February 2016


फागुन १५। काठमाडौं क्रिकेट ट्रेनिङ सेन्टरको आयोजनामा प्रथम रुस्लान कप ट्वेन्टी ट्वेन्टी क्रिकेट प्रतियोगिता आयोजना हुने भएको छ ।
रुस्लान क्रिकेटको प्रमुख प्रायोजनमा आगामी फागुन १५ गतेदेखि २२ गतेसम्म त्रिभुवन बिश्व बिद्यालयको क्रिकेट मैदानमा आयोजना हुने प्रतिोगितामा कुल १६ टोली सहभागी हुने छन् ।
एक समुहमा ८ टोली राखेर गरिने सहभागी टोलीहरुलाई दुई समुहमा बिभाजन गरी नकआउटको आधारमा खेलाइने छ । प्रतियोगितामा तीन बिभागिय टोलीसहित राजधानी भित्र र बाहिरका १६ टोलीहरुले सहभागिता जनाउने छन् ।
बिभिन्न टोलीबाट राष्ट्रिय टोलीका सबै खेलाडीले प्रतियोगितामा प्रतिस्पर्धा गर्ने आयोजकको दाबी छ । प्रतियोगिताको उपाधी बिजेता टोलीले २ लाख तथा उपबिजेताले १ लाख रुपैयाँ हात पार्ने छन् ।

फागुन १५ । विश्व फुटबल महासंघ फिफाको नयाँ नेतृत्वमा जियानी ईन्फान्टिनो निर्वाचित भएका छन् ।
युएफाका महासचिव रहेका स्वीट्जरल्याण्डका ईन्फान्टिनो अरु तीन प्रतिष्पर्धीलाई पछि पार्दै फिफाको अध्यक्ष बन्न सफल भएका हुन् ।
दोस्रो चरणको मतदानमा उनले ११५ मत पाए भने उनका निकटतमप्रतिष्पर्धी एसियाली फुटबल महासंघ एएफसीका अध्यक्ष शेख सलमान बिन ईब्राहिम अल खालीफा उनीभन्दा २७ भोटले पछि परे ।
स्विट्जरल्याण्डको ज्युरिचमा शुक्रबार भएको निर्वाचनमा अध्यक्षको प्रत्याशीमा जोर्डनका राजकुमार अली बिन अल हुसेन, फ्रान्सका जेरोमी स्याम्पेन र दक्षिण अफ्रिकाका टोक्यो सेक्सवेल थिए ।
गत वर्ष पाँचौ कार्यकालको लागि निर्वाचित भएको केही हप्तापछि सेप ब्लाटरले फिफा अध्यक्षको पदत्याग गर्ने घोषणा गरेपछि निर्वाचन गरिएको हो ।

फागुन १४ । प्रधानसेनापति प्रथम राष्ट्रिय भलिबल प्रतियोगिताको उपाधि नेपाली सेनाको त्रिभुवन आर्मी क्लबले जितेको छ ।

ललितपुरको लगनखेलस्थित नेपाली सेनाको कभर्ड हलमा शुक्रबार भएको फाइनल खेलमा नेपाल पुलिस क्लबलाई ३–० को सोझो सेटमा हराउँदै सेनाले उपाधि जितेको हो ।

पहिलो सेट २५–१९ ले जितेको आर्मी क्लबले दोस्रो सेटझनै सहजरुपले २५–१३ ले आफ्नो पक्षमा पार्‍यो ।

यसैगरी, तेस्रो सेट २५-२१ ले जित्दै सेनाले विभागीय प्रतिद्धन्द्धी पुलीस क्लबविरुद्ध प्रभावशाली जित निकालेको हो ।

प्रतियोगितामा आर्मी क्लबका धनबहादुर भट्टले उत्कृष्ट खेलाडी घोषित हुँदै पल्सर मोटरसाइकल हात पारे ।

नेपाली सेनाले पहिलोपटक आयोजना गरेको प्रधानसेनापति राष्ट्रिय भलिबल प्रतियोगितामा ५ विकास क्षेत्र, नेपाली सेनाका दुई टिम, पुलिस क्लब र सशस्त्र प्रहरीको एपीएफ टिम गरी कुल ९ टोली सहभागी थिए ।

फागुन १२ । युरोपियन च्याम्पियन्स लिग फुटबल प्रतियोगितामा बार्सिलोनाले आर्सनललाई पराजित गरेको छ । प्रि–क्वाटरफाईलन अन्तर्गत गएराति आर्सनलको मैदानमा भएको पहिलो लेगको खेल बार्सिलोनाले २–० ले विजयी भएको हो । खेलमा बार्सिलोनाका लागि दुबै गोल लियोनल मेस्सीले गरे ।
मध्यान्तरसम्म गोलरहित बराबरीको अवस्थामारहेको खेलमा मध्यान्तरपछि बार्सिलोना हावी भएको हो । मेस्सीले ७१ र ८३ औं मिनेटमा गोल गरे ।
यो जितसँगै बार्सिलोनाले क्वाटरफाईनल पुग्ने सम्भावना बलियो बनाएको छ भने दोस्रो लेगको खेलपूर्व आर्सनल दबाबमा आएको छ ।
च्याम्पियन्स लिगअन्र्तगत गएराति नै भएको अर्को खेलमा जर्मनीको बायर्न म्युनिख र ईटालीको युभेन्टसले २–२ गोलको बराबरी खेलेका छन् । युभेन्टसको मैदानमा भएको खेलमा बायर्न म्युनिखका थोमस मुलर र आर्यन रोबेनले एक–एक गोल गरे । २–० ले पछि परेको घरेलु टोली युभेन्टसका लागि पावलो दिबाला र स्टेफानो स्टुरारोले एक–एक गोल फर्काउँदै खेल बराबरीमा टुंग्याए ।
यो बराबरीपछि हारको मुखमा पुगेको युभेन्टसलाई केही राहत मिलेको छ । दोस्रो लेगको खेल बायर्न म्युनिखको मैदानमा हुनेछ ।
युएफा च्याम्पियन्स लिग फुटबल प्रि–क्वाटरफाईनल अन्तर्गत आज राति दुई खेल हुनेछन् । आज युक्रेनको डाईनामो किभ र इङ्ल्यान्डको म्यानचेस्टर सिटी भिड्दा नेदरल्याण्ड्सको पिएसभीले स्पेनको एथ्लेटिको मड्रिडको सामना गर्ने छ ।


फागुन ११ । नेपाल पुलिस क्लब विराटनगरमा जारी विराट गोल्डकप फुटबल प्रतियोगिताको सेमिफाइनलमा पुगेको छ ।

मंगलबार भएको क्वार्टरफाइनलमा दाबेदार क्लब मनाङ–मर्स्याङ्दीलाई ‘टाइब्रेकर’मा ३–२ ले पराजित गर्दै पुलिसले अन्तिम चारमा ठाउँ पक्का गरेको हो ।

निर्धारित ९० मिनेटको खेलमा १–१ गोलको बराबरी भएपछिखेल अतिरिक्त समयतर्फ धकेलियो । थपिएको २० मिनेटमा गोल नभएपछि टाइब्रेकरमा मनाङ चुकेको हो ।

यसअघि, ७०औं मिनेटमा विनोद कार्कीको गोलबाट पुलिसले अग्रता लिएकामा इन्जुरी समयमा पाएको पेनाल्टीलाई मनाङका सुजल श्रेष्ठले गोलमा परिणत गरेका थिए ।

