परिषद् र नेपाल पाराग्लाइडिङ एण्ड ह्याङग्लाइडिङ एसोसिएसनको आयोजना तथा एक्स्ट्रिम धरानको संयोजनमा च्याम्पियनसिप गर्न लागिएको हो ।
यही चैत १३ र १४ गते हुने च्याम्पियनसीपमा धरानको आकाशमा एकै पटक एक सय वटा पाराग्लाइडिङ उडाइनेभएको छ । पाराग्लाइडिङका लागी राम्रो मानिएको धरानको आकाशमा चैत १३ र १४ गते एकै साथ एक सयको हाराहारीमा पाराग्लाइडिङ उडान गर्दै प्रतियोगिता गर्न लागिएको हो ।
चौथो माउन्टेन स्पोर्टस् फेस्टिवलअन्र्तगत राष्ट्रियस्तरको पाराग्लाइडिङ एकुरेसी च्याम्पियनसिपमा यत्तिको संख्यामा पाराग्लाइडिङ धरानको आकाशमा उड्ने भएका हुन् ।
२०६७ सालमा पहिलो पटक परिक्षण उडान सफल भएसगै धरानमा यो च्याम्यिनसिप हुन लागेको हो । प्याराग्लाइडिङको उत्सव मानिने यो कार्यक्रमले पाराग्लाइडिङलाई पूर्वमा विस्तार गर्न सहयोग पुग्ने कार्यक्रम आयोजकको भनाइ छ ।
प्रतियोगितमा पहिलो हुनेले २५ हजार, दोस्रो हुनेले १५ हजार र तेस्रो हुनेले १० हजार रुपैयाँसहित ट्रफि र मेडल प्रदान गरिने आयोजकले जनाएको छ ।


चैत ९ । बंगलादेशलाई हराउँदै अष्ट्रेलियाले भारतमा जारी विश्वकप ट्वेन्टी–ट्वेन्टी क्रिकेट प्रतियोगितामा पहिलो जित हात पारेको छ ।
भारतको बैङ्ग्लोरमा सोमबार भएको खेलमा अष्ट्रेलियाले बंगलादेशलाई ३ विकेटले हरायो । खेलमा पहिले व्याटिङ गरेको बंगलादेशले २० ओभरमा ५ विकेट गुमाएर १ सय ५६ रन बनायो ।
justify;">जवाफमा १ सय ५७ रनको चुनौती अष्ट्रेलियाले खेलमा ९ बल बाँकी छँदा ७ विकेट गुमाएर पुरा गर्‍यो ।
अष्ट्रेलियाको जितमा सुरुवाती व्याट्सम्यान उस्मान खवाजाको ५८ रन महत्वपूर्ण रह्यो । जितसँगै अष्ट्रेलियाले विश्वकप ट्वेन्टी ट्वेन्टी क्रिकेट प्रतियोगितामा अंकको खाता खोलेको छ ।
विश्वकप क्रिकेटमा आज पाकिस्तान र न्युजिल्याण्ड भिड्नेछन् । लगातार दुई खेल जितेको न्युजिल्याण्ड उत्कृष्ट लयमा छ भने एक खेलमा जित तथा एक खेलमा हार भोगेको पाकिस्तान आजको खेलपूर्व दबाबमा छ ।


चैत ७। इटहरी गोल्डकप अन्तराष्टिय आमन्त्रण फुटवल प्रतियोगीतामा झापाको काडकभिट्टा फुटवल ट्रेनिङ सेन्टर विजयी बनेको छ ।  बिआरसी भुटान र काडकभिट्टा बिच भएको खेलको निर्धारित समयमा दुवै तर्फबाट कुनै गोल हुन नसके पछि समयको अभावका कारण अतिरिक्त समय नथपि खेल सिधै ट्राइव्रेकरमा धकेलिएको थियो ।
ट्राइव्रेकरमा काकडभिट्टाका गोल किपर मनोज प्रधानको उत्कृष्ट बचाउ नै आजको खेल जीत्न निर्णायक बन्यो । उनले अन्तिम समयमा भुटानका धिरज तामाङको प्रहारलाई उत्कृष्ट बचाउ गर्दा टीम विजयी बन्न सफल भयो । उनि आजको खेलको उत्कृष्ट खेलाडी बन्न समेत सफल भए ।
ट्राइव्रेकरमा काकडभिट्टाका तर्फबाट सुमिन मैनालीको पहिलो गोल विपक्षीका गोल रक्षकले असफल बनाइदिएका थिए । त्यस्तै बुद्ध चेम्जोङको गोल समेत पोलमा ठोकिएर बाहिरिएको थियो । काकडभिट्टाका खानिरदिलसन लिम्बु, रोवि थापा र देलेन लोक्थनले गोल गरेका थिए । यता भुटानका तर्फबाट वर्तमान राई र विक्रम लिम्बुको प्रहारले मात्र जाली चुम्न सफल बन्यो । बाँकि खेलाडी निराजन खड्का, दिनेक कार्की र धिरज तामाङको प्रहार विपक्षीका गोल रक्षक मनोज प्रधानले विफल बनाइदिएका थिए ।
प्रतियोगीतामा सर्वोत्कृष्ट खेलाडी काकडभिट्टाका बुद्ध चोम्जोङ घोषित भए । उनले २४ इन्चको एलइडि टेलिजिभन प्राप्त गरे । त्यस्तै सर्वाधिक गोलकर्ता बिआरसी भुटानका धिरज तामाङ घोषित भए । उनले एक थान मोवाइल प्राप्त गरेका छन् । प्रतियोगीतामा उदयीमान खेलाडी आयोजक राष्ट्रिय जागृती क्लबका दिपेन तामाङ घोषित भए । उनले २२ इन्चको एलइडी टेलिभिजन प्राप्त गरे ।
विजयी टीमले १ लाख ११ हजार १ सय ११ रुपैया, शील्ड ट्रफि र प्रमाणपत्र प्राप्त ग¥र्यो भने उपविजेता टीमले ५५ हजार ५ सय ५५ रुपैया, शील्ड ट्रफि र प्रमाणपत्र प्राप्त गर्यो  । विजयी तथा उत्कृष्ट खेलाडीलाई राष्ट्रिय खेलकुद परिषदका सदस्य सचिव केसव विष्टले पुरस्कार प्रदान गरेका थिए ।







चैत ७ ।  इंङ्गलिस प्रिमियर लिग फुटबलमा लेष्टर सिटीले शिर्ष स्थानको अग्रतालाई फराकिलो पारेको छ ।
शनिबार राती भएको खेलमा क्रिष्टल प्यालेसलाई १-० ले हराँउदै लेष्टरले दोस्रो स्थानको टोटनह्याम हट्सपरसँग ८ अंकको अग्रता लिएको हो ।
शनिबार रातीको जितपछि लेष्टर सिटीले प्रिमियरलिगको उपाधि संभावना बलियो पारेको छ । लिगमा ७ खेल बाँकी छँदा लेष्टरले उपाधि पक्का गर्न ७ खेलमा जित आवश्यक छ ।
तर दोस्रो स्थानको टोटनह्याम र तेस्रो स्थानको आर्सनलले खेल गुमाएको खण्डमा भने लेष्टरले यो भन्दा कम खेल जितेर पनि उपाधि कब्जा गर्न सक्छ । लेष्टरले भन्दा एक खेल कम खेलेको टोटनह्यामले आज बर्नमाउथसँग खेल्नेछ ।
प्रिमियर लिग अन्तर्गत शनिबार राती भएका अन्य खेलहरुमा आर्सनलले एभर्टनलाई २-० ले हराँउदा चेल्सीलाई वेष्ट ह्याम युनाइटेडले २-२ गोलको बराबरीमा रोकेको छ ।
यसैगरी स्टोक सिटीले वाट्फोर्डलाई २-१ ले पराजित गर्दा नर्वीच सिटीले वेष्ट ब्रोमलाई तथा स्वान्सी सिटीले एस्टन भिल्लालाई १-० ले हराएका छन् ।



चैत ७ । विश्वकप ट्वेन्टी ट्वेन्टी क्रिकेट प्रतियोगिता अन्तर्गत गएराति भएको खेलमा भारतले पाकिस्तानलाई ६ विकेटले हराएको छ ।
वर्षाको कारण १८ ओभरमा घटाइएको खेलमा टस हारेर पहिले ब्याटिङ गरेको पाकिस्तानले ५ विकेट गुमाउँदै १ सय १८ रन बनायो ।
पाकिस्तानका लागि सोहेब मल्लिकले२६ रन बनाए भने उमर अकमलले २२ रन जोडे । जवाफमा १ सय १९ रनको झिनो चुनौती भारतले खेलमा १३ बल बाँकी छँदा पूरा गर्‍यो ।
भारतको जितमा युवराज सिंह र विराट कोहलीको ६१ रनको साझेदारी महत्वपूर्ण रह्यो । कोहलीले अविजित ५५ रन जोड्दा युवराज सिंहले २४ रन बनाए । पाकिस्तानका मोहम्मद सामीले २ विकेट लिए ।
योसँगै भारतले आफ्नै देशमा भइरहेको विश्वकप ट्वेन्टी ट्वेन्टी क्रिकेटमा पहिलो जित हात पारेको छ भने पाकिस्तानले पहिलो हार भोगेको छ ।
यसअघि पहिलो खेलमा भारतलाई न्यूजिल्याण्डले हराएको थियो भने पाकिस्तानले बंगलादेशलाई पाखा लगाएको थियो ।
विश्वकप ट्वेन्टी ट्वेन्टी क्रिकेटमा आज दुई खेल हुनेछन् । पहिलो खेलमा अफ्गानिस्तान र दक्षिण अफ्रिका भिड्दा दोस्रो खेलमा श्रीलंकाले वेष्ट इंडीजसँग खेल्नेछन ।

चैत्र ४।  बार्यन म्युनिखले दुई गोलले पछि परेको अवस्था उल्टाउँदै युभेन्टसलाई अतिरिक्त समयमा हराएको छ र नाटकीय रुपमा च्याम्पियन्स लिग फुटबलको क्वार्टरफाइनलमा स्थान बनाएकको छ ।
पहिले लेग २-२ को बराबरीमा सकिएको थियो । बार्यनको घरेलु मैदानमा बुधबार राति भएको दोस्रो लेगमा युभेन्टसले सुरुवाति २८ मिनेटमा नै दुई गोल गर्‍यो ।
इटानियल क्लब युभेन्टसले पाँचौं मिनेटमा पोग्बाको गोलबाट अग्रता लिएको थियो २८ औं मिनेटमा क्वाड्राडोले गोल गरेपछि युभेन्टस निकै सहज अवस्थामा पुग्यो ।
खेलको ७३ औं मिनेटमा रोबर्ट लेभान्डोस्कीले हेड गोल गर्दै घरेलु टोलीको आश जगाए । अन्तिमसम्म पनि घरेलु टोलीले गोल थप्न नसकेपछि युभेन्टस अघिल्लो चरण पुग्ने लगभग पक्का जस्तै देखिएको थियो ।
तर, अन्तिम केही मिनेट सम्हालिन सकेन र थोमर मुलरले ९० मिनेटका खेल सकिनै लाग्दा गोल गरे । र, खेल अतिरिक्त समयमा गयो ।
थपिएको ३० मिनेटमा भने बार्यन हावी भयो । १०८ औं मिनेटमा थिएगोले गोल गरे भने ११० औं मिनेटा कोमानले गोल गर्दै घरेलु टोलीलाई ६-४ को नाटकीय जित दिलाएका छन् ।


चैत ४  । शीर्ष वरीयताका खेलाडीहरु शिवराम श्रेष्ठ र सञ्जय लामा सूर्य नेपाल एनपीजीए म्याच प्ले गल्फ प्रतियोगिताको क्वार्टरफाइनलमा प्रवेश गरेका छन् ।

रोयल नेपाल गल्फ क्लबमा सुरु भएको प्रतियोगितामा आ–आफ्ना प्रतिद्धन्द्धीलाई पराजित गर्दै शीर्ष खेलाडीहरुले अन्तिम आठमा ठाउँ पक्का गरेका हुन् ।

नेपाल नम्बर एक शिवराम श्रेष्ठलेसञ्जीव नेपालीलाई ७–५ ले हराए । दोस्रो वरीयताका सञ्जय लामाले यलम्बर अधिकारीलाई ३–२ ले हराए ।

क्वार्टरफाइनलमा शिवराम श्रेष्ठले राम मगरसँग प्रतिस्पर्धा गर्नेछन् ।

राम मगरसँगै रवि खड्का, सूर्य शर्मा, दीपक थापामगर, भुवन नगरकोटी र धन थापा पनि क्वार्टरफाइनलमा प्रवेश गरेका छन् ।

क्वार्टरफाइनल र सेमिफाइनल खेलहरु बुधबार हुने छन् भने फाइनल खेल बिहीबार हुनेछ ।

प्रतियोगितामा अघिल्लो वर्षका शीर्ष १६ जना व्यावसायिक गल्फर सहभागी छन् ।


चैत ४  । झापाको दुवागढीमा तेस्रो राष्ट्रिय लिग पुरुष भलिवल प्रतियोगिता हुने भएको छ । नेपाल भलिवल संघले पत्रकार सम्मेलन गरी आगामी वैशाखको पहिलो सातादेखि प्रतियोगिता सञ्चालन गर्ने जानकारी दिएको हो ।
बिहानी बचत तथा ऋण सहकारी संस्था दुवागढी र भलिबल संघको आयोजनामा हुने प्रतियोगितामा पूर्वाञ्चल भलिबल संघ, मध्यमाञ्चलक्षेत्रिय भलिबल संघ, पश्चिमाञ्चल क्षेत्रिय भलिबल संघ, जाउलाखेल ट्रेनिङ सेन्टर, ढोरपाटन भलिबल क्लब र विभागीय नेपाल पुलीस, सशस्त्र प्रहरी बल र त्रिभुवन आर्मी सहित ८ वटा टिम सहभागी हुने निश्चित भएको छ ।
चार दिनसम्म सञ्चालन प्रतियोगिताको पहिलो हुनेलाई ३ लाख १५ हजार, दोस्रोलाई १ लाख ७५ हजार रुपौयाँ र तेस्रोलाई १ लाख १० हजार रुपैयाँ प्रदान गरिने आयोजकले जनाएको छ ।

३० फागुन, काठमाडौं । आईसीसी टी-२० विश्वकप क्रिकेटमा नेदरल्याण्डले आयरल्याण्डलाई १२ रनले पराजित गरेको छ ।
वर्षाका कारण ६ ओभरमा छोट्याइएको खेलमा नेदरल्याण्डले ५ विकेट गुमाएर ५९ रन बनाएको थियो । उसका लागि स्टफेन माइबर्गले २७ रन जोडे ।
जवाफमा मैदान उत्रिएको आयरल्याण्डले ७ विकेट गुमाएर ४७ रन मात्र बनाउन सक्यो । उसका लागि पल स्टर्लिङले १५ रन बनाए भने अन्य ब्याट्सम्यान चल्न सकेनन् ।

चैत १ । ओमानलाई हराउँदै बंगलादेश विश्वकप ट्वेन्टी ट्वेन्टी क्रिकेट प्रतियोगिताको सुपर टेनमा प्रवेश गरेको छ ।
समुह ए अन्तर्गतको अन्तिम लिग खेलमा आइतबार बंगलादेशले ओमानलाई ५४ रनले हरायो । खेलमा पहिले ब्याटिङ गरेको बंगलादेशले निर्धारित २० ओभरमा २ विकट गुमाएर १ सय ८० रन बनायो ।
बंगलादेशकालागि तमिम ईकबालले १ सय ३ रनको शतकीय पारी खेल्दा शबिर रहमानले ४४ रनको योगदान दिए । जवाफमा १ सय ८१ रनको विशाल लक्ष्य पछ्याएको ओमानले व्याटिङ सुरु गरेपछि वर्षाले दुई पटक खेल अवरुद्ध भयो ।
यसपछि १२ ओभरमा १ सय २० रनको नयाँ चुनौती पाएको ओमानले ९ विकेट गुमाएर ६५ रन मात्रै जोड्न सकेपछि बंगलादेश डि.एल मेथडको आधारमा ५४ रनले विजयी भयो ।
जीतसँगै बंगलादेशले विश्वकप ट्वेन्टी ट्वेन्टी क्रिकेट प्रतियोगिताको सुपर टेनमा ठाँउ बनाएको छ ।
समुह चरण पार गर्दै अफ्गानिस्तानले यसअघि नै सुपर टेनमा ठाउँ बनाइसकेको छ । सुपर टेनका खेलहरु भोलिबाट सुरु हुँदैछन् । पहिलो खेलमा आयोजक भारत र न्यूजिल्याण्ड भिड्ने छन् ।

फागुन ३०। झापामा आगामी चैत १९ गतेदेखि झापा गोल्डकप अन्तर्राष्ट्रिय आमन्त्रण फुटबल प्रतियोगिता हुने भएको छ ।

झापा फुटबल संघको आयोजना तथा रमपम झापा–११ फुटबल क्लबको सहआयोजनामा आगामी चैत १९ देखि २७ गतेसम्म प्रतियोगिता हुन लागेको शनिबार पत्रकार सममेलन गरी जानकारी दिइएको हो ।

खेल झापाको विर्तामोडस्थित डोमलाल रंगशालामाहुनेछ ।

प्रतियोगितामा भारत, बंगलादेश, भुटान र श्रीलंकाका चार क्लबसहित नेपालका विभागीय टिम नेपाल पुलिस, त्रिभुवन आर्मी र सशस्त्र प्रहरीको एपीएफ क्लबले सहभागिता जनाउँदै छन् ।

यस्तै, प्रतियोगितामा ‘ए’ डिभिजन क्लबहरु मनाङ–मर्स्याङ्दी, थ्रीस्टार र आयोजक रमपम झापा–११ ले पनि सहभागिता जनाउँदै छन् ।

प्रतियोगिता विजेताले ६ लाख र उपविजेताले ३ लाख रुपैयाँ पुरस्कार प्राप्त गर्ने जनाइएको छ ।

फागुन ३०।  नेपालले मलेसियाको राष्ट्रिय टोलीसँग खेल्ने तय भएको अन्तर्राष्ट्रिय मैत्रिपूर्ण फुटबल खेलको मिति सरेको छ । खेल आगामी मे महिनामा हुनेछ ।
तर नेपालले आगामी चैत्र १४ गते मलेसियाको अण्डर २२ राष्ट्रिय टोलीसँग भने मैत्रिपूर्ण फुटवल खेल्नेछ । अखिल नेपाल फुटबल संघ एन्फा र मलेसियाली फुटबलसंघबीचको समन्वयको अभावमा मलेसियाले नेपालसंग खेल्ने भनेको पूर्वघोषित मितिमा मकाउसंग खेल्ने निश्चितभएपछि नेपालसँगको खेलतालिका पर सरेको हो ।
त्यसैको क्षतिपुर्तिस्वरुप मलेसियाले २२ बर्षमुनिको राष्ट्रिय टोलीसँग मैत्रिपुर्ण फुटबल खेलाउने निर्णय गरेको हो । यसअघि चैत्र १६ गते दुई देशको राष्ट्रिय टोलीबीच मैत्रिपूर्ण फुटबल खेलाउने तय गरेको एन्फाले जनाएको थियो ।
मलेसियाली युवा टोली बिरुद्धको खेलमा सागमा स्वर्ण जितेको टिमका अधिकांश खेलाडी समावेश गरिने एन्फाले जानकारी दिएको छ । नेपाली टोलीका नवनियुक्त प्रशिक्षक ग्यातुकी कोजुको नेतृत्वमा पहिलो पटक नेपालले मलेसियाको युवा टोलीसँग प्रतिस्पर्धा गर्नेछ ।
प्रशिक्षक कोजु अहिले सिमरा गोल्डकपका नेपाली खेलाडीको प्रदर्शन निरिक्षण गरिरहेका छन् । सिमराबाट आइतबार फर्किएलगत्तै उनले मलेशियाबिरुद्धको खेलका लागि प्रारम्भिक टोलीको घोषणा गर्नेछन् ।

फागुन ३०।  नेपाली फुटबलर अन्जन विष्ट र अनन्त तामाङ हिजो  शनिबार नेदरल्याण्ड गएका छन् । 
उनीहरुले स्पेनको मार्बेला क्लबसँग युरोप भ्रमणमा सलग्न हुनेछन् । यो भ्रमण मार्च १३ देखि ३० सम्म हुनेछ । उनीहरुले क्लबमा प्रशिक्षण लिनेछन् ।
खेलाडीहरुलाई अखिल नेपाल फुटबल संघ एन्फाका कार्यबाहक अध्यक्ष नरेन्द्र श्रेष्ठ लगायतले विदाइ गरेका छन् ।
चोटका कारण विमल घर्ती मगर भने गएका छैनन् । उनी केही पछि मात्र जाने अखिल नेपाल फुटबल संघ एन्फाले जनाएको छ ।

राष्ट्रिय खेलकुद परिषद् (राखेप) का पूर्वसदस्य–सचिव युवराज लामाको अध्यक्षतामा अखिल नेपाल खेलकुद महासङ्घ गठन भएको छ ।
लामाको अध्यक्षतामा १५२ सदस्यीय गठन भएको हो । महासङ्घको उपाध्यक्षमा अर्जुन केसी, पहलसिंह घर्ती, कुसुमकुमारी श्रेष्ठ, जनक बर्तौला, शर्केस घल्लान र हरि खड्का हुनुहुन्छ भने महासचिवमा शिव कोइराला तथा उपमहासचिवमा गजेन्द्र खपाङ्गी (ईश्वर) छन् ।
त्यसैगरी सचिवमा किरण राई, किरण गिरी, दिवस खड्का, राजकुमार कार्की, सञ्जीव पाण्डे, तिलक चौधरी, प्रकाशलाल श्रेष्ठ, उत्तम गुरुङ, मञ्जु बम, सुरज डिसी, जीवन खाती, रेशम रसाइली, राजकुमार मण्डल र रवीन्द्र श्रेष्ठ छन् ।कोषाध्यक्षमा हरिशरण केसी छन् ।

बिमल रानाको ह्याटि्रकको मदतले रुपन्देही ११ लाई पराजित गर्दै हेटांैडाको विजय युथ क्लबले सातौं सिमरा गोल्डकपको उपाधि जितेको छ ।
शनिबार भएको फाइलन भिडन्तमा रुपन्देहीलाई ४-० ले पराजित गर्दै हेटौडाले पहिलो सहभागितामै उपाधि उचालेको हो । उपाधिसँगै हेटौंडाले पाँच लाख ५१ हजार हात पारेको छ भने उपविजेता रुपन्देहीले दुई लाख ५० हजारमै चित्त बुझाएको छ ।
सिमरा रंगशालामा भएको खेलको २१ औं मिनेटमा बिमल रानाले गोल गर्दै टिमलाई अग्रता दिलाए । सुनिल बलले प्रहार गरेको कर्नर बललाई सदुपयोग गर्दै रानाले हेड गोल गरे । त्यसअघि रुपन्देहीका गणेश खड्काले सुरुवातमै गोल गर्ने अवसर चुकाएका थिए ।
दोस्रो हाफमा लय समातेको हेटौंडाले तीन गोल थप्दै फराकिलो जित आत्मसाथ गर्‍यो । लगातार दबाब सिर्जना गरेको हेटौंडाले खेलको ५८ औं मिनेटमा अग्रता दोब्बर पार्‍यो । सुनिल बिकको पासलाई सदुपयोग गर्दै बलले अग्रता दोब्बर पारेका हुन् ।
त्यसको एक मिनेट बित्न नपाउँदै बिमलले ब्यक्तिगत दोस्रो टिम तथा टिमका लागि तेस्रो गोल गरे । फिनिसिङमा कमजोर देखिएको रुपन्देहीको रक्षापंक्ति सम्हालिन नसक्दा हेटौंडाका बिमल रानाले चौथो ७९ औं मिनेटमा ह्याटि्रक पुरा गरे ।
बिमलको प्रतियोगितामा यो चौथो गोल हो । चार गोल गरेका बिमलले सर्वाधिक गोलकर्ताको उपाधिसहित १५ हजार नगद पाए ।
बिमल नै प्रतियोगिताको सर्वोत्कृष्ट खेलाडी चुनिए । उनले मोटरसाईकल प्राप्त गरे । प्रतियोगिताको उत्कृष्ट गोलरक्षक हेटौडाका अशोक बराल र प्रशिक्षक सुविन घिमिरे घोषित हुँदा अन्य बिधाको पुरस्कार रुपन्देहीका खेलाडीले हात पारे ।
उत्कृष्ट मिडफिल्ड रुपन्देहीका शिव श्रेष्ठ, उत्कृष्ट डिफेन्स देवेन्द्र तामाङ, उत्कृष्ट फर्वाड योगेश गुरुङ घोषित भए । उनीहरुले नही १५ हजार प्राप्त गरेका छन् ।

फागुन २१ । बंगलादेशमा जारी एसिया कप क्रिकेट अन्तर्गत समूह चरणको अन्तिम खेलमा भारतले युएईलाई ९ विकेटले हराएको छ ।
बंगलादेशको मिरपुरमा टस जितेर पहिले ब्याटिङ गरेको युएईले निर्धारित २० ओभरमा ९ विकेट गुमाएर ८१ रन जोड्यो । युएईका लागि शैमान अनवरले ४३ रन जोड्नुबाहेक अन्य कुनै पनि ब्याट्सम्यान क्रिजमा टिक्न सकेनन्।
जवाफमा ८२ रनको सामान्य लक्ष्य भारतले १० ओभर १ बलमा १ विकेट गुमाएर पुरा गर्‍यो । भारतका लागि रोहित शर्माले ३९ रन तथा युवराज सिंहले अविजित २५ रनको योगदान दिए ।
जितसँगै भारतले एसिया कप क्रिकेटमा समूह चरणका सबै ४ खेल जितेको छ । ८ अंक जोडेको भारत र ६ अंक जोडेको आयोजक बंगलादेश फाईनलमा पुगिसकेका छन् । फाईनल खेल शनिबार हुनेछ ।
प्रतियोगिता अन्तर्गत आज हुने खेलमा पाकिस्तान र श्रीलंका भिड्नेछन् । यी दुबै टोली समूह चरणबाटै बाहिरिसकेकाले आजको खेल औपचारिकतामा मात्र सिमित हुनेछ ।

फागुन २१ । स्पेनिस ला लिगा अन्तर्गत गएराति भएका खेलमा बार्सिलोना, ग्रानाडा र रियल बेटिस विजयी भएका छन् ।
अंक तालिकाको शीर्ष स्थानमा रहेको बार्सिलोनाले रायो भाएकानोलाई ५–१ को फराकिलो अन्तरले हरायो । बार्सिलोनाका लियोनल मेस्सीले ह्याट्रिक गरे भने ईभाँ राकिटिच र अर्डा टुरानले एक–एक गोल गरे ।
style="text-align: justify;">मेस्सीले खेलको २३ औं, ५३ औं र ७२ औं मिनेटमा गोल गर्दै ह्याट्रिक पुरा गरेका हुन् ।
खेलमा रायो भाएकानोका दुई खेलाडीले रातो कार्ड खाएपछि टोली ९ जनामा समेटिएको थियो ।
ला लिगा अन्तर्गतको अर्को खेलमा ग्रानाडाले स्पोर्टिङ गियोनलाई २–० ले हराउँदा रियल बेटिसले ईस्पानियोललाई ३-० ले पराजित गर्‍यो ।
गएरातिका खेलपछि स्पेनिस लिगको अंक तालिकामा २७ खेलबाट ६९ अंक जोडेको बार्सिलोना शीर्ष स्थानमा छ । समान खेलबाट ६१ अंक जोडेको एथ्लेटिको मड्रिड दोस्रो स्थानमा छ भने ५७ अंक जोडेको रियल मड्रिड तेस्रो स्थानमा छ ।

फागुन २० । आयोजक बंगलादेश एसिया कप क्रिकेटको फाइनलमा प्रवेश गरेको छ । गएराति मिरपुरमा भएको खेलमा पाकिस्तानलाई पाँच विकेटले पराजित गर्दै बंगलादेश फाइनलमा पुगेको हो ।
पाकिस्तानले दिएको १३० रनको लक्ष्य बंगलादेशले १९ दशमलव १ ओभरमा पाँच विकेटको क्षतिमा हासिल गरेको हो । बंगलादेशका सौम्य सरकारले ४८, महमुदुल्लाहलेनटआउट २२ तथा सब्बिर रहमानले १४ रन बनाए । पाकिस्तानका मोहम्मद आमिरले दुई विकेट लिए ।
यसअघि पहिले ब्याटिङ गरेको पाकिस्तानले निर्धारित २० ओभरमा सात विकेट गुमाएर १२९ रन बनायो । उसका लागि सरफराज अहमदले नटआउट ५८ तथा शोएम मलिकले ४१ रन बनाएका थिए ।
चार खेलमा तीनमा जित र एकमा हार बेहोरेको बंगलादेशले उपाधिका लागि आइतबार भारतसँगै प्रतिस्पर्धा गर्नेछ । लगातार तीन खेल जितेको भारत एक खेल अगावै फाइनलमा पुगेको छ । त्यसअघि आज भारतले युएईसँग खेल्ने छ ।

फागुन २० । इङ्लिस प्रिमियर लिग फुटबलअन्तर्गत बुधबार राति भएका खेलमा उपाधि दावेदार टोली आर्सनल र टोटनह्याम हट्सपर पराजित भएका छन् ।
अंक तालिकामा दोस्रो स्थानमा रहेको टोटनह्याम हट्सपरलाई वेष्ट ह्याम युनाईटेडले १–० ले हरायो । यसैगरी तेस्रो स्थानको आर्सनललाई स्वान्सी सिटीले २–१ ले पराजित गर्‍यो।
प्रिमियर लिग अन्तर्गत गएराति भएका अन्य खेलहरुमा लिभरपुलले म्यानचेस्टर सिटीलाई ३–० ले हराउँदा म्यानचेस्टर युनाईटेडले वाट्फोर्डलाई १–० ले पराजित गर्‍यो ।
बुधबार रातिका खेल पछि प्रिमियर लिग फुटबलको अंक तालिकामा टोटनह्याम हट्सपर र आर्सनलले शीर्ष स्थानको लेष्टर सिटीसँग अंक दुरी घटाउने अवसर गुमाएका छन् ।
२७ खेलबाट ५७ अंक जोडेको लेष्टर सिटी तालिकाको शीर्ष स्थानमा छ । समान खेलबाट ५४ अंक जोडेको टोटनह्याम दोस्रो स्थानमा छ भने ५१ अंकको साथ आर्सनल तेस्रो स्थानमा रहेको छ ।
४७/४७ अंक जोडेका म्यानचेस्टर सिटी र म्यानचेस्टर युनाईटेड क्रमशः चौथो र पाँचौं स्थानमा रहेका छन् ।

फागुन २०।  यु-१४ महिला विश्व जुनियर च्याम्पियनसिपमा सहभागी हुन तीन सदस्यिय नेपाली लन टेनिस टोली बुधबार श्रीलंका जाने भएको छ ।
श्रीलङकाको राजधानी कोलम्बोमा मार्च २ देखि ९ तारिख २०१६ सम्म आयोजना हुने प्रतियोगितामा प्रेरण कोइराला र सलोनी तामाङ्गले प्रतिस्पर्धा गर्ने छन् । टिम प्रशिक्षकमा राज कुमार लामा रहेका छन् ।
मंगलबार एक समारोहविच नेपाल लन टेनिस संघका महासचिव मनोहर दास मुलले खेलाडी तथा प्रशिक्षकलाई विदाई गरे ।

फागुन २०।  मोफसलकै सर्वाधिक पुरस्कार राशीको सिमरा गोल्डकप फुटबल प्रतियोगिता बिहीबारदेखि सुरु हुँदैछ । प्रतियोगिताको अन्तिम तयारी पुरा भएको आयोजकले जानकारी दिएको छ ।
आयोजक नव जनजागृति युवा क्लबले बुधवार पत्रकार सम्मेलन गरी प्रतियोगिता बारे जानकारी गराएको हो । बिहीवारदेखी सुरु हुने प्रतियोगिताको उद्घाटन खेलमा आयोजक क्लब र बिजय युथ क्लब हेटौडाबीच प्रतिस्पर्धा हुने भएको छ ।
बिजय डिस्ट्रीलरीको मुख्य प्रायोजन रहने प्रतियोगितामा ए डिभिजनका पाँच क्लब सहित १० टिमको सहभागिता रहनेछ । प्रतियोगितामा दुई पटकको बिजेता मनाङ मस्र्याङदी क्लबसहित थि्रस्टार क्लब, नेपाल आर्मी, नेपाल एपिएफ, सरस्वती युथ क्लब, रुपन्देही ११, सहारा क्लब पोखरा, वीरगन्ज युनाईटेड, बिजय युथ क्लब र आयोजक नव जनजागृति युवा क्लबले सहभागीता जनाउनेछन् ।
राजधानी बाहिरकै प्रतिष्ठित फूटवल प्रतियोगिताको रुपमा परिचय बनाएको गोल्डकपको आयोजना हुने सिमरा रंगशालाको सम्पूर्ण तयारी अन्तिम चरणमा पुगेको क्लबका अध्यक्ष कासिम मियाले बताए । मियाले खेल मैदान मर्मतका साथै अस्थाई प्याराफिट बनाउने काम सकिएको जानकारी दिए ।
६० लाख अनुमानित बजेट रहेको प्रतियोगिताको बिजेताले पाँच लाख ५१ हजार नगद पुरस्कार पाउनेछ । यो पुरस्कार रकम मोफसलमा आयोजना हुने प्रतियोगिताहरुमध्येकै उच्च हो । प्रतियोगिताको उपबिजेताले नगद दुई लाख ५० हजार प्राप्त गर्नेछ ।
प्रतियोगिता अवधीभर उत्कृष्ट खेल प्रदर्शन गर्ने सर्वोत्कृट खेलाडीलाई मोटरसाइकल पुरस्कार दिइनेछ । त्यस्तै आआˆनो बिधामा उत्कृष्ट प्रदर्शन गर्ने पाँच जनालाई जनही १५ हजारले पुरस्कृत गरिनेछ । प्रत्येक खेलको म्यान अफ द म्याचले पनि तीन हजार पाउनेछन् ।

फागुन १९ । श्रीलंकालाई हराँउदै भारत एसिया कप क्रिकेट प्रतियोगिताको फाईनलमा प्रवेश गरेको छ । बंगलादेशमा जारी प्रतियोगिता अन्तर्गत मंगलबार भएको खेलमा भारतले श्रीलंकालाई ५ विकेटले हराएको हो ।
मिरपुरमा पहिले व्याटिङ गरेको श्रीलंकाले २० ओभरमा ९ विकेट गुमाँउदै १ सय ३८ रनको मध्यम स्कोर खडा गर्‍यो । श्रीलंकाकोलागि चामरा कपुगेदराले ३० रन बनाँउदा सिरीवर्दनाले २२ रनको योगदान दिए ।
जवाफमा १ सय ३९ रनको चुनौती भारतले खेलमा ४ बल बाँकी छँदा ५ विकेट गुमाएर पुरा ग¥यो ।
कुनै समय १६ रन जोड्दा २ विकेट गुमाईसकेको भारतको लागि विराट कोहलीले अविजित ५६ रन तथा युवराज सिंहले ३५ रनको योगदान दिए । यसैगरी सुरेश रैनाले २५ रन जोडे ।
जीतसँगै भारतले ५ राष्ट्र सहभागि प्रतियोगिताको फाईनलमा स्थान पक्का गरेको छ । तीन खेलबाट भारतको ६ अंक भएको छ भने ४ अंक जोडेको बंगलादेश दोस्रो स्थानमा रहेको छ ।
बंगलादेशले बुधबार पाकिस्तानसँग खेल्दैछ । प्रतियोगिताको फाईनलमा पुग्ने संभावना जिवित राख्न यी दुवै टोलीले आजको खेल जित्नैपर्ने बाध्यता छ ।

फागुन १९ । मनाङ–मर्स्याङ्दी क्लब धरानमा जारी १८औं बुढासुब्बा गोल्डकप फुटबल प्रतियोगिताको फाइनलमा पुगेको छ ।

बुधबार भएको सेमिफाइनलमा साविक विजेता सशस्त्र प्रहरीको एपीएफ टिमलाई ३–२ ले हराउँदै मनाङले फाइनलमा ठाउँ पक्का गरेको हो ।

मध्यान्तरसम्म दुबैले २–२ गोल गरेका अवस्थामा मध्यान्तरपछि मनाङले एक गोल थप्दैउपाधि यात्रामा अब्बल देखिएको हो ।

मनाङका लागि ओलावाले, अनिल गुरुङ र अनन्त तामाङले एक–एक गोल गरे । त्यस्तै, सशस्त्रका लागि रमेश दंगाल र अन्जन विष्टले गोल गरे ।

क्वार्टरफाइनलमा पोखरा–११ लाई पेनाल्टी सुटआउटमा हराउँदै सशस्त्र तथा भुटान ११ लाई ८–० ले निराश पार्दै मनाङ अन्तिम चारमा पुगेका थिए ।

दोस्रो सेमिफाइनलमा बिहीबार नेपाल पुलिस क्लबले रुपन्देही–११ सँग खेल्नेछ ।

क्वार्टरफाइनलमा भारतको कालिङपोङस्थित शेरे क्लबलाई ३–० ले पराजित गर्दै पुलिस तथा आयोजक धरान फुटबल क्लबलाई ४–१ ले हराउँदै रुपन्देही अन्तिम चारमा पुगेका हुन् । 


फागुन १८ । नेपाल पुलिस क्लब धरानमा जारी १८औं बुढासुब्बा गोल्डकप फुटबल प्रतियोगिताको सेमिफाइनलमा प्रवेश गरेको छ ।

मंगलबार भएको अन्तिम क्वार्टरफाइनलमा भारतको कालिङपोङस्थित शेरे क्लबलाई ३–० ले पराजित गर्दै पुलिसले अन्तिम चारमा ठाउँ बनाएको हो ।

पुलिसलाई जिताउनेक्रममा खेलको ४०औं मिनेटमा रविनश्रेष्ठले, ७०औं मिनेटमा भरत शाहले तथा ८०औं मिनेटमा हेम तामाङले गोल गरे । यो खेलसँगै सेमिफाइनल समीकरण पनि पूरा भएको छ ।

पुलिसले अब बिहीबार रुपन्देही–११ सँग खेल्नेछ । क्वार्टरफाइनलमा रुपन्देहीले आयोजक धरान फुटबल क्लबलाई ४–१ ले हराएको थियो ।

पहिलो सेमिफाइनलमा बुधबार सशस्त्र प्रहरीको एपीएफ टिमले मनाङ–मर्स्याङ्दी क्लबसँग खेल्नेछ ।

क्वार्टरफाइनलमा सशस्त्रले पोखरा–११ लाई पेनाल्टी सुटआउटमा ५–४ ले तथा मनाङले भुटान ११ लाई ८–० ले हराएको थियो ।

प्रतियोगिता विजेताले चार लाख तथा उपविजेताले दुई लाख रुपैयाँ जित्नेछन् ।
- See more at: http://www.shyane.com.np/2016/03/blog-post_2.html#sthash.xV8uiIIy.dpuf



फागुन १८ । नेपाली राष्ट्रिय फुटबल टोलीका युवा खेलाडीहरु बिमल घर्ति मगर, अन्जन बिष्ट र अनन्त तामाङलाई स्पेनिस क्लब मार्बेला युनाइटेडले अनुबन्ध गरेको छ ।
स्पेनको तेस्रो डिभिजनको क्लब मार्बेला युनाइटेडले आफ्नो फेसबुक पेज मार्फत तिन नेपाली युबा खेलाडीहरुलाई अनुबन्ध गरेको जानकारी दिएको हो ।
क्लबले आफ्नो २०१६ को युरेपियन टुर अन्तर्गत जर्मनी, होल्याण्ड र बेल्जियममाहुने खेलहरुका लागी नेपाली फुटबलर बिमल, अन्जन र अनन्तलाई अनुबन्ध गरेको बताएको छ ।

ARENA NEWS

{picture#https://1.bp.blogspot.com/-TSSsOHmNA9g/Xrc8t2Oo7HI/AAAAAAAAChU/cyhWCseUQbI5bY_90tYKATlVBOVhKdofwCK4BGAYYCw/s1600/arena%2BNEWS%2Blogo%2B%25281%2529%2Bcopy.pngL} NEWS AND SPORTS {facebook#https://www.facebook.com/arena.np/} {twitter#https://twitter.com/arenanepal} {google#www.google.com/kpcat} {pinterest#https://www.pinterest.com/} {youtube#https://www.youtube.com/channel/UC_ISHKB5xxLJnGLep4Y3JEw} {instagram#www.instagram.com/}

Contact Form

Name

Email *

Message *

Powered by Blogger.