March 2017

चैत १८ । विश्व फुटबल महासंघ (फिफा)ले सन् २०२६ मा हुने विश्वकप फुटबलका लागि ६ देशबीच प्लेअफ प्रतियोगिता गराउने प्रस्ताव अघि सारेको छ ।

प्ले अफ प्रतियोगिताका उत्कृष्ट दुई राष्ट्रलाई विश्वकपमा स्थान दिईने फिफाको योजना छ ।
फिफाले सार्वजनिक गरेको विज्ञप्तिमा ५ महादेशबाट १–१ राष्ट्र र ओसियाना समूहबाट एक राष्ट्र गरी ६ टिमले प्लेअफ प्रतियोगिता खेल्ने उल्लेख छ ।
गत जनवरीमा बसेको फिफाको बैठकले सन् २०२६ को विश्वकपदेखि सहभागि राष्ट्रको संख्या ३२ बाट बढाएर ४८ पुर्‍याउने निर्णय गरेको थियो । तर कुन महादेशलाई कति स्थान दिने भन्नेबारे फिफाले अहिलेसम्म कुनै निर्णय गर्न सकेको छैन ।
सन् २०२६ को विश्वकपमा ४८ राष्ट्र सहभागी हुने भनिए पनि महादेशलाई कति कोटा दिने भन्ने अझै टुंगो लागेको छैन । यही विषय टुंग्याउन फिफाको बैठक मे ९ तारिखमा बस्दैछ ।
हाल विश्वकप फुटबलमा अफ्रिकाबाट ५, एसियाबाट ४ वा ५, दक्षिण अमेरिकाबाट ४ वा ५, मध्य तथा उत्तर अमेरिका र क्यारेबीयन समूहबाट ३ वा ४, युरोपबाट १३ र ओसीयाना समूहबाट बढीमा एक राष्ट्र सहभागि हुने गरेका छन् ।

चैत १७ । बंगलादेशमा जारी इमर्जिङ टिम्स एसिया कप क्रिकेट प्रतियोगिताअन्तर्गत् समूहको अन्तिम खेलमा हङकङलाई हराउँदै नेपालले सान्त्वना जित दर्ता गरेको छ ।


शेख कमल अन्तर्राष्ट्रिय रंगशालामा बिहीबार भएको खेलमा नेपालले हङकङलाई ७ विकेटले हराएको हो ।
हङकङले दिएको २१५ रनको विजयी लक्ष्य नेपालले ४५औं ओभरमा ३ विकेट गुमाएर पूरा गर्‍यो ।
नेपालको लागि तीन खेलाडीले अर्धशतक बनाएको इनिङमा कप्तान ज्ञानेन्द्र मल्लले सर्वाधिक ७० रन जोडे ।
यसैगरी, दीपेन्द्रसिंह ऐरीले अविजित ६० रन तथा शरद भेषावकरले अविजित ५५ रनको योगदान दिए ।
यसअघि, खेलमा टस हारेर पहिले ब्याटिङ गरेको हङकङले निर्धारित् ५० ओभरमा अलआउट हुनुपूर्व २१४ रन जोडेको थियो ।
हङकङका सुरुआती ब्याट्सम्यानहरु अंशुमन राथले ५१ तथा क्यामरुन म्याक्वेल्सनले ४३ रनको योगदान दिए ।
बलिङतर्फ नेपालका अभिनाष कर्णले ३ विकेट लिँदा कप्तान ज्ञानेन्द्र मल्लसँगै सन्दीप लामिछाने र सुशन भारीले २–२ विकेट झारे ।
समूह चरणमा लगातार दुई खेल हारेका यी दुई टोली आज प्रतिष्ठाको लडाइँमा थिए ।
जितसँगै नेपालले समूहका तीन खेलबाट २ अंक जोडेको छ भने हङकङ खाता नै नखोली घर फर्किएको छ ।

चैत १७ । बंगलादेशमा जारी इमर्जिङ कप क्रिकेटको अन्तिम खेलमा आज नेपालले हङकङसँग खेल्दैछ ।

समूह चरणमा लगातार दुई खेल हारेका यी दुई टोली आज प्रतिष्ठाको लडाईंमा छन् । एसियाली तथा विश्वस्तरका विभिन्न प्रतियोगितामा नेपाल र हङकङ परिचित प्रतिद्वन्द्वी हुन् । एक अर्काको खेल रणनीति राम्रोसँग बुझेका दुबै टोली आजको खेल जित्दै दुई अंकको साथ बंगलादेशबाट घर फर्किने अभियानमा हुनेछन् ।
दुबै टोलीलाई समूहमा पाकिस्तान र बंगलादेशले हराएका हुन् । नेपालले पहिलो खेलमा पाकिस्तानसँग ६ विकेटको हार बेहोरेको थियो भने दोस्रो खेलमा आयोजक बंगलादेशसँग ८३ रनको पराजय झेलेको थियो ।
ईमर्जिङ टिम्स एसिया कप क्रिकेटमा एसियाका टेष्ट खेल्ने चार राष्ट्र भारत, पाकिस्तान, श्रीलंका र बंगलादेशका २३ वर्ष मुनिको राष्ट्रिय टोली तथा चार एसोसिएट राष्ट्र नेपाल, हङकङ, अफगानिस्तान र मलेसियाका सिनियर टोली सहभागी छन् ।

एएफसी एसिया कप छनोटः नेपालविरुद्ध फिलिपिन्स 
गत वर्ष नेपाली राष्ट्रिय फुटबल टोलीको मुख्य प्रशिक्षक नियुक्त भएपछि जापानका कोजी ग्योटोकु निकै चर्चामा छन्। उनको नेतृत्वमा नेपालले करिब पाँच महिनाअघि मलेसियामा भएको एएफसी सोलिडारिटी कपको उपाधि जितेर इतिहास रचेको थियो।
नेपालले यो उपाधि एसियाली फुटबल महासंघमा आफू आवद्ध भएको ४४ वर्षको अन्तरालमा जितेको थियो। त्यसैले उनी नेपाललाई एएफसीको आधिकारिक प्रतियोगिता जिताउने पहिलो प्रशिक्षक पनि हुन्।
शान्त र मृद्धभाषी ५२ वर्षीय यी प्रशिक्षकले २००८ देखि २०१० सम्म भुटानको प्रशिक्षक भएर काम गरेका थिए। त्यतिबेला उनले भुटानको फुटबलमा केही परिवर्तन गराउन सफल भए पनि नतिजा उनको पक्षमा रहेन्। भुटानले उनको नेतृत्वमा खेलेको १४ मध्ये १ खेलमा मात्र विजय हात पार्‍यो। २ मा बराबर र ११ खेलमा पराजय भोग्यो।
तर, नेपालको प्रशिक्षक नियुक्त भएपछि उनको नेतृत्वमा राष्ट्रिय टोलीले खेलेको ४ मध्ये कुनै खेल हार्नु परेको छैन। नेपालले तीनमा जित र एक बराबरी खेलेको छ।ब
उनको यही प्रदर्शनलाई लिएर नेपालले मंगलबार फिलिपिन्ससँग खेल्ने एएफसी एसिया कप छनोटको सेरोफेरोमा सेतोपाटीका लागि नवीन अर्यालले गरेको कुराकानीको सम्पादित अंश।
पहिले नेपाल आउने प्रशिक्षकहरू यसो गर्छु, उसो गर्छु भनेर बढी कुरा गर्थे। तर, तपाई त्यति कुरा गर्नु हुन्न। त्यही पनि नतिजा निकाल्नुभयो। यसको रहस्य के हो?
– (हाँस्दै) म जे देख्यो, त्यहीँ कुरा गर्छु। कुनै पनि कुरालाई ठूलो बनाएर हुँदैन। सबै कुरा बोले जस्तो सजिलो पनि हुँदैन्। हरेक खेल चूनौतीपूर्ण हुन्छ। म खेलाडीहरुलाई त्यसको अनुभव गराउन खोज्छु।
पहिले नेपाल ४–४–२ को फर्मेसनमा खेल्थ्यो। तपाईँ आएपछि नेपाली टोली प्रायः तीन स्ट्राइकर बोकेर खेलेको देखिन्छ? तपाईलाई के लाग्छ, नेपाली फुटबल तीन स्ट्राइकर बोकेर मैदानमा प्रवेश गर्ने अवस्थामा पुगिसक्यो?
–यो विपक्षी टोली र खेलको अवस्थाले निर्धारण गर्ने कुरा हो। म अहिलेनै सबै कुरा दाबी साथ भन्न सक्दिनँ। धेरै कुरा रणनीतिमा भरपर्छ। गोल खाएको र गोल गरेको अवस्थाले खेलमा धेरै कुरा निर्धारण हुने गरेको छ।
अहिले खेल्न लागेको विपक्षी फिलिपिनो टोलीलाई कसरी लिनुभएको छ?
फिलिपिन्स हामीभन्दा बलियो टोली हो। फिफा वरियतामा पनि १ सय २४ स्थानमा छ। उनीहरुको डिफेन्स, मिडफिल्ड र फरवार्ड तीन वटै राम्रो छ। फेरि इन्डिभिजुअल खेलाडी पनि राम्रा छन्। त्यसैले हामीले फिलिपिन्सविरुद्ध धेरै मेहनत गर्नुपर्नेछ।
तपाईलाई कुन खेलाडीबाट बढी आशा छ?
– रोहित चन्द। सबै खेलाडीबाट मैले राम्रो खेलको आशा राखेको छु। तर, रोहितबाट बढी नै छ।
अहिले टिममा प्रभावशाली स्ट्राइकर नवयुग श्रेष्ठ छैनन्, अनुभवी अनिल गुरुङ पनि ड्रप छन्। यसको पूर्ति कसरी गर्छु भन्ने सोच्नु भएको छ?
 यस विषयमा तुरुन्त प्रतिक्रिया दिने अवस्थामा म छैन। तर, उनीहरुको अनुपस्थितिमा पनि हामीले योजना बनाएका छौं। त्यसलाई अहिले नै उद्घाटित गर्ने कुरा भएन। केटाहरुले धेरै मेहनत गरेका छन्। त्यसैले हामी सकारात्मक नतिजाको पर्खाइमा छौं।

चैत १५ । एसियन कप छनोट फुटबलअन्तर्गत तेस्रो चरणको पहिलो खेलमा आज नेपालले फिलिपिन्सको सामना गर्दैछ ।

फिलिपिन्सको राजधानी मनिलास्थित रिजाल मेमोरियल रंगशालामा हुने खेल दुबै टोलीका लागि निकै महत्वपूर्ण र कठिन छ ।
फिलिपिन्सलाई घरेलु मैदान, मौसम र समर्थकको साथ हुनेछ भने नेपाललाई पछिल्ला प्रतियोगिताहरुमा गरेको अपराजित प्रदर्शनको हौसला हुनेछ ।
यसअघि विश्वकपको समेत छनोट मानिएको खेलमा भारतसँग पराजित हुँदै नेपाल एसिया कप फुटबलको समेत पहिलो चरणबाटै बाहिरिएको थियो ।
तर तेस्रो चरणका लागी छनोट भएको ग्वामले आन्तरिक कारण देखाउँदै प्रतियोगिताबाट नाम फिर्ता लिएपछि तथा घरेलु फुटबल संघमा लागेको प्रतिबन्धका कारण कुवेतले प्रतिस्पर्धा गर्न नपाउने भएपछि एएफसीले सोलिडारिटी कपको फाइनलिस्टको हैसियतमा नेपाल र मकाउलाई यो अबसर दिएको हो ।
तेस्रो चरणको छनोटमा नेपालले समुहमा फिलिपिन्ससँगै ताजकिस्तान र यमनसँग खेल्नेछ । प्रत्येक टोलीले होम एण्ड अवेका आधारमा एक अर्कासँग दुई/दुई खेल खेल्नेछन् ।
समुहबाट छानिएका टोलीले सन् २०१९ मा संयुक्त अरब ईमाईरेट्स युएईमा हुने एसियन कप फुटबलमा सहभागिता जनाउन पाउनेछन् ।
एशियन कपका लागि हालसम्म १२ टोली छनोट भईसकेकका छन् भने बाँकी १२ टोलीका लागि २४ टोलीले छनोट खेलीरहेका छन् ।

चैत १४  । डिफेन्डिङ च्याम्पियन नेपाल आर्मी क्लब दोश्रो नेपाल कप भेट्रान फुटबल प्रतियोगितामा आइतबार सेमिफाइनलमा प्रवेश गरेको छ ।

स्पोर्ट्स फर अल क्लब, नेपाल र राष्ट्रिय खेलकुद संघ नेपालद्वारा संयुक्त आयोजित प्रतियोगितामा आर्मीले ढोलाहिटी युथ क्लबलाई ३–२ गोलले पराजित गर्‍यो । आर्मीका लागि नरेन्द्र खवास, श्रवण विष्ट र सिजर गुरुङले १–१ गोल गरे । ढोलाहिटीका विजय गुरुङले सान्त्वना गोल फर्काए । ढोलाहिटीका लालबहादुर लिम्बू ‘म्यान अफ द म्याच’ चुनिए ।
सेमिफाइनलमा आर्मीले साइनिङ सन स्टार क्लब, कैलाली र नाइट किङ क्लब, सानो गौचरणबीचको विजेतासँग प्रतिस्पर्धा गर्नेछ । सेमिफाइनल पुग्ने आर्मी दोश्रो टोली हो । यसअघि ब्वाइज स्पोर्ट्स क्लब, काठमाडौंले सेमिफाइनलमा स्थान पक्का गरेको थियो ।

चैत १३ । विश्वकप छनौट फुटबलमा फ्रान्सको अपराजित यात्रा कायमै छ । शनिबार राती भएको खेलमा फ्रान्सले लक्जेम्बर्गलाई ३-१ ले हरायो ।

समुह ए कै अर्को खेलमा स्विडेनले बेलारुसलाई ४-० ले हराउँदा नेदरल्याण्ड्स भने फेरी पराजित भएको हो । नेदरल्याण्ड्सलाई बुल्गेरियाले २-० ले हराएको हो ।
समुह बी को खेलमा पोर्चुगलले हंगेरीलाई ३-० ले हराउँदा स्विट्जरल्याण्डले लात्भियामाथि १-० को कठिन जित निकाल्यो ।
समुह एच को खेलमा बेल्जियम र ग्रिसले १-१ गोलको बराबरी खेल्दा बोस्नीयाले जिब्रल्टारलाई ५-० ले पाखा लगायो । विश्वकप फुटबल छनौटमा युरोपेली समुहका बाँकी खेल आज राती हुनेछन् ।

चैत १३ । एसिया कप फुटबलमा सहभागिता जनाउन नेपाली राष्ट्रिय फुटबल टोली शनिबार राती फिलिपिन्स प्रस्थान गरेको छ ।

नेपालले यही चैत १५ गते मंगलबार फिलिपिन्सविरुद्ध छनौट खेल खेल्दैछ । उक्त खेलको लागि विराज महर्जनको कप्तानीमा २० सदस्यीय नेपाली टोली राति हङकङ हुँदै मनिला पुगेको हो ।
जापानी प्रशिक्षक ग्योतोकु कोजुको प्रशिक्षणमा रहेको नेपाली टोलीमा अनिल गुरुङ समेटिएका छैनन् । होम एण्ड अवेको आधारमा हुने छनौटअन्तर्गत नेपालको यो पहिलो खेल हो ।
एशिया कप छनौटबाट सुरुमै बाहिरिएको नेपालले एएफसी सोलीडारीटी कप जितेपछि एशियाली फुटबल महासंघले नेपाललाई फेरी प्रतियोगितामा सामेल गराएको हो ।
नेपालले समुहमा फिलिपिन्ससँगै ताजकिस्तान र यमनसँग खेल्नेछ । समुहबाट छानिएका टोलीले सन् २०१९ मा संयुक्त अरब ईमाईरेट्स युएईमा हुने एशियन कप फुटबलमा सहभागिता जनाउन पाउनेछन् ।
एशियन कपका लागि हालसम्म १२ टोली छनौट भईसकेकका छन् भने बाँकी १२ टोलीका लागि २४ टोलीले छनौट खेल खेल्दैछन् ।

चैत १३  । बंगलादेशमा हुने एसीसी इमर्जिङ कप क्रिकेट प्रतियोगितामा सहभागी हुन नेपाली क्रिकेट टिम शनिबार बंगलादेश गएको छ ।

बंगलादेश जानुअघि नेपाली टिमलाई राष्ट्रिय खेलकुद परिषद (राखेप)का सदस्यसचिव केशवकुमार विष्टले शनिबार शुभकामनासहित टिमको बिदाइ गरे ।
ज्ञानेन्द्र मल्लको कप्तानीमा रहेको नेपालले आफ्नो पहिलो खेलमा सोमबार पाकिस्तानको २३ वर्षमुनिको टिमसँग खेल्नेछ ।
त्यस्तै, मंगलबार बंगलादेशको टिमसँग र बिहीबार हङकङसँग प्रतिस्पर्धा गर्नेछ ।
एसियाका चार टेस्ट मान्यता प्राप्त र चार एसोसिएट राष्ट्रलाई दुई समूहमा विभाजन गरी प्रतियोगिता सन्चालन हुँदैछ ।
एसोसिएटका राष्ट्रिय र टेस्ट मान्यता प्राप्त राष्ट्रका २३ वर्षमुनिका टिम खेल्नेछन् ।

चैत १२  । चैत १५ गते मंगलबार फिलिपिन्सविरुद्ध फिलिपिन्समा हुने एएफसी एसिया कप फुटबलमा सहभागिता जनाउन जाने नेपाली टोलीको शुक्रबार बिदाइ गरिएको छ ।

मनिलामा हुने खेलका लागि जापानी मुख्य प्रशिक्षक ग्योतुकी कोजीको प्रशिक्षणमा खारिएको २० सदस्यीय नेपाली टोली शनिबार राति त्यसतर्फ जान लागेको हो ।
सातदोबाटोस्थित अखिल नेपाल फुटबल संघ (एन्फा)को कम्प्लेक्समा भएको कार्यक्रममा खेलाडीहरुलाई बिदाइ गर्दै युवा तथा खेलकुदमन्त्री दलजित बिके श्रीपालीले जितका लागि शुभकामना दिए ।
अनिल गुरुङ अन्तिम २० भित्र नपरेपछि अब नेपाली टिमको कप्तानी विराज महर्जनले सम्हाल्नेछन् ।
नेपालले पछिल्लो समय हात पारेका सफलतामा विराजले नै नेपाली टिमको नेतृत्व गर्दै आएकाछन् ।

चैत १०  । श्रीलंकाका चर्चित ब्याट्सम्यानहरु सम्मिलित टिम र नेपाली राष्ट्रिय क्रिकेट टिमबीच ट्वेन्टी–२० क्रिकेट शृंखला हुने भएको छ ।

नेपाल र श्रीलंकाबीचको कुटनीतिक सम्बन्धको ६०औं वर्षगाँठको अवसर पारेर पेरिविंकल सर्भिसले कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा तीन खेलको मैत्रीपूर्ण टी–२० शृंखला गर्न लागेको हो ।
श्रीलंकाको टिमले ‘लंकन लाइन्स’को नामबाट खेल्दै गर्दा पूर्वकप्तान अरविन्दा डे सिल्भाले नेतृत्व सम्हाल्नेछन् ।
उक्त टिमबाट सनथ जयसूर्या, चामिन्डा भास, रोमेश कालुविर्थना, दिलहारा फर्नान्डो, उपुल चन्दना, कौशल्या वैरारत्ने, फरभेज महरुफ, उपुल थरंगा, रंगना हेराथ, दिलशान मुनावेरा, सचित्रा सेनानायक र चामरसा सिल्भादाराले खेल्नेछन् ।
नेपालले ‘गोर्खा राइनोज’को नामबाट खेल्दा राष्ट्रिय टोलीका कप्तान पारस खड्काले नेतृत्व सम्हाल्नेछन् । गोर्खा राइनोजमा सबै राष्ट्रिय टिमका खेलाडीहरु नै हुने जनाइएको छ ।
वैशाख १४ देखि १८ गतेसम्म हुने सो शृंखलाका लागि दर्शकलाई कमभन्दा कम मूल्यमा टिकट उपलब्ध गराउने आयोजक पेरिविंकल सर्भिसका सीइओ दीपेश घलेले बुधबार राजधानीमा पत्रकार सम्मेलन गरी जानकारी दिए ।
सो कार्यक्रममा कप्तान पारस खड्काले विश्वमै चर्चित खेलाडीहरुसँग खेल्न पाउनु आफूहरुका लागि गौरवको विषय भएको बताए ।
उनले यो प्रतियोगिताबाट विश्वमा नेपाली क्रिकेटबारे राम्रो सन्देश जाने जिकिरसमेत गरेका छन् ।
सो प्रतियोगिताको समापनमा नेपाली क्रिकेटमा योगदान दिने व्यक्तिहरुलाई सम्मान गर्ने पनि आयोजकले जनाएको छ ।
यसैबीच, गत महिना पेटको शल्यक्रिया गरेका पारसको स्वास्थ्य सुधारिएको छ । उनले चैत २७ गतेदेखि धनगढीमा हुने धनगढी प्रिमियर लिग (डीपीएल) क्रिकेटबाट पुनरागमन गर्ने पनि जनाएका छन् ।
पारस यसअघि गत महिना केन्याविरुद्ध भएको विश्व क्रिकेट लिग च्याम्पियनसिपमासमेत खेल्न सकेका थिएनन् ।
हाल सामान्य शारीरिक अभ्यास गरिरहेका पारसले केही दिनमै नेटमा अभ्यास गर्ने बताए ।

चैत १० । मैत्रिपूर्ण फुटबलको एक खेलमा जर्मनीले इंग्लण्डलाई पराजित गरेको छ ।

बुधबार राती जर्मनीको डर्टमण्डमा भएको खेलमा घरेलु टोली १-० ले विजयी भएको हो । खेलमा जर्मनीलाई विजयी गराउन लुकास पोडोल्स्कीले निर्णायक गोल गरेका हुन् ।
जर्मनीको राष्ट्रिय टोलीका लागि खेलेको अन्तिम खेलमा पोडोल्स्कीले आकर्षक गोल गरेका हुन् ।
जर्मनीको जितसँगै इंग्लण्डका अन्तरिम प्रशिक्षक ग्यारेथ साउथगेटले पहिलो हार व्यहोरेका छन् । यसअघिका चार खेलमा साउथगेट अपराजित थिए ।
राती भएका अन्य मैत्रिपुर्ण खेलहरुमा चेक गणतन्त्रले लिथुआनियालाई ३-० ले हराँउदा साईप्रसले काजखस्तानलाई ३-१ ले पराजित गर्‍यो ।
यसैगरी स्कटल्याण्ड र क्यानाडाले एक एक गोलको बराबरी खेलेका छन् ।

चैत 10 । धनगढीमा हुन गईरहेको सगरमाथा सिमेन्ट धनगढी प्रिमियर लिग डिपिएल क्रिकेटको खेल तालिका सार्वजनिक गरिएको छ ।

आयोजक धनगढी क्रिकेट एकेडेमीले सार्वजनिक गरेको खेल तालिका अनुसार चैत्र २७ गते नेपाल ११ र धनगढी ११ बीच च्यारिटी खेल हुनेछ ।
यो खेलमा नेपाली राष्ट्रिय टिम र धनगढीका खेलाडीहरूको सहभागिता रहने छ । उक्त खेलको टिकटबाट उठेको पैसा फाप्ला अन्तर्राष्ट्रिय क्रिकेट मैदान निर्माणमा सहयोग गरिने आयोजकले जनाएको छ ।
प्रतियोगिताका प्रतिस्पर्धात्मक खेलहरु भने चैत २८ गतेदेखि हुनेछन् । चैत्र २८ गते हुने पहिलो खेलमा ज्ञानेन्द्र मल्लले नेतृत्व गरेको सिवाइसी अत्तरिया र बसन्त रेग्मी नेतृत्वको काठमाडौं गोल्डेन्स् भिड्नेछन् ।
सोही दिन शक्ति गौचन नेतृत्वको रुपेन्देही च्यालेन्जर्स् र विनोद भण्डारी नेतृत्वको कञ्चनपुर आइकोनिक आमनेसामने हुने छन् ।
प्रतियोगितामा यी चार टोलीसँगै शरद भेषावकर नेतृत्वको विराटनगर किंग्स् र पारस खड्का नेतृत्वको टिम चौराहा धनगढी पनि सहभागि छन् ।
प्रतियोगिताको लिग चरणका खेलहरु बैशाख ४ गते सकिनेछ भने त्यसपछि नक आउट चरण सुरु हुनेछ । प्रतियोगिताको फाईनल खेल बैशाख ९ गते हुनेछ ।
यसअघि यही चैत ५ गतेदेखि आयोजना हुने भनिएको प्रतियोगिता नेपाली टोलीको अन्तर्राष्ट्रिय प्रतियोगिता परेकोले ३ हप्ता पछि सरेको हो ।

11:06 AM ,

चैत ८ । गत माघ ११ गतेदेखि लागेको ताला खोल्दै ललितपुरको सातदोबाटोस्थित नेपाल ओलम्पिक कमिटीको कार्यालय रुक्मशमशेर राणापक्षले नियन्त्रणमा लिएको छ ।

सर्वोच्च अदालतले जीवनराम श्रेष्ठ नेतृत्वको ओलम्पिक कमिटीलाई अवैधानिक ठहर गर्दै रुक्मशमशेर राणा नेतृत्वको ओलम्पिक कमिटीलाई वैधानिकता दिएसँगै गत माघ ११ गतेदेखि लगाइएको ओलम्पिक कमिटीको कार्यालयको ताला खोलेर राणापक्षले कार्यालय नियन्त्रणमा लिएका हुन् ।
सर्वोच्चको निर्णय कार्यान्वयनका लागि भन्दै जिल्ला प्रशासन कार्यालयले ओलम्पिक कमिटीको कार्यालयमा तालाबन्दी गरेको थियो ।
मंगलबार प्रहरीको सहयोगमा राणापक्षका कार्यबाहक अध्यक्ष किशोरबहादुर सिंहको नेतृत्वमा गएको नारायणदेव राणा, दावा गुरुङ, लालकुमार लामा, कमल चित्रकार, विजय हमाललगायतको टोली ताला खोलेर कार्यालय प्रवेश गरेको हो ।
नेपाली खेलकुदमा लामो समयदेखि रुक्मशमशेर राणा नेतृत्वको ओलम्पिक कमिटी र ध्रुवबहादुर प्रधान तथा जीवनराम श्रेष्ठपक्षको ओलम्पिक कमिटीबीच विवाद रहँदै आएको थियो ।
सर्वोच्चले अघिल्लो महिना अन्तर्राष्ट्रिय ओलम्पिक कमिटिको मान्यता प्राप्त जीवनराम श्रेष्ठ अध्यक्ष रहेको ओलम्पिक कमिटीलाई अवैधानिक ठहर गर्दै राणाको कमिटी वैधानिक भएको फैसला गरेको थियो ।

चैत ८ । अन्तर्राष्ट्रिय फुटबल महासंघ फिफाले अफ्रिकी मुलुक घानाका रेफ्री जोसेफ लाम्पटेमाथि आजीवन प्रतिबन्ध लगाएको छ ।


रेफ्री लाम्पटेले विश्वकप फुटबल छनौट अन्तर्गत गत नोभेम्बरमा भएको दक्षिण अफ्रिका र सेनेगलबीचको खेलमा गल्तीपूर्ण निर्णय गरेको फिफाको ठहर छ । सेनेगलमाथि २–१ को जित दर्ता गराउँदा दक्षिण अफ्रिकालाई रेफ्री लाम्पटेले नियतबस पेनाल्टी हान्ने अवसर दिएको भेटिएपछि उनी कारवाहीमा परेका हुन् ।
फिफाले यसलाई खेल भावना विपरितको कार्य बताएको छ । रियो ओलम्पिकमा समेत रेफ्रीको भुमिका निर्वाह गरेका लाम्पटेले भने यसबारे कुनै प्रतिक्रिया दिएका छैनन् ।
फिफाले आफुमाथि लगाएको आजीवन प्रतिबन्धविरुद्ध लाम्पटेले अब फिफामै वा खेलकुदसम्बन्धी अन्तर्राष्ट्रिय अदालत कासमा अपिल गर्न पाउनेछन् । लाम्पटेले नियतपूर्वक आफुहरुलाई हराएको भन्दै सेनेगलले फिफामा उजुरी दिएपछि फिफाले छानविन अघि बढाएको थियो ।

6:12 AM

चैत ७ । तेस्रो मिस्टर फिटनेस फस्ट अन्तर खुला शारीरिक सुगठन च्याम्पियनसिपअन्तर्गत् ‘ओभरअल’तर्फको उपाधि धर्मराज लिम्बूले जितेका छन् ।

सतुंगलको फिटनेस फस्ट क्लबले सोमबार गरेको प्रतियोगितामा हिरण श्रेष्ठ दोस्रो र दामोदर श्रेष्ठ तेस्रो भए ।
पहिलो भएका धर्मराजले २५ हजार, दोस्रो भएका हिरणले १५ हजार तथा तेस्रो भएका दामोदरले १० हजार रुपैयाँ प्राप्त गरे ।
तीन तौल समूहमा प्रतिस्पर्धा भएको प्रतियोगितामा ७० केजीमा हिरण श्रेष्ठ पहिलो, अमर गमला दोस्रो र सनत हमाल तेस्रो भए ।
यस्तै, ६० केजीतर्फ धर्मराज लिम्बू पहिलो, त्रिनोज मानन्धर दोस्रो र मनोज सुरखेती तेस्रो भए ।
प्रतियोगितामा पुरुष स्पोर्टस् फिजिक १६५ सेमिको प्रतिस्पर्धामा सुजन रोका विजयी हुँदा, शेखर खत्री दोस्रो र राजेश तामाङ तेस्रो भए ।
यस्तै, १६५ सेमिमाथिको प्रतिस्पर्धामा शिव महर्जन पहिलो, मनोज कटुवाल दोस्रो र दीपेन्द्र गिरी तेस्रो भए ।
प्रतियोगितामा ५० भन्दा बढी खेलाडीले सहभागिता जनाएका थिए ।

चैत ७ । भारत र अष्ट्रेलियाबीचको तेस्रो टेस्ट क्रिकेट बराबरीमा सकिएको छ ।

राँचीमा भएको खेलमा अष्ट्रेलियाले विजयी लक्ष्य दिन नसकेपछि खेल बराबरीमै सकिएको हो ।
अष्ट्रेलियाले पहिलो इनिङमा ४५१ रन बनाएकामा भारतले चेतेश्वर पुजाराको २०२ रनको मद्दतले ९ विकेटको क्षतिमा ६०३ रन बनाएर इनिङ समाप्ती गरेको थियो ।
जवाफमा अष्ट्रेलियाले अन्तिम दिनको समाप्तीसम्म ६ विकेटको क्षतिमा २०४ रन बनायो ।
यो बराबरीसँगै चार खेलको शृंखलाको आगामी शनिबार धर्मशालामा हुने खेल नै निर्णायक बन्नेछ ।
यसअघि, दुबै टिमले एक–एक खेल जितेका थिए ।f

 चैत ७ । स्पेनिस लिग फुटबलमा बार्सिलोना र एथ्लेटिको मड्रिडले सहज जित हात पारेका छन् ।

लिग तालिकाको दोस्रो स्थानमा रहेको बार्सिलोनाले भ्यालेन्सियालाई ४–२ ले हरायो । बार्साका लागि लियोनल मेस्सीले दुई गोल गर्दा लुईस सुवारेज र आन्द्रे गोमेजले एक–एक गोल गरे । भ्यालेन्सियाका मांगाला र मुनिर अल हदादीले दुई गोल फर्काए ।
ला–लिगाअन्तर्गतको अर्को खेलमा एथ्लेटिको मड्रिडले सेभियालाई ३-१ ले हराएको छ । एथ्लेटिको मड्रिडलाई विजयी गराउन डिएगो गोडिन, एन्टोनियो ग्रेजम्यान र कोकेले एक–एक गोल गरे ।
गएरातिका अन्य खेलमा स्पोर्टिङ गियोनले ग्रानाडालई ३-१ ले हराउँदा सेल्टा भिगोले डेपोर्टीभो लाकोरुनालाई १÷० ले हराएको छ ।
गएरातिका खेलपछि ला–लिगाको अंक तालिकामा २७ खेलबाट ६५ अंक जोडेको रियाल मड्रिड शीर्ष स्थानमा रहँदा एक खेल बढी खेलेको बार्सिलोना ६३ अंकको साथ दोस्रो तथा सेभिया ५७ अंकसहित तेस्रो स्थानमा छन् ।

चैत ६ । स्पेनिस लिग फुटबलमा शीर्ष स्थानको रियाल मड्रिडले बार्सिलोनासँग ५ अंकको अग्रता बनाएको छ ।

गएराति भएको खेलमा एथ्लेटिक बिल्बाओलाई २–१ ले हराउँदै रियाल मड्रिडले उपाधि यात्रा बलियो पारेको हो । खेलमा रियाल मड्रिडलाई विजयी गराउन करिम बेन्जमा र क्यासेमिरोले एक–एक गोल गरे ।

ला लिगा अन्तर्गतको अर्को खेलमा रियाल बेटीसले ओसासुनालाई २–० ले हराउँदा आलाभेजले रियाल सोसिडाडलाई १–० ले पराजित गर्‍यो ।
गएरातिका खेलपछि स्पेसिन ला लिगाको अंक तालिकामा २७ खेलबाट ६५ अंक जोडेको रियाल मड्रिड शीर्ष स्थानमा रहेको छ । समान खेलबाट ६० अंक जोडेको बार्सिलोना दोस्रो स्थानमा रहँदा तेस्रो स्थानको सेभियाको ५७ अंक छ । बार्सिलोनाले आज राति हुने खेलमा भ्यालेन्सियासँग खेल्नेछ ।

चैत ६ । इङ्लिस प्रिमियर लिग फुटबलमा चेल्सीले १३ अंकको अग्रता बनाएको छ ।गएराति भएको खेलमा स्टोक सिटीमाथि २–१ को संघर्षपूर्ण जित हात पार्दै चेल्सीले तालिकामा फराकिलो अग्रता बनाएको हो । स्टोक सिटीको मैदानमा भएको खेलमा चेल्सीलाई विजयी गराउन विलियन र ग्यारी केहीलले एक–एक गोल गरे । स्टोक सिटीका जोनाथन वाल्टर्सले पेनाल्टीमार्फत एक गोल गरेका थिए ।

प्रिमियर लिग फुटबलकै अर्को खेलमा आर्सनललाई वेष्ट ब्रोमले ३–१ ले हराएको छ । वेष्ट ब्रोमलाई विजयी गराउन क्रेग डसनले दुई गोल गरे भने रोब्सन कानुले एक गोल गरे । आर्सनलका अलेक्सिस सान्चेजले एक गोल फर्काएका थिए ।
गएराति भएका अन्य खेलमा लेष्टर सिटीले वेष्ट ह्याम युनाईटेडलाई ३–२ ले हराउँदा एभर्टनले हल सिटीलाई ४–० ले, बर्नमाउथले स्वान्सी सिटीलाई २–० ले तथा क्रिस्टल प्यालेसले वाट्फोर्डलाई १–० ले हराएका छन् । सण्डरल्याण्ड र बर्नलेबीचको खेल गोलरहित बराबरीमा सकिएको छ ।
इङ्लिस प्रिमियर लिग फुटबलमा गएरातिका खेलपछि २८ खेलबाट ६९ अंक जोड्दै चेल्सी शीर्ष स्थानमा रहेको छ । एक खेल कम खेलेका टोटनह्याम हट्सपर र म्यानचेस्टर सिटी ५६/५६ अंकका साथ क्रमशः दोस्रो तथा तेस्रो स्थानमा छन् ।
लिगमा टोटनह्यामले आज साउथह्याम्पटनसँग खेल्दा म्यानचेस्टर युनाईटेड र मिडिल्सब्रो भिड्नेछन् । यसैगरी आज हुने चर्चित खेलमा म्यानचेस्टर सिटी र लिभरपुल भिड्नेछन् ।

चैत ५। चैत अन्तिम सातादेखि कैलालीको धनगढीमा आयोजना हुने धनगढी प्रिमियर लिगको सहायक प्रयोजकका रुपमा किरण शु म्यानिफ्याक्चरको उत्पादन गोल्डस्टार जुत्तासँग सम्झौता भएको छ ।

आयोजक धनगढी क्रिकेट एकेडेमीका अध्यक्ष सुवाश शाही तथा किरण शु म्यानिफेक्चरका निर्देशक बिधुशी राणाबीच शुक्रबार काठमाडौंमा सम्झौता पत्रमा हस्ताक्षर भयो ।
सम्झौता अनुसार सह-प्रयोजकका रुपमा कम्पनीले आयोजक धनगढी क्रिकेट एकेडेमीलाई ५ लाख बराबरको प्रायोजन गर्नेछ । कार्यक्रममा किरण शु कि निर्देशक राणाले राष्ट्रिय एकता र सामाजिक सदभावलाई जोगाउन सहयोग गर्ने क्रिकेट खेलसँग जोडिन पाउँदा कम्पनीले गर्व महशुस गरेको बताइन् ।
सगरमाथा सिमेन्ट धनगढी प्रिमियर लिग आगामी चैत्र २७ देखि बैशाख ९ गतेसम्म धनगढीमा आयोजना हुदैछ । प्रतियोगितामा देशभरका विभिन्न ६ वटा टिमहरुलेे सहभागिता जनाउँदैछन् ।

चैत ५ । अखिल नेपाल फुटबल संघ (एन्फा)ले एएफसी एसिया कप २०१९ को छनोट प्रतियोगिताअन्तर्गत् फिलिपिन्सविरुद्ध खेल्नका लागि २० सदस्यीय नेपाली टोलीको घोषणा गरेको छ ।

यही चैत १५ गते फिलिपिन्सको मनिलामा हुने खेलका लागि जापानी मुख्य प्रशिक्षक ग्योतुकी कोजीले शुक्रबार तीन गोलरक्षक, सात डिफेन्डर, ६ मिडफिल्डर र चार स्ट्राइकर गरी २० जनाको टोली बनाएका हुन् ।
छानिएका गोलरक्षकमा विकेश कुथु, किरण लिम्बू र विशाल श्रेष्ठ तथा डिफेन्डरमा रबिन श्रेष्ठ, विराज महर्जन, अनन्त तामाङ, आदित्य चौधरी, कमल श्रेष्ठ, रन्जित धिमाल र जितेन्द्र कार्की रहेका छन् ।
त्यस्तै, मिडफिल्डरमा रोहित चन्द, विशाल राई, हेमन गुरुङ, विक्रम लामा, अन्जन विष्ट र सुजल श्रेष्ठ रहेका छन् ।
त्यस्तै, स्ट्राइकरमा बिमल घर्तीमगर, रन्जन विष्ट, भरत खवास र कर्ण लिम्बू रहेका छन् ।
चोटका कारण टिममा नअटेका नवयुग श्रेष्ठको ठाउँमा कर्ण लिम्बूलाई समावेश गरिएको हो ।
बन्द प्रशिक्षणमा रहेका २७ खेलाडीमध्ये अनिल गुरुङ, सुशन लामा, देवेन्द्र तामाङ, एलन न्यौपाने, राजेन्द्र रावल, मानबहादुर तामाङ र बिमल बस्नेत टिममा अट्न सकेनन् ।


चैत ४ । इंग्लिश फुटबल क्लव म्यानचेस्टर युनाईटेड युरोपा लिग फुटबल प्रतियोगिताको क्वाटरफाईनलमा पुगेको छ ।

गएराति भएको प्रि–क्वाटरफाईनल दोस्रो लेगको खेलमा रुसको एफसी रोस्तोभलाई १–० ले हराउँदै म्यानचेस्टर युनाईटेड क्वाटरफाईनलमा पुगेको हो ।
गएरातिको खेलमा म्यानचेस्टर युनाईटेडलाई विजयी गराउन हुँवा माटाले ७० औं मिनेटमा गरेको गोल नै निर्णायक बन्यो । यसअघि रुसमा भएको पहिलो लेगको खेल १–१ गोलको बराबरीमा सकिएको थियो ।
युरोपा लिग अन्तर्गत गएराति भएका अन्य खेलमा विजयी हुँदै नेदरल्याण्ड्सको आयाक्स एम्सटरडम, स्पेनको सेल्टा भिगो, फ्रान्सको लियों, जर्मनीको शाल्का, टर्कीको बेसीक्टास र बेल्जीयमका एन्डरलेच्त र गेन्ट पनि क्वाटरफाईनलमा पुगेका छन् ।
- See more at: http://imagekhabar.com/news/latest/football/17579#sthash.Wc2pE59G.dpuf

चैत ४  । खुकुरी इन्टरटेन्मेन्ट र देबिबास इभेन्ट्सको संयुक्त आयोजनामा राजधानीमा ‘सुपर एट्स’ क्रिकेट प्रतियोगिता आयोजना हुने भएको छ ।


आगामी चैत १५ गतेदेखि १९ गतेसम्म कीर्तिपुरस्थित त्रिभुवन विश्वविद्यालयको क्रिकेट मैदानमा प्रतियोगिता आयोजना हुनेछ ।
करिब २० टोली सहभागी हुने प्रतियोगितामा ७–७ ओभरको खेल हुने आयोजकको भनाइ छ ।
प्रतियोगिताको विजेताले एक लाख तथा उपविजेताले ५० हजार रुपैयाँ पुरस्कार प्राप्त गर्नेछन् ।
त्यस्तै, दोस्रो र तेस्रो हुने टोलीले क्रमशः २० हजार र १० हजार प्राप्त गर्नेछन् ।
पहिलोपटक फरक संरचनामा आयोजना गर्न लागिएको प्रतियोगिताले सफलता पाउने आयोजकको विश्वास छ ।

चैत २ । यही चैत १२ गतेदेखि बंगलादेशमा हुने एसीसी इमर्जिङ नेसन्स कप क्रिकेट प्रतियोगिताका लागि नेपाली राष्ट्रिय क्रिकेट टोलीको घोषणा गरिएको छ ।

         चैत २२ गतेसम्म हुने प्रतियोगिताको लागि ४ वैकल्पिकसहित १९ जना खेलाडी छनोट भएका हुन् ।
अन्तर्राष्ट्रिय क्रिकेट परिषद (आइसीसी)का प्रतिनिधि वंैकटपति राजु, प्रशिक्षक जगत टमाटा, पारस खड्का र कप्तान ज्ञानेन्द्र मल्लको छनोट समितिले बुधबार अन्तिम टोलीको टुंगो लगाएको हो ।
स्वास्थ्यका कारण पारस खड्का नखेल्ने भएपछि यो प्रतियोगितामा पनि नेपाली टोलीको कप्तानी ज्ञानेन्द्र मल्लले समाल्ने भएका छन् ।
टोलीमा शरद भेषावकार, विनोद भण्डारी, सागर पुन, आरिफ शेख, मेहबुब आलम, दीपेन्द्रसिंह ऐरी, सन्दीप लामिछाने, आसिफ शेख, अविनाश कर्ण, सुनील धमला, भुवन कार्की, सुशन भारी, दीपेश श्रेष्ठ र दिलीप नाथ रहेका छन् ।
वैकल्पिक खेलाडीमा कुशन भुर्तेल, जितेन्द्रकुमार मुखिया, राजेश पुलामी र सुशील कँडेल रहेका छन् ।
शक्ति गौचन, सोमपाल कामी र बसन्त रेग्मीलाई आराम दिएर टोलीमा भुवन कार्की, सुशन भारी, दीपेश श्रेष्ठ र आसिफ शेखलाई स्थान दिइएको हो ।
इमर्जिङ कपमा नेपाल, अफगानिस्तान, हङकङ र मलेसियाका राष्ट्रिय टोलिसहित एसियाका टेस्ट मान्यताप्राप्त टोलीहरु भारत, पाकिस्तान, श्रीलंका र बंगलादेशका २३ वर्षमुनिका टोलीले प्रतिस्पर्धा गर्नेछन् ।

चैत २ । इंग्लिश फुटबल क्लव लेष्टर सिटी युरोपियन च्याम्पियन्स लिग फुटबल प्रतियोगिताको क्वाटरफाईनलमा प्रवेश गरेको छ ।

गएराति भएको प्रि–क्वाटरफाईनल दोस्रो लेगको खेलमा लेष्टरले स्पेनिस क्लव सेभियालाई २–० ले हरायो । लेष्टरको जितमा वेस मोर्गान र मार्क अल्ब्राईटनले एक–एक गोल गरे ।
दोस्रो लेगमा हात पारेको २–० को जितपछि लेष्टस सिटी समग्रमा ३–२ ले विजयी हुँदै क्वाटरफाईनलमा पुगेको हो । पहिलो लेगको खेलमा सेभिया २–१ ले विजयी भएको थियो ।
पहिलो पटक च्याम्पियन्स लिग खेलिरहेको लेष्टर सिटी पहिलो सहभगितामै अन्तिम आठमा पुगेको हो ।
च्याम्पियन्स लिगअन्तर्गत गएराति भएको अर्को खेलमा ईटालीको युभेन्टसले पोर्चुगलको एफसी पोर्टोलाई १–० ले हरायो । खेलमा युभेन्टसलाई विजयी गराउन पाउलो डिबालाले निर्णायक गोल गरे ।
पहिलो लेगमा २–० ले विजयी भएको युभेन्टस गएरातिको खेलपछि समग्रमा ३–० को परिणाम निकाल्दै अन्तिम आठमा पुगेको हो ।
च्याम्पियन्स लिग फुटबलमा आज राति दुई खेल हुनेछन् । आज स्पेनको एथ्लेटिको मड्रिड र जर्मनीको बायर लिभरकुजेन भिड्दा फ्रान्सको मोनाकोले इंग्ल्याण्डको म्यान्चेस्टर सिटीसँग खेल्नेछ ।

फागुन २९। विश्व क्रिकेट लिग च्याम्पियनसिपमा नेपाल केन्यासँग  पराजित भएको छ । वर्षाले प्रभावित खेलमा केन्याले डीएल मेथडका आधारमा ९४ रनको लक्ष्य पाएको थियो, जसलाई उसले २४ औं ओभरमा ५ विकेट गुमाएर भेट्टायो ।

वर्षाका कारण ३८ ओभरमा छोट्याइएको खेलमा नेपालले ३६ ओभरमा ८ विकेट गुमाएर ११२ रन बनाउादा पानीले रोकियो ।
डीएल मेथडका आधारमा केन्याले २९ ओभरमा १०४ रनको लक्ष्य पायो ।
वर्षाका कारण ३८ ओभरमा छोट्याइएको खेलमा नेपालले ३६ ओभरमा ८ विकेट गुमाएर ११२ रन बनाउँदा पानीले रोकियो ।
डीएल मेथडका आधारमा केन्याले २९ ओभरमा १०४ रनको लक्ष्य पायो । तर, उसले २१.२ ओभरमा ५ विकेटको क्षतिमा ८० रन बनाउँदा फेरि पानीले खेल रोकियो ।
त्यही अवस्थामा डीएल मेथडका आधारमा केन्या केही रनले जितिसकेको थियो । तर, नेपालले खेल जारी राख्न चाहेपछि केन्याले नयाँ लक्ष्य पायो, २६ ओभरमा ९४ रनको लक्ष्य ।
जसलाई उसले ११ बल बााकी छादा ५ विकेट गुमाएर भेट्टायो । २५ औं ओभरको पहिलो ब लमा कप्तान रकिप पटेलले छक्का हान्दै केन्यालाई जित दिलाए ।

फागुन २८। केन्या लाइ १०४ रन को टार्गेट दिदै नेपाली टोलि बलिङ्ग गर्दै लाइभ हेर्न तल्लो लिंक हेर्नु होला 
शनिबार काठमाडौंको कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा नेपालले टस हारेर पहिले ब्याटिङ गरिरहँदा पानी परेपछि खेल अवरुद्ध भएको हो ।
नेपालले ३६ ओभरमा ८ विकेटको क्षतिमा ११२ रन जोडेको अवस्थामा खेल स्थगित भएको हो । ३८ ओभरमा छोट्याइएको खेलमा अब नेपालले दुई ओभर खेल्न बाँकी छ ।
नेपालका लागि कप्तानको भूमिकामा रहेका ज्ञानेन्द्र मल्लले २७, दीपेन्द्रसिंह ऐरीले १९, सागर पुनले १०, बसन्त रेग्मीले ६, विनोद भण्डारीले ४, शरद भेषावकरले ३ र मेहबुब आलमले २ रन बनाए ।
केन्याका शेम एगोचेले ३ र नेसनल आधिएमबोलेले २ विकेट लिए ।
नियमित कप्तान पारस खड्का बिरामी भएकाले उपकप्तान मल्लले प्रतियोगिताको नेतृत्व गरेका हुन् ।
यो खेलबाट नेपालका दीपेन्द्रसिंह ऐरी र सुनील धमलाले ‘डेब्यु’ गरेका छन् ।
८ राष्ट्र सहभागी विश्व क्रिकेट लिग च्याम्पियनसिपको अंकतालिकामा केन्या पाचौं स्थानमा छ ।
हालसम्म खेलेका ८ खेलमध्ये केन्याले ४ मा जित र ४ मा हार व्यहोरेको छ । समान खेल खेलेको नेपाल अंकतालिकामा ६ अंकसहित छैटांै स्थानमा छ ।
प्रतियोगिताको शीर्ष चार स्थानमा अटाउने टोलीले आगामी एकदिवसीय विश्वकप क्रिकेटको छनोट चरणमा स्थान बनाउनेछन् ।
नेपाल र केन्या दुबै टोलीलाई अंकतालिकाको शीर्ष चार स्थानमा अटाउन यो खेल जित्नैपर्ने दबाब छ ।

फागुन २६ । आइसीसी विश्व क्रिकेट लिग च्याम्पियनसिपअन्तर्गत् नेपालविरुद्ध दुईओटा एकदिवसीय खेल खेल्न केन्याको राष्ट्रिय टोली विहीबार (आज) राति नेपाल आउँदै छ ।

च्यम्पियनसिपअन्तर्गत् आगामी शनिबार र सोमबार नेपालसँग दुईओटा एकदिवसीय खेल खेल्न केन्याको टोली विहीबार राति काठमाडौंस्थित त्रिभुवन अन्तर्राष्ट्रिय विमानस्थल आइपुग्ने कार्यक्रम छ ।
नेपालसँगको खेलका लागि अभ्यासकाक्रममा भारतमा रहेको केन्या त्यहीँबाट काठमाडौं आउन लागेको हो ।
८ राष्ट्र सहभागी प्रतियोगितामा ८ खेल खेल्दै ४ मा जित र ४ मा हार व्यहोरेको केन्या ८ अंकसहित तालिकाको पाँचौ स्थानमा छ । समान खेल खेलेको नेपाल अंकतालिकामा ६ अंकसहित छैटौं स्थानमा छ ।
प्रतियोगिताको शीर्ष चार स्थानमा अटाउने टोलीले आगामी एकदिवसीय विश्वकप क्रिकेटको छनोट चरणमा स्थान बनाउनेछन् ।
नेपाल र केन्या दुबै टोलीलाइ अंकतालिकाको शीर्ष चार स्थानमा अटाउन खेल जित्नैपर्ने दबाब छ ।


फागुन २६ । विश्