जितसँगै पुलिसले सेमिफाइनलमा मोरङ फुटबल क्लब प्रतिद्धन्द्धी पाएको छ ।

पहिलो सेमिफाइनलमा झापा–११ र सशस्त्र प्रहरी भिड्ने छन् ।

फागुन ८। आहारारा गोल्डकप जितेको तीन हप्ता पूरा नहुँदै लक्ष्मी हुण्डाई मनाङ मस्याङ्दीले शनिबार हेटौंडामा प्रथम अन्तर्राष्ट्रिय आमन्त्रण गोल्डकप फुटबल प्रतियोगिता जितेको छ ।
फाइनलमा नेपाल आर्मीलार्इ टाइब्रेकरमा ४-१ गोलअन्तरले पराजित गर्दै मनाङले उपाधिमा आफ्नो नाम लेखाएको हो ।
आहारारा गोल्डकपको फाइनलमा व्यहोरोको हारको बदला लिने उद्देश्य साथ मैदानमा उत्रिएको आर्मीले साग विजेता टोलीका सदस्यद्वय विकेश कुथु र नवयुग श्रेष्ठलाई मैदानमा उतारेपनि कुनै जादु देखाउन सकेन ।
निर्धारित ९० मिनेट र थप गरिएको २० मिनेटमा पनि दुवै तर्फबाट गोल नभएपछि खेलको नतिजाका लागि ट्राइब्रेकरको सहारा लिइएको थियो । विजयी टोलीको तर्फबाट टाइब्रेकरमा आद्मबोह सिसेको, अनिल गुरुङ, सुजल श्रेष्ठ र बालोफिनिगो मौसाले गोल गरेका थिए ।
आर्मीका तर्फबाट एकमात्र गोल जितेन्द्र कार्कीले गरेका थिए । हिरण्य मगर र सन्तोष तामाङको प्रहार आकासिएको थियो । उपाधिसँगै मनाङले नगद तीनलाख रुपियाँ र आर्मीले डेढ लाख रुपियाँ प्राप्त गर्‍यो ।
प्रतियोगितामा चार गोल गरेको मनाङका अफिल ओलावाले सर्वोत्कृष्ट खेलाडी घोषितहुँदै नगद ३० हजार रुपियाँ प्राप्त गरे ।
मनाङका किरण चेम्जोङ उत्कृष्ट गोलरक्षक, आर्मीका जितेन्द्र कार्की उत्कृष्ट डिफेन्डर, आर्मीका टंक बस्नेत उत्कृष्ट मिडफिल्डर, मनाङका अनिल गुरुङ उत्कृष्ट फरवार्ड र मनाङका छिरिङ लोप्साङ उत्कृष्ट प्रशिक्षक घोषित हुँदै नगद दशहजार रुपैयाँ प्राप्त गरेका थिए ।


फागुन  । नेपाली धावक उपेन्द्र सुनुवारले हङकङको सइकुङमा भएको ‘एमएसआई जी-फफ्टी अल्ट्रा म्याराथन’ को उपाधि जितेका छन् । उनले ५४ किलोमिटरको दुरी ५ घण्टा ४१ मिनेट २३ सेकेण्डमा पुरा गरे ।
प्रतियोगितामा दोस्रो भएका फ्रान्सका पेरी आन्द्रे फेरि नेपालका सुनुवार भन्दा १० सकेण्ड मात्र पछि परे । उनले ५ घण्टा ४१ मिनेट १३ सेकेण्डमा दौडको दुरी पार गरे ।
रोचक के छ भने, अल्ट्रा म्याराथनमा पहिलो, दोस्रो र तेस्रो हुनेहरु बीच ७० सेकेण्डको मात्रै फरक रह्यो । तेस्रो भएकी न्युजिल्याण्डकी म्याक नौघटनले ५ घण्टा ४२ मिलेट ३० सेकेण्डमा लक्ष्य भेट्टाइन् ।
दौडको दुरी पार हुने अन्तिम समयमा सँगसँगै रहँदा भएको तीव्र प्रतिस्पर्धाले उनीहरुको अनुहारमा पीडा महसुस भएको देखिएको अल्ट्रा म्याराथनका संयोजक माइकल म्याडेले बताए ।
उपाधि हात पार्न १० सकेण्डले चुकेका फ्रेन्च धावक आन्द्रे फेरिले भने-‘दौडको आधाआधीदेखि नै हामीसँगै थियौं । पेन्सुलामा आइपुग्दासम्म म अगाडी हुने स्थिति थियो । तर, अन्तिम समयमा मात्रै उनी अगाडी भए । यो निकै रोचक भयो ।’
‘ट्रायल रनिङ गाइड’का रुपमा काम गर्ने सुनुवार काठमाडौंबाट सय किलोमिटर बाहिर बस्ने गरेको एससीएमपी डटकमले जनाएको छ ।

फागुन ८ । इङ्गल्याण्ड दक्षिण अफ्रिकासँगको दुई ट्वेन्टी–ट्वेन्टी क्रिकेट श्रृंखलाको पहिलो खेलमा तीन विकेटले पराजित भएको छ ।
शुक्रबार राति केप टाउनमा भएको खेलमा घरेलु टोली दक्षिण अफ्रिकाले एक सय ३५ रनको लक्ष्य निर्धारित २० ओभरमा सात विकेट गुमाएर भेट्टायो ।
दक्षिणअफ्रिकाका लागि फाप डु प्लेसिसले २५, जेपी डुमिनीले २३ तथा हासिम अमलाले २२ रन बनाए । इंग्ल्याण्डका क्रिस जोर्डनले तीन तथा मोइन अलीले दुई विकेट लिए । यसअघि पहिले ब्याटिङ गरेको इंग्ल्याण्डले ८ विकेटको क्षतिमा एक सय ३४ रन बनाएको थियो ।
उसका लागि जोस बटलरले नटआउट ३२, एलेक्स हेल्सले २७ तथा ज्यासन रोय र क्रिस जोर्डनले समान १५ रन बनाए । दक्षिण अफ्रिकाका इमरान ताहिरले चार तथा कायल एबोटले दुई विकेट लिए । दोस्रो तथा अन्तिम ट्वेन्टी–ट्वेन्टी आइतबार हुने छ ।

फागुन ५ । नेपाली लेग स्पिनर सन्दीप लामिछाने अन्तर्राष्ट्रिय क्रिकेट परिषद (आइसीसी)ले छनोट गरेको उत्कृष्ट ११ युवा खेलाडीमा परेका छन् ।

बंगलादेशमा सम्पन्न आइसीसी यु–१९ विश्वकप क्रिकेटमा गरेको प्रदर्शनको आधारमा गरिएको छनोटमा सन्दीपले स्थान बनाएका हुन् ।

उनले बंगलादेशमा भएको प्रतियोगितामा ६ खेलमा १७ दशमलव शून्य सातकोऔसतमा १४ विकेट लिएका थिए ।

उनी सर्वाधिक विकेट लिनेमा नामिबियाका फ्रिट्ज कोइट्जी भन्दा १ विकेटले मात्र पछाडि थिए । सन्दीपले आयरल्यान्डसँगको खेलमा ५ विकेट लिने क्रममा ह्याट्रिक गरेका थिए ।

यु–१९ विश्वकपमा ह्याट्रिक गर्ने सन्दीप नेपालको पहिलो र विश्वका पाँचौं खेलाडी हुन् । सन्दीपको सो प्रदर्शनपछि नेपाल यु–१९ विश्वकपमा दोस्रोपटक दोस्रो चरण पुगेको थियो ।

आइसीसीकाअनुसार छानिएका ११ खेलाडीमा सन्दीपले स्पिन बलिङको नेतृत्व गर्नेछन् ।

‘फ्युचर स्टार–११’ नाम दिइएको उत्कृष्ट खेलाडीको सूचीमा आयरल्यान्डका रोरी एन्डर्स र सन्दीपमात्र एसोसिएट राष्ट्रबाट समेटिएका खेलाडी हुन् ।

११ जनाको सूचीमा सन्दीप र रोरीसहित विश्वकप विजेता वेस्ट इन्डिजका ४ तथा भारत, पाकिस्तान, श्रीलंका, इंगल्यान्ड र बंगलादेशका १–१ खेलाडी परेका छन् ।

फागुन ५  । दक्षिण एसियाली खेलकुद (साग)को १३औं संस्करण आफ्नै देशमा गर्ने गरी नेपालले भारतमा भएको १२औं साग सकाएको छ ।

नेपालले ३ स्वर्ण, २३ रजत र ३४ का कास्यसहित जम्मा ६० पदक बटुल्दै छैटौं स्थान हासिल गरेको छ । नेपालले फुटबल, जुडो र उसुबाट एक–एक स्वर्ण जितेको हो ।

भारत एक सय ८८ स्वर्णसहित शीर्ष स्थानमा रहँदा २५ स्वर्णकोश्रीलंका दोस्रो तथा १२ स्वर्णको पाकिस्तान तेस्रो स्थानमा रह्यो ।

त्यस्तै, ७ स्वर्णको अफगानिस्तान चौथो तथा ४ स्वर्णको बंगलादेश पाँचौं स्थानमा रह्यो । दुई रजतको माल्दिभ्स सातौं स्थानमा रहँदा एक रजतसहित भुटान पुछारमा रह्यो ।

फागुन ४ । १२औं दक्षिण एसियाली खेलकुद (साग)को अन्तिम दिन जुडोबाट नेपालले थप तीन कास्य पदक जितेको छ ।

महिला र पुरुष गरी ४ स्वर्ण पदकका लागि भएको खेलमा भारत र पाकिस्तानले समान २–२ स्वर्ण पदक प्राप्त गरे ।

मंगलबार सिलोङको पोलो ग्राउन्डस्थित कभर्डहलमा ‘राउन्ड रोबिन लिग’को आधारमा खेलाइएको प्रतियोगिताको महिला७० केजीमुनि गंगा चौधरी कास्य पदकमा नै सीमित भइन् ।

अन्तिम क्षणमा आफूलाई सम्हाल्न नसक्दा उनी कास्यमा सीमित भएकी थिइन् । सो स्पर्धामा भारतकी पूजाले स्वर्ण, पाकिस्तानकी बेनिस खानले रजत र बंगालादेशकी जयाराथेंले कास्य जिते ।

यस्तै, महिलाको ७८ केजीमुनिको तौलमा पुनम श्रेष्ठले पनि आफूलाई कास्यभन्दा माथि लैजान सकिनन् । सो तौलमा पाकिस्तानकी मुमताज फौजीले स्वर्ण पदक जितिन् ।

भारतकी अरुनाले रजत र श्रीलङककी डब्लुजीएलडी जयवर्दनेले कास्य पाइन् ।

पुरुषतर्फको १०० केजीमुनिको तौलमा शिवबहादुर बरामले कास्य पदक पाए । सो स्पर्धामा पाकिस्तानले स्वर्ण, भारतले रजत र अफगानिस्तानले कास्य पाए ।

यससँगै जुडोबाट नेपालले १ स्वर्ण, २ रजत र ६ कास्य पदक प्राप्त गर्‍यो । 

फागुन ४ । नेपालले दक्षिण एसियाली खेलकुद (साग) फुटबलमा २३ वर्षपछि स्वर्ण पदक जितेको छ । १२ औं सागको हिजो भएको फाइनलमा भारतलाई उसकै घरेलु मैदानमा २–१ ले हराउँदै नेपालले स्वर्ण पदक जितेको हो ।
नेपालले एक महिनाभित्र फुटबलमा जितेको यो दोस्रो उपाधि हो । नेपालले गत जनवरी २२ मा ढाकामा भएको फाइनलमा बहराइनलाई३–० ले हराएर राष्ट्रिय बंगबन्धु गोल्डकप च्याम्पियन भएको थियो ।
भारतको गुवाहाटीस्थित इन्दिरा गान्धी अन्तर्राष्ट्रिय स्टेडियममा हिजो भएको फाइनलको ३१ औं मिनेटमै गोल बेहोरेको नेपालले दोस्रो हाफमा संयमित र आक्रामक खेल प्रस्तुत गर्दै जित हात पारेको हो ।
दोस्रो हाफमा सब्स्टिच्युट खेलाडी प्रकाश बुढाथोकीले फ्रिकिकमा लोभलाग्दो गोल गर्दै ६६ औं मिनेटमा नेपाललाई १–१ को बराबरीमा पुर्‍याएका थिए । दोस्रो गोलमा पनि प्रकाशकै योगदान रह्यो । उनले क्रस गरेको बललाई नवयुग श्रेष्ठले वान टच फिनिसिङ गर्दै ७० औं मिनेटमा उत्कृष्ट गोल गरे । उनको १२ औं सागमा यो सातौं गोल हो । यसअघि उनले पहिलो खेलमा भुटानमाथि ५–० र सेमिफाइनलमा माल्दिभ्सविरुद्ध ४–३ को जितमा ह्याट्रिक गरेका थिए ।
उपाधि जितेपछि नेपालका प्रशिक्षक राजु शाक्यले नेपाली फुटबलको विजयी शुरुआत भएको प्रतिक्रिया दिए । उनले नेपाली फुटबल अझै धेरै माथि जानेसमेत बताए । कप्तान विराज महर्जनले आफूहरुको मेहनतले राम्रो प्रतिफल दिएको प्रतिक्रिया दिए । प्रतियोगिताका सर्वाधिक गोलकर्ता नवयुग श्रेष्ठले पनि सफलतामा निकै खुसी भएको बताए ।
यसैबीच प्रधानमन्त्री केपी शर्मा ओलीले साग खेलकुदको फुटबलमा उपाधि जितेकोमा नेपाली राष्ट्रिय टिमलाई बधाई दिएका छन् । उनले नेपाली खेलाडीको यो विजय खेल इतिहासमा अनन्तकालसम्म स्मरणीय रहने उल्लेख गर्दै सरकारले खेलाडीको सम्मानमा कुनै कमी आउन नदिने प्रतिबद्धता जनाएका छन् ।

फाल्गुन ३।  नेपालले आज चीर प्रतिद्वन्दी भारतको सामना गर्दै छ ।  भारतमै जारी रहेको दक्षिण एसियाली खेलकुद अन्तर्गत  फुटबल टिमले आज भारतसँग फाइनल खेल खेल्न लागेको हो ।
१७ वर्षपछि साग समिकरणको फाइनमा पुगेको नेपाल आज भारतलाई उसकै भूमीमा पराजित गर्न चाहन्छ ।
सेमिफाइनल भिडन्तमा माल्दिभ्सलाई अन्तर्राष्ट्रिय स्तरको खेल प्रदर्शन गर्दै पराजित गरेको नेपाल उच्च मनोबलमा रहेको छ । नेपाली टिमका प्रशिक्षक राजुकाजी शाक्यले भारतलाई उसकै भूमिमा हराएर च्याम्पियन बन्ने इच्छा रहेको भन्दै त्यो अवसर अहिले पाएको बताए । उनले भारत दक्षिण एसियाकै राम्रो टिम भएको र ‘होम ग्राउन्ड एडभान्टेज’ रहेको भएपनि खेलमा केहि भन्न नसकिने तर्क गरेका छन् ।
नेपालले यसअघि सन् १९८४ र १९९३ मा उपाधि जितेको थियो । खेल आज साझ सवा ७ बजे भारतको गुवाहटीस्थित इन्दिरा गान्धी स्टेडियममा खेलिने छ ।

फागुन ३। फागुन ८ गतेदेखि धरानमा हुने १८औं अन्तर्राष्ट्रिय बुढासुब्बा रेडबुल फुटवल प्रतियोगिता एक हप्ता पछाडी सरेको छ । आयोजक धरान फुटवल क्लवले पत्रकार सम्मेलन गरी प्रतियोगिता फागुन १५ देखि २२ गतेसम्म गरिने जानकारी दिएको हो ।
क्लवका अध्यक्ष किशोर राईले अखिल नेपाल फुटवल संघको असहयोगले प्रतियोगिता सार्नुपरेकोगुनासो गरे । माघ २८ गतेदेखि गर्ने भनिएको विराट गोल्ड कप फागुन ५ गते सारेका कारण बुढासुब्बा गोल्डकप सार्नु परेको पत्रकार सम्मेलनमा बताइयो ।
एन्फाले सार्वजनिक गरेको तालिका अनुसार आफुखुशी प्रतियोगिता सार्दासमेत कार्वाही नभएकोमा राईको असन्तुष्टि थियो । भारतीय दुई टीमसहित आठ टिमले सहभागिता जनाउने प्रतियोगितामा मनाङ मर्स्याङ्दी, त्रिभुवन आर्मी, सशस्त्रको एपिएफ क्लव, रुपन्देही ११, कास्की ११, आयोजक धरान फुटवल क्लव सहभागि हुनेछन् ।
भारतका दुई क्लवमा भने दुर्गापुर फुटवल क्लव र शियर क्लव सहभागि हुनेछन् । विजेताले ४ लाख र उपविजेताले २ लाख नगद पाउने छन् ।

फागुन ३  । वेस्ट इन्डिजले पहिलो पटक ‘यु–१९ विश्वकप क्रिकेट’ को उपाधि हासिल गरेको छ । फाइनलमा भारतलाई पराजित गर्दै वेस्ट इन्डिजले उपाधि हासिल गरेको हो ।
आइतबार भएको फाइनलमा टस जितेर पहिलो क्षेत्ररक्षण रोजेको वेस्ट इन्डिजले भारतलाई ४५ ओभर एक बलमै ‘अल आउट’ गर्दै १४५ रनमा सीमित गर्‍यो।
भारतका लागि सरफराज खानले अर्द्धशतकीय पारी खेल्दै सर्वाधिक ५१ रन बनाएका थिए । त्यस अतिरिक्त राहुल बाथमले २१ र महिपाल लोमरोरले १९ रन बनाए पनि अन्य कुनै ब्याट्सम्यानले दोहोरो अंकमा रन बनाउन सकेनन् । बरु भारतले अतिरिक्त रनका रुपमा वेस्ट इन्डिजबाट २३ रन पाएको थियो ।
भारतलाई सस्तैमा समेट्ने क्रममा वेस्ट इन्डिजका लागि अल्जारी जोसेफ र रियान जोनले तीन–तीन विकेट लिए । त्यसैगरी किमो पाउलले दुई, चिमार होल्डर र शमार स्प्रिङ्गरले एक–एक विकेट लिए ।
१४६ रनको लक्ष्यसहित जवाफी ब्याटिङमा उत्रिएका वेस्ट इन्डिजले पाँच विकेटको क्षतिमा ४९ ओभर तीन बलमा लक्ष्य पुरा गरेको हो । उसका लागि किसी कार्टीले ५२ र किमो पाउलले ४० रन बनाए । दुबै ब्याट्सम्यान अविजित रहे । त्यस्तै शिमरोन हेटमेयरले २३ र टेभिन इमलाचले १५ रन बनाएका थिए ।

फागुन २ । नेपाल १७ वर्षपछि दक्षिण एसियाली खेलकुद सागअन्तर्गतको फुटबलमा फाइनलमा प्रवेश गरेको छ ।
शनिबार भएको नाटकीय सेमिफाइनलमा नेपालले माल्दिभ्सलाई ४–३ ले पराजित गर्दै उपाधि नजिक पुगेको हो । नेपालले सोमबार हुने फाइनलमा आयोजक भारतको सामना गर्ने छ ।
अतिरिक्त समयकोअन्तिम २ मिनेटमा नवयुग श्रेष्ठले ह्याट्रिक गर्दै नेपाललाई अविश्वसनीय जित दिलाएका हुन् । नेपालले पहिलो हाफमै लिएको २ गोलको अग्रता जोगाउन नसक्दा खेल अतिरिक्त समयमा पुगेको थियो ।
भारत गुवाहाटीको इन्दिरा गान्धी रंगशालामा अञ्जन विष्टले १५ औं र नवयुग श्रेष्ठले ३६ औं मिनेटमा गरेको गोलमा नेपालले मध्यान्तरसम्म २–० को अग्रता लिएको थियो ।
मोहम्मद हामजाको गोलमा माल्दिभ्स ५२ औं मिनेटमा खेलमा फर्किएको थियो । अहमद नासिदले ८६ औं मिनेटमा गोल गरी निर्धारित समयको खेल २–२ को बराबरीमा टुंग्याए । थप ३० मिनेटको खेलको २५ औं मिनेटमा माल्दिभ्सले गोल गरेपछि नेपालको हातबाट खेल उम्किएको थियो ।
तर नवयुगले १ सय १८ र १ सय २० औं मिनेटमा गोल गर्दै नेपाललाई नाटकीय जित दिलाए । १२ औं सागमा नवयुगको यो दोस्रो ह्याट्रिक हो । उनले भुटानसँगको पहिलो खेलमा पनि ३ गोल गरेका थिए
नेपाल पछिल्लो पटक सन् १९९९ मा काठमाडौंमै भएको सागको फाइनलमा पुगेको थियो । भारतले शनिबार नै भएको पहिलो सेमिफाइनलमा बंगलादेशलाई ३–० ले पराजित गर्‍यो ।
फुटबलकै महिलातर्फ नेपाल यसअघि नै फाइनल पुगिसकेको छ । नेपालले हिजो भएको राउन्ड रोविनको अन्तिम खेलमा श्रीलंकालाई ४–० ले पराजित गर्‍+यो । महिला फुटबलको उपाधिका लागि नेपालले भारतको सामना गर्ने छ ।

फागुन २ । भारतमा जारी १२औं दक्षिण एसियाली खेलकुद (साग)अन्तर्गत् महिला फुटबलमा नेपालले श्रीलंकामाथि ४–० को जित हासिल गरेको छ ।

शनिबार भएको समूह चरणको अन्तिम खेलमा श्रीलंकामाथि जित हासिल गर्नेक्रममा साबित्रा भण्डारीले दुई तथा सपना लामाले एक गोल गरिन् ।

एक गोल भने नेपालले श्रीलंकाली खेलाडीको आत्मघाती गोलले उपहारस्वरुपपाएको थियो ।

पाँच राष्ट्र सहभागी महिला फुटबल ‘राउन्ड रोबिन लिग’को आधारमा सन्चालन गरिएको छ । १० अंक जोडेको नेपाल अंक तालिकाको शीर्ष स्थानमा छ ।

अब स्वर्ण पदकका लागि नेपालले भारतसँग खेल्नेछ । भारतले समूहको अन्तिम खेलमा शनिबार बंगलादेशलाई ५–१ ले हरायो ।

समूह चरणको खेलमा नेपालले भारतसँग बराबरी खेलेकाले पनि फाइनल भिडन्त रोमान्चक हुने अपेक्षा गरिएको छ । महिला फुटबलमा बंगलादेश तेस्रो स्थानमा रहँदै कास्य जितेको छ । 

माघ २९।  वेष्ट इण्डिज यू-१९ विश्वकप क्रिकेटको फाइनलमा पुगेको छ । अब उपाधिका लागि भारतसँग खेल्नेछ ।
बिहीबार भएको दोस्रो सेमिफाइनलमा वेष्टइण्डिजले घरेलु टोली बंगलादेशलाई ३ विकेटले पराजित गरेको छ ।
मीरपुरमा पहिले ब्याटिङ गरेको बंगलादेशले निर्धारित ५० ओभरमा सबै विकेट गुमाएर २२६ रन बनायो । उसका लागि मेहदी हसन मिराजले ६० रन जोडे ।
जवाफमा मैदान उत्रिएको वेष्टइण्डिजले अन्तिम ८ बल खेल्नु अघि ७ विकेट गुमाएर लक्ष्य भेट्टायो । उसका लागि शमर स्पिङगरले ६२ रन बनाए भने सिम्रन हेटमायरले ६० रन जोडे ।
भारत यसअघि नै श्रीलंकालाई हराएर उपाधि नजिक पुगिसकेको छ । फाइनल खेल आइतबार हुनेछ ।

माघ २८ । १२ औं सागको पुरुष फुटबलअन्तर्गत नेपालले आज बंगलादेशसँग खेल्दैछ । नेपाल र बंगलादेशबीचको खेल भारतको गुवाहाटीमा दिउँसो सवा दुई बजेपछि हुनेछ ।
समूहको एक खेलअघि नै सेमिफाइनलमा स्थान बनाएको नेपाल यस खेलमा विजयी भए वा बराबरी गर्न सके समूह ‘बी’ को विजेता बन्ने छ । सहभागी ६ टोलीलाई दुई समूहमाविभाजन गरिएकोमा नेपाल बंगलादेश र भुटानसहित समूह ‘बी’ मा छ ।
समूह ‘ए’ मा भारत, माल्दिभ्स र श्रीलंका छन् । नेपालले यसअघि भएको खेलमा भुटानलाई ५–० ले हराएको थियो । समूह ‘ए’ बाट माल्दिभ्स समूह विजेता तथा भारत उपविजेताको रुपमा सेमिफाइनलमा प्रवेश गरेको छ ।


माघ २७ । भारतमा जारी १२औं दक्षिण एसियाली खेलकुद (साग)मा नेपालले बुधबारसम्म एक स्वर्ण पदक र १२ रजत पदकसहित ३२ पदक जितेको छ ।

उसु खेलाडीहरु हरिप्रसाद गोले, सविता राई, झरना गुरुङ, जुनी राई, विन्दु पुन मगर र राजेश चौधरीले रजत पदक जितेका छन् ।

त्यस्तै, एथ्लेटिक्स खेलाडी केसरी चौधरीले कास्य पदक जितेकी छन् । महिलातर्फको ट्रिपलजम्मा उनले कास्य जितेकी हुन् ।

नीमा घर्ती पुनको एकमात्र स्वर्ण पदकको मद्दतले नेपालले १२ रजत र १९ कास्यसहित पदकको संख्या ३२ पुर्‍याएको हो ।

उसुमा नेपालले कुल १ स्वर्ण, १० रजत र १ कास्य पदक जित्दै साग यात्रा टुंगाएको छ ।

ब्याडमिन्टन खेलाडी नङ्सल तामाङले महिला एकलमा कास्य जितेकी छन् । उनी सेमिफाइनलमा बुधबार भारतीय खेलाडीसँग पराजित भइन् ।
त्यस्तै, स्क्वासको महिला टिम इभेन्टमा नेपालले बुधबार कास्य जितेको छ । चार राष्ट्रले सहभागिता जनाएको महिला टिभ इभेन्टमा नेपालले कुनैपनि राष्ट्रसँग जित हात पार्न सकेन ।दुई टिमलाई कास्य दिने प्रावधान भएकाले नेपालले कास्य पदक पाएको हो ।

माघ २७ । नयाँ पत्रिकाले भूकम्पपीडितको सहयोगार्थ आयोजना गरेको शीर्ष नेता भर्सेस कलाकारको फुटबलको प्रमुख आकर्षण थिए, तत्कालीन प्रधानमन्त्री सुशील कोइराला ।
नेताको टोलीको कप्तानी गरेका कोइराला ११ नम्बरको जर्सीमा मैदानमा उत्रिएका थिए । सबैभन्दा वृद्ध खेलाडी भएकाले उनलाई युवा नेताहरूले केही समयपछि आग्रह गरे,‘प्रधानमन्त्रीज्यू, रिप्लेस गरौँ, तपाईं थाक्नुहुन्छ ।’
सायद यो आग्रहले कोइरालालाई छोएन, उनी मैदानबाट बाहिरिन चाहेनन् । कोच, अन्य खेलाडीको अनुरोधलाई उनले जवाफ दिए, ‘अब एकैछिन ।’ मैदानमा जगिङ गर्दै प्रवेश गरेका कोइराला लगातार २५ मिनेट मैदानमा टिकिरहे । त्यसबीचमा उनले हेड गर्ने प्रयास गरे, ड्रिब्लिङ प्रयास गरे र पास पनि दिए ।
कोइरालाले खेल अवधिमा १० पटक ‘पावरफुल सट’ हान्ने प्रयास पनि गरे । टसपछि कोइरालाले बल पास गरे । तर, धेरै टाढा पुगेन । पुनः प्रहार गर्न बलतर्फ बढ्दै गर्दा विपक्षी कलाकारको टोलीले बल नियन्त्रणमा लियो । तैपनि कोइराला पछाडि फर्केनन्, बलतिरै दौडिइरहे । कलाकार खेलाडीले ‘मिस पास’ गर्दा कोइराला किक हान्न पनि सफल भए ।
खेल सुरु भएको १० मिनेटपछि कोइरालासँगै मैदान प्रवेश गरेका अन्य नेता मैदानबाट बाहिरिए । दर्शकको अनुमान थियो– कोइराला पनि अब बाहिरिन्छन् ।
उल्टो कोइराला स्ट्राकरको भूमिकामा देखिए । लगत्तै मैदानको केन्द्रबाट नजिक पुगेको बललाई कोइरालाले अघि बढेर बल नियन्त्रणमा लिँदै विपक्षीको गोलपोस्टतर्फ अघि बढाउने प्रयास पनि गरे ।
कोइराला थाकेको हुनसक्ने भन्दै दोस्रोपटक रिप्लेस गर्न अघि सरेका एमाले सचिव योगेश भट्टराई पनि निराश भएर फर्किन बाध्य भए । केही बेरपछि बल ‘डी’ एरिया आसपास आयो ।
कोइराला अघि बढे, तर बल नियन्त्रणमा लिन सकेनन् । कोच हरि खड्काले कोइराला थाकेको भन्दै रिप्लेसका लागि एमाले सचिव योगेश भट्टराईलाई फेरि मैदानमा पठाए, त्यसपछि मात्र कोइराला मैदानबाट बाहिरिए । मैदानबाहिर आउँदा कोइरालाको अनुहारमा चमक देखिन्थ्यो– अझै खेल्न तयार भएजस्तै । 

२६ । भारतमा जारी १२औं दक्षिण एसियाली खेलकुद (साग)मा नेपाली पुरुष फुटबल टिम सेमिफाइनलमा पुगेको छ ।

मंगलबार भएको समूह चरणको खेलमा भुटान र बंगलादेशले १–१ गोलको बराबरी खेलेसँगै नेपाल बिहीबार बंगलादेशसँग खेल्नुअघि नै सेमिफाइनलमा पुगेको हो ।

नेपालले पहिलो खेलमा भुटानलाई नवयुग श्रेष्ठको ह्याट्रिकसहित ५–० लेहराएको थियो । 

माघ २६ । भारतमा जारी १२औं दक्षिण एसियाली खेलकुद (साग)मा नेपालको पदकको संख्या २० पुगेको छ ।

१३ वर्षीया पौडी खेलाडी गौरिका सिंहले जारी १२औं सागमा मंगलबार तेस्रो कास्य पदक जितेसँगै नेपालको पदकको संख्या २० पुगेको हो ।

सोफिया शाहको राष्ट्रिय कीर्तिमान भंग गर्दै गौरिकाले चार सय मिटर फ्रिस्टाइल पाँच मिनेट ९७ दशमलव नौ एक सेकेन्डमापूरा गरिन् ।

गौरिकाले यसअघि १ सय र दुई सय मिटर ब्याकस्ट्रोकमा पनि राष्ट्रिय कीर्तिमानसहित कास्य जितेकी थिइन् ।

त्यस्तै, नेपालको पुरुष र महिला दुबै खोखो टिमले मंगलबार कास्य पदक जितेको छ ।

मंगलबारै प्रेमप्रसाद पुनले आर्चरीमा कास्य पदक जितेका छन् ।

आर्चरीमा यसअघि नेपालले समूहबाहेक व्यक्तिगत पदक जितेको थिएन । तेस्रो स्थानको लागि भएको खेलमा उनले श्रीलंकाका खेलाडीलाई ३–० ले पराजित गरेका हुन् ।

त्यस्तै, मंगलबारै उसुमा विश्व बुढा मगरले रजत जितेका छन् । योसँगै उसुमा नेपालले १ स्वर्ण र ४ रजत गरी ५ पदक जितेको छ ।

मंगलबारै भारोत्तोलनकी तारादेवी पुनले कास्य जितेकी छन् । तारादेवीले भारोत्तोलनको ७५ केजी तौल समूहमा कास्य जितेकी हुन् ।

माघ २५ । भारतमा जारी १२औं दक्षिण एसियाली खेलकुद (साग)मा नेपालले सोमबार अर्को पदक पाउन सफल भएको छ ।

पौडीतर्फको १०० मि ब्याकस्ट्रोकमा गौरिका सिंहले एक मिनेट सात सेकेन्ड र ३१ मिलीसेकेन्डको दूरी पार गर्दै कास्य पदक नेपाललाई दिलाएकी हुन् ।

उनले महिलातर्फको पौडीमा आइतबार पनि २०० मि ब्याकस्ट्रोकमा नेपाललाई कास्य पदकदिलाएकी थिइन् ।

यो पदकसँगै नेपालले एक स्वर्ण, चार रजत र सात कास्यसहित १२ पदक पाएको छ । रासस

माघ २५ । भारतको सिलोंगमा जारी १२औं दक्षिण एसियाली खेलकुद (साग)अन्तर्गत् सोमबार नेपालले पहिलो स्वर्ण पदक जितेको छ ।

प्रतियोगिता सुरु भएको चौथो दिनमा नेपालले स्वर्ण पदक जितेको हो । उसुतर्फको नान्ताओउतर्फ निमा घर्तिमगरले नेपाललाई स्वर्ण पदक दिलाएकी हुन् । आइतबार भएको पहिलो चरणमा उनले ८.४५ र सोमबार भएको दोस्रो चरणमा८.४६ गरी कुल १६.९१ अंकसहित स्वर्ण जितेकी हुन् । रुकुम घर भएकी १६ वर्षीया निमा ललितपुरको ग्वार्कोमा बस्छिन् । उनी डनबस्को बोर्डिङ स्कुलमा कक्षा १० मा अध्ययनरत छिन् । उनको यो पहिलो अन्तर्राष्ट्रिय सहभागिता हो ।
स्वर्ण जितेकी उनले देशका लागि पहिलो स्वर्ण पदक दिलाउन सकेकामा आफूलाई एकदमै गर्व लागेको बताइन् ।
यस्तै, उसुको नानकुनतर्फ पनि सोमबार नेपालले एक रजत पदक प्राप्त गरेको छ ।
सोमबार भएको प्रतिस्पर्धामा नेपालका युवराज थापाले रजत पदक जितेका हुन् । उनले पहिलो चरणमा ८.८८ र सोमबार भएको दोस्रो चरणमा ९.२१ गरी कुल १८.१३ अंकसहित रजत पदक दिलाएका हुन् ।

सोमबारको प्रतिस्पर्धामा सबैभन्दा धेरै अंक प्राप्त गरे पनि आइतबारको प्रतिस्पर्धामा केही अंक कम भएकाले रजतमा चित्त बुझाउनुपरेको हो । उनको भन्दा ०.७ अंकले अघि रहेको भारतले स्वर्ण पदक जित्यो ।

यी पदकसँगै नेपालको पदक संख्या ११ पुगेको छ । जसमा १ स्वर्ण, ४ रजत र ६ कास्य छन् । रासस 



माघ २५ । इंङ्गलिस प्रिमियर लिग फुटबल अन्तर्गत आइतबार राति भएको खेलमा आर्सनल विजयी हुँदा चेल्सी र म्यान्चेस्टर युनाईटेडले एक एक गोलको बराबरी खेलेका छन् ।
उपाधि दावेदारी बलियो पार्नेक्रममा आर्सनलले बर्नमाउथलाई २-० ले हरायो । खेलमा आर्सनललाई विजयी गराउन मेसुत ओजील र अलेक्स अक्सलेड चेम्बरलीनले एक एक गोल गरे।
जितसँगै आर्सनल अंक तालिकाको तेस्रो स्थानका उक्लिएको छ । २५ खेलबाट आर्सनलको ४८ अंक छ । समान ४८ अंक जोडेको टोटनह्याम हट्सपर गोल अन्तरको आधारमा दोस्रो स्थानमा छ भने ५३ अंक जोडेको लेष्टर सिटी शिर्ष स्थानमा रहेका छ ।
प्रिमियर लिग अन्तर्गत आइतबार राती भएको अर्को खेलमा चेल्सी र म्यान्चेस्टर युनाईटेडले १-१ गोलको बराबरी खेलेका छन् । चेल्सीको मैदानमा भएको खेलमा म्यान्चेस्टर युनाईटेडका जेस्सी लिङ्गार्डले पहिलो गोल गरे ।
तर इन्जुरी समयमा चेल्सीका डिएगो कोष्टाले एक गोल फर्काएपछि खेल बराबरीमा सकिएको हो । यो बरारबीसँगै चेल्सीले अन्तरीम प्रशिक्षक गुस हिडिंकको नेतृत्वमा अपराजित यात्रालाई कायम राखेको छ ।

माघ २५  । भारतमा जारी १२ औं दक्षिण एसियाली खेलकुद सागमा नेपालले हालसम्म ३ रजत र ६ कास्यसहित कुल ९ पदक जितेको छ । नेपालका लागि पौडीमा १३ बर्षीया गौरिका सिंहले कास्यपदक जितेकी छिन् ।
गौरिकाले यो ऐतिहासिक पदक २ सय मिटर ब्याकस्ट्रोकमा जितेकी हुन् । उनले २ मिनेट २६.९३ सेकेन्डको राष्ट्रिय कीर्तिमानसहित कास्यजितेकी हुन् ।
यता, उसुको छानछुवाङबाट विजय सिञ्जाली र सुस्मिता तामाङले रजत जिते । त्यस्तै भारोत्तोलनकी जुनुमाया छन्त्यालले कास्य जितेकी छिन् ।
कुस्तीको पुरुष ६१ केजीमा रामबहादुर यादवले कास्य जिते । त्यस्तै टेनिसको पुरुष टिम स्पर्धामा पनि नेपालले कास्य जितेको छ । नेपाल सेमिफाइनलमा श्रीलंकासँग पराजित भएको हो ।
यसअघि भारोत्तोलनबाट विकास थापाले रजत, भारोत्तोलनमै देवीकुमारी चौधरीले कास्य र कुस्तीमा सरोज यादवले कास्यपदक जितेका हुन् ।
१२ औं सागमा हालसम्म २७ स्वर्णपदकसहित ४२ पदक जितेको भारत शीर्ष स्थानमा छ । ८ स्वर्णसहित श्रीलंका दोस्रो स्थानमा रहँदा समान दुई स्वर्णसहित पाकिस्तान तेस्रो तथा बंगलादेश चौथो स्थानमा छ । नेपाल पाँचौं स्थानमा रहँदा एक रजतसहित अफगानिस्तान छैटौं स्थानमा छ । भुटान र माल्दिभ्सले भने पदकको खाता खोल्न सकेका छैनन् ।

माघ २३ । इलाममा सम्पन्न माइभ्याली गोल्डकप फुटबल प्रतियोगिताको उपाधि झापा–११ ले जितेको छ ।

शनिबार भएको फाइनलमा सशस्त्र प्रहरीको टिमलाई २–० ले पराजित गर्दै झापाले उपाधि जितेको हो । झापालाई जिताउनेक्रममा विशाल राई र योगेश गुरुङले एक–एक गोल गरे ।

खेलको २६औं मिनेटमा झापाका कर्ण लिम्बूको पासमा विशाल राईले गोलगर्दै टोलीलाई अग्रता दिलाएका थिए । ७५औं मिनेटमा योगेश गुरुङले अर्को गोल थपेका हुन् ।

उपाधिसँगै झापाले तीन लाख ५० हजार रुपैयाँ हात पारेको छ । त्यस्तै, उपविजेता सशस्त्रले एक लाख ७५ हजार रुपैयाँ जितेको छ ।

सेमिफाइनलमा झापाले रुपन्देही–११ लाई तथा सशस्त्रले अर्को विभागीय टोली त्रिभुवन आर्मीलाई हराएको थियो । 

माघ २३ । भारोत्तोलनका विकास थापाले १२औं दक्षिण एसियाली खेलकुद (साग)मा पहिलो रजत पदक जितेका छन् ।

शनिबार गुवाहटीमा भएको अन्तिम स्पर्धामा ६३ केजी तौल समूहका विकासले रजत जितेका हुन् ।

कूल २४२ केजी भारबहन गरेका विकासले स्न्याचमा ११२ र क्लिन एन्ड जर्कमा १३० केजी तौल उठाए ।

पहिलो अन्तर्राष्ट्रिय पदक जितेका विकासकोस्न्याचतर्फ राष्ट्रिय कीर्तिमान हो । यसअघि, सो कीर्तिमान ११० केजीको थियो ।

भारोत्तोलनमै शनिबार देवीकुमारी चौधरीले कास्य पदक जितेकी छन् ।

१२औं सागमा नेपाललाई पहिलो पदक दिलाउनेक्रममा देवीले ५३ केजी स्पर्धामा कास्य पदक जितेकी हुन् ।

३१ वर्षीया देवीले स्न्याचमा ५४ तथा क्लिन एन्ड जर्कमा ७५ गरी कुल १२९ केजी भार उचालिन् ।

पाँच खेलाडी सहभागी यो स्पर्धामा देवीले पाकिस्तानी र बंगलादेशी खेलाडीलाई पछाडि पारेकी हुन् ।

यो स्पर्धामा भारतले स्वर्ण र श्रीलंकाले रजत जितेको छ । सागमा महिला भारोत्तोलन पहिलो पटक समावेश गरिएको हो ।

यता, कुस्तीमा सरोज यादवले कास्यपदक जितेका छन् ।

शनिबारै पौडीमा सोफिया शाह र गौरिका सिंहले राष्ट्रिय कीर्तिमान रचे । दुबैले हिट्समा कीर्तिमान रच्दै फाइनल चरणमा ठाउँ बनाएका थिए ।

सोफियाले २ सय मिटर फ्रिस्टाइलमा १ मिनेट १३ दशमलव एक आठ सेकेन्डसहित गौरिकाले बनाएको कीर्तिमान तोडेकी हुन् ।

१३ वर्षीया गौरिकाले १ सय मिटर बटरफ्लाईमा आफ्नै कीर्तिमानमा सुधार गरिन् । उनले १ मिनेट १० दशमलव नौ चार सेकेन्डको समय निकालिन् । 

शनिबार पुरुषतर्फ शिरिष गुरुङ २ सय मिटर फ्रिस्टाइलमा २ मिनेट नौ दशमलव नौ दुई सेकेन्डको समयका साथ फाइनल चरणमा पुगे ।

कूल ३८ स्वर्णपदक रहेको पौडीमा गौरिकाले १३, शिरिषले १२ र सोफियाले ८ स्पर्धामा प्रतिस्पर्धा गर्दैछन् । 

माघ २३  । दक्षिण एसियाली खेलकुद (साग)को १२ औं संस्करण शुक्रबारदेखि भारतमा सुरु भएको छ ।

शुक्रबार भएको महिलातर्फको फुटबल खेलमा नेपालले बंगलादेशलाई ३–० ले हराएको छ ।

नेपालका लागि दीपा अधिकारी, अनु लामा र निरु थापाले एक–एक गोल गरे । नेपाल साग फुटबलको उपविजेता हो ।

अब समूहको दोस्रो खेलमा नेपालले आइतबारमाल्दिभ्ससँग खेल्ने कार्यक्रम छ ।

प्रतियोगिताको पहिलो दिन भलिबल र आर्चरीसमेत सुरु भएको छ ।

माघ २२ । नेपाल यु–१९ विश्वकप क्रिकेट प्रतियोगिताको क्वार्टरफाइनलबाटै बाहिरिएको छ ।

शुक्रबार बंगलादेशको मिरपुरमा भएको क्वार्टरफाइनलमा आयोजक राष्ट्र बंगलादेशसँग ६ विकेटले पराजित हुँदै नेपाल बाहिरिएको हो ।

खेलमा टस जितेर पहिले ब्याटिङ गरेको नेपालले निर्धारित ५० ओभरमा ९ विकेट गुमाउँदै२ सय ११ रन जोडेको थियो ।

कप्तान राजु रिजालले ८० बलमा सर्वाधिक ७२ रनको योगदान दिए भने सुनील धमलाले २५, दीपेन्द्रसिंह ऐरी र प्रेम तामाङले समान २२ तथा आरिफ शेखले २१ रन जोडे ।

जवाफमा बंगलादेशले १० बल खेल्न बाँकी छँदै ४ विकेटको क्षतिमा विजय हासिल गर्‍यो ।

९८ रन जोड्दा ४ विकेट गुमाइसकेको बंगलादेशका लागि जाकिर हुसेन र मेहन्दी हसन मिराजबीच पाँचौं विकेटका लागि अविजित १ सय १७ रनको साझेदारी भएसँगै विजय हासिल गरेको हो ।

पहिलोपटक कुनैपनि विश्वकपको सेमिफाइनलमा पुगेको बंगलादेशका लागि हुसेनले ७५ तथा मिराजले ५५ रन जोडे ।

कमजोर बलिङ गरेको नेपालका लागि सुनील धमलाले २ तथा सन्दीप लामिछानेले १ विकेट लिए भने एक खेलाडी रन आउट भएका थिए ।

प्रतियोगिताको समूह चरणमा न्यूजिल्यान्ड र आयरल्यान्डमाथि जित हासिल गरेको नेपाल भारतसँग पराजित भएको थियो ।

यसअघि, सन् २००० मा पहिलोपटक यु–१९ विश्वकपमा सहभागी हुँदा नै दोस्रोचरण पुगेको नेपाल त्यसपछि यसपटकमात्र क्वार्टरफाइनलमा पुगेको हो । 

माघ २२ । आईसीसी यु–१९ विश्वकप क्रिकेटको क्वाटरफाइनलमा आज नेपालले आयोजक बंगलादेशको सामना गर्दैछ । समुह ‘ए’ को विजेता बंगलादेश र समुह ‘डी’ को उपविजेता नेपालबीचको क्वार्टरफाइनल खेल नेपाली समय अनुसार बिहान पौने ९ बजेदेखि सुरु हुने छ ।
प्रतियोगिताको समुह चरणमा न्युजिल्याण्ड र आयरल्याण्डमाथिजित हासिल गरेको नेपाल भारतसँग भने पराजित भएको थियो । बंगलादेशले भने समुहमा दक्षिण अफ्रिका, नामिबिया र स्कटल्याण्डलाई पराजित गर्दै शतप्रतिशत नतिजा निकालेको थियो ।
टेष्ट मान्यता प्राप्त राष्ट्र बंगलादेश पछिल्लो समय क्रिकेटमा बलियो बन्दै गएको छ । आज पनि घरेलु मैदानमा बंगलादेशी युवा टोली उच्च मनोवलका साथ प्रस्तुत हुनेछ । तर, यु–१९ विश्वकप क्रिकेटमा जायन्ट किलरको छबी बनाएको नेपाल आज पनि विजयी नतिजा निकाल्दै इतिहास रच्ने दाउमा छ ।
यसअघि सन् २००० मा पहिलो पटक यु–१९ विश्वकपमा सहभागी हुँदा नै दोस्रो चरण पुगेको नेपाल क्वार्टरफाइनलमा पराजित भएको थियो । आज बिजयी हुँदै सेमिफाइनमा स्थान बनाउन सके समग्र नेपाली खेलकुदका लागि नै त्यो ऐतिहासिक उपलब्धी हुनेछ ।
यसैबीच एसोसिएट राष्ट्रबाट क्वार्टरफाइनलमा पुगेका नेपाल र नामिवियामध्ये शीर्ष स्थानमा रहने टोली अर्को पटकको विश्वकपमा सोझै छनोट हुने भएको छ ।
अन्तर्राष्ट्रिय क्रिकेट परिषद् आईसीसीको बोर्ड बैठकले दुई टोलीमध्ये शीर्ष स्थानमा रहनेलाई अर्को पटकको विश्वकपमा सोझै छनोट गर्ने निर्णय गरेको हो । बैठकले एसोसिएट राष्ट्रको पक्षमा निर्णय गर्दै यो विश्वकपको शीर्ष स्थानमा रहने एसोसिएट सदस्य सन् २०१८ को जनवरी १२ देखि फेब्रुअरी ४ सम्म न्युजिल्यान्डमा हुने १९ वर्ष मुनिको विश्वकपका लागि छनोट व्यवस्था गरेको हो ।
नेपालले यो मौका सदुपयोग गर्नका लागि नामिवियाभन्दा माथि रहनुपर्छ ।

माघ २२ । दक्षिण एसियाली खेलकुद सागको १२ औं संस्करण आजबाट भारतको गुवाहाटीमा शुरु हुँदैछ । इन्दिरा गान्धी अन्तर्राष्ट्रिय रंगशालामा एक भव्य समारोहबीच भारतीय प्रधानमन्त्री नरेन्द्र मोदीले प्रतियोगिताको उद्घाटन गर्ने कार्यक्रम छ ।
भारतकै अर्को राज्य मेघालयको राजधानी सिलोङमा पनि प्रतियोगिता हुनेछ ।
justify;">भारतीय प्रधानमन्त्री मोदीले शनिबार सिलोङमा पनि प्रतियोगिताको छुट्टै उद्घाटन गर्ने कार्यक्रम छ । प्रतियोगितामा भाग लिन सहभागी खेलाडी, पदाधिकारी र सञ्चारकर्मी पुग्ने क्रम जारी छ ।
आयोजक भारतसहित नेपाल, बंगलादेश र पाकिस्तानका अधिकांश सहभागी आयोजनास्थल पुगिसकेका छन् । प्रतियोगितामा नेपालसहित आयोजक भारत, भुटान, बंगलादेश, श्रीलंका, पाकिस्तान, माल्दिभ्स र अफगानिस्तानका खेलाडीले सहभागिता जनाउँदै छन् ।
प्रतियोगिताका विभिन्न २३ वटा खेलका स्पर्धा समावेश गरिएको छ । नेपाल, भारत र श्रीलंकाले मात्र २३ वटै खेलमा भाग लिएका छन् । प्रतियोगितामा नेपालबाट तीन सय ८७ खेलाडीसहित ५ सय २२ सदस्यीय टोलीले सहभागिता जनाउँदैछ ।
प्रतियोगिताका १६ खेल गुवाहाटी र सात खेल सिलोङमा हुनेछन् ।
भारतले तेस्रो पटक साग आयोजना गर्न लागेको हो । दक्षिण एसियाली खेलकुदको पहिलो संस्करण भने नेपालमा भएको थियो ।


माघ २२ । पहिलो नालान्द अन्तरविद्यालय बास्केटबल प्रतियोगिताको उपाधि आयोजक नालान्द बोर्डिङ स्कुलले जितेको छ ।

विहीबार भएको फाइनल खेलमा ओसिस स्कुललाई ४९–३३ ले पराजित गर्दै नालान्दले उपाधि उचालेको हो ।
माघ १६ गतेदेखि सुरु भएको प्रतियोगितामा आयोजकसहित पाँच विद्यालयले प्रतिस्पर्धा गरेका थिए ।

‘राउन्डरोबिन लिग’का आधारमा खेलाइएको प्रतियोगिताको शीर्ष दुई स्थान ओगट्ने टोलीहरुले फाइनल खेलेका हुन् । प्रतियोगितामा बिजेता नालान्द स्कुलका हेमलाल श्रेष्ठ उत्कृष्ट खेलाडी घोषित हुँदा नालान्दकै नवीन लोहार उत्कृष्ट डिफेन्सिभ खेलाडी र क्याम्पियन स्कुलका नियोन शेरचन सर्वाधिक स्कोर गर्ने खेलाडी बने । 

माघ २२  । सशस्त्र प्रहरीको एपीएफ टिम इलाममा जारी माइभ्याली गोल्डकप फुटबल प्रतियोगिताको फाइनलमा प्रवेश गरको छ ।

विहीबार भएको दोस्रो तथा अन्तिम सेमिफाइनलमा अर्को विभागीय टोली त्रिभुवन आर्मी क्लबलाई स्तब्ध पार्दै सशस्त्र उपाधि नजिक पुगेको हो ।

सशस्त्रले सेमिफाइनलमा आर्मीमाथि ४–१ गोलको सनसनीपूर्ण जित दर्ता गर्‍यो ।सशस्त्रको जितमा प्रविण स्याङ्तान, निरज श्रेष्ठ, श्याम नेपाली र टोप बिस्टले एक–एक गोल गरे ।

खेलमा आर्मीका पदम तामाङले एक सान्त्वना गोल फर्काए ।

सशस्त्र अब उपाधिका लागि आगामी शनिबार झापा–११ सँग भिड्नेछ । 

माघ २२ । विश्व फुटबल संघ (फिफा)ले जारी गरेको नयाँ वरीयताक्रममा नेपाल ८ स्थान माथि उक्लिँदै १ सय ८८औं स्थानमा पुगेको छ ।

फिफाले फ्रेबुअरी महिनाका लागि विहीबार सार्वजानिक गरेको वरीयताक्रममा नेपालले ८ स्थान सुधार गरेको हो । बंगलादेशमा केहीअघि सम्पन्न बंगबन्धु गोल्डकप फुटबल प्रतियोगिता जितेको नेपालको सोहि प्रतियोगितामागरेको प्रदर्शनका कारण वरीयतामा सुधार भएको हो । पछिल्लो समय एकपछि अर्को खराब नतिजा निकाल्दै नेपाल फिफा वरीयतामा इतिहासकै सबैभन्दा खराब १ सय ९६औं स्थानमा पुग्दै दक्षिण एसियाकै पुछारमा रहेको थियो ।

नयाँ वरीयताक्रममा नेपाल पुछारबाट दक्षिण एसियाको दोस्रो स्थानमा उक्लेको छ । १ सय ५४औं स्थानमा रहेको अफगानिस्तान दक्षिण एसियाको शीर्ष स्थानमा छ । यस्तै, वरीयताको शीर्ष स्थानमा बेल्जियमले कब्जा जमाउदा अर्जेन्टिना दोस्रो, स्पेन तेस्रो, जर्मनी चौंथो र चिली पाँचौ स्थानमा रहेका छन् । 

माघ १८।  जारी उण्डर नाइण्टिन विश्वकप अन्तर्गत नेपालको ब्याटिंग सकिए सगै नेपालद्वारा भारत सामु ८  विकेट गुमाउदै १६९   रन बनाइ १७० रनको लक्ष प्रस्तुत गरेको छ।  

माघ १८ । अन्डर नाइन्टिन विश्वकप क्रिकेटअन्तर्गत समुह डी को अन्तिम खेलमा आज(सोमबार) नेपाल र भारत भिड्दै छन् ।
बंगलादेशमा जारी प्रतियोगिताअन्तर्गतको यो खेल नेपाली समय अनुसार बिहान पौने ९ बजे सुरु हुनेछ । खेलपूर्व नेपाली टोलीका प्रशिक्षक जगत टमाटाले आफ्नो टोली दबाबमा नभएकाले निर्धक्क भएर प्रदर्शन गर्ने बताएकाछन् ।
भारत विश्वकप विजेता राष्ट्र भएकाले आजको खेलमा खेलमा उ पुरै दबाबमा हुने र नेपालले त्यसको फाईदा उठाउने टमाटाको विश्वास छ ।
भारतसँगको खेलमा उनी ढुक्क देखिन्छन् । त्यसको एउटा कारण नेपाल छनोट भइसक्नु हो । ‘दबाब हामीलाई होइन, भारतलाई छ, हामी सामान्य खेल खेल्नेछौं । नेपालले राम्रो खेलिरहेको छ भनेर उनीहरूले हेरेर खेल्नुपर्ने दबाब छ । फिल्डिङ पनि हाम्रो राम्रो छ । हामी भारत बलियो टिम हो भनेर खेल्दैनौं,’ उनले भने ।
एक खेलअघि नै दुवै टिमले क्वार्टरफाइनलमा ठाउँ सुरक्षित गरिसकेका अवस्थामा यो खेलको नतिजाले समूह बिजेताको टुंगो लगाउने छ । दुवै टिमले न्यूजिल्याण्ड र आयरल्याण्डलाई पराजित गर्दै अन्तिम आठमा ठाउँ बनाएका हुन् ।
नेपालले न्यूजिल्याण्डलाई ३२ रनले तथा आयरल्याण्डलाई ८ विकेटले हराउँदै दोस्रो पटक क्वार्टरफाइनलमा पुगेको हो । भारत भने यो उमेर समुहको विश्वकपमा तीन पटकको च्याम्पियन हो । टेष्ट खेल्ने राष्ट्रहरु बाहेक प्रतियोगिताको क्वार्टरफाइनलमा पुग्ने एकमात्र एसोसियट राष्ट्र नेपाल यसपटक त्यहाँभन्दा माथि पुग्ने लक्ष्यका साथ मैदानमा उत्रिएको छ ।

माघ १८ । सरस्वती युथ क्लब काठमाडौंलाई पराजित गर्दै सशस्त्र प्रहरीको एपिएफ क्लव इलामको ठूलो टुँडिखेलमा जारी माइभ्याली गोल्डकपको सेमिफाइनलमा आइतबार प्रवेश गरेको छ ।
एपिएफले ४–० गोल अन्तरले जित हात पारेको हो । एपिएफका लागि श्याम नेपाली, राजेन्द्र रावल, गणेश लावती र सन्तोष श्रेष्ठले एक/एक गोल गरे ।
खेलको म्यान अफ दि म्याच एपिएफका श्याम नेपाली घोषित भए । सोमबारको  खेल झापा ११ र साहारा फुटबल क्लब पोखराबीच हुनेछ ।

माघ १८ । सर्बियाका नोभाक जोकोभिचले यो वर्षको पहिलो ग्राण्ड स्लाम उपाधि हात पारेका छन् । अस्ट्रेलियन ओपनको पुरुष एकलतर्फ टेनिस  उपाधिका लागि भएको भिडन्तमा उनले बेलायतका एन्डी मर्रेलाई पराजित गर्दै वर्षको पहिलो ग्राण्ड स्लाम कब्जा गरेका हुन् ।
जोकोभिचले मर्रेलाई लगातार तीन सेटमा ६–१, ७–५ र ७–६ले पराजित गरे । पहिलो सेट जित्न उनलाई केवल ३० मिनेट लागेको थियो तर दोस्रो सेटमा भने उनले निकै संघर्ष गर्नु पर्‍यो । तेस्रो सेटमा पनि मर्रेले उनलाई कडा टक्कर दिए । अन्ततः टाइब्रेकरमा जोकोभिच हावी भए ।
जोकोभिचको यो छैठौं अस्ट्रेलियन ओपन उपाधि हो । उनले हालसम्म ११ ग्राण्ड स्लाम उपाधि हासिल गरेका छन् ।

ARENA NEWS

{picture#https://1.bp.blogspot.com/-TSSsOHmNA9g/Xrc8t2Oo7HI/AAAAAAAAChU/cyhWCseUQbI5bY_90tYKATlVBOVhKdofwCK4BGAYYCw/s1600/arena%2BNEWS%2Blogo%2B%25281%2529%2Bcopy.pngL} NEWS AND SPORTS {facebook#https://www.facebook.com/arena.np/} {twitter#https://twitter.com/arenanepal} {google#www.google.com/kpcat} {pinterest#https://www.pinterest.com/} {youtube#https://www.youtube.com/channel/UC_ISHKB5xxLJnGLep4Y3JEw} {instagram#www.instagram.com/}

Contact Form

Name

Email *

Message *

Powered by Blogger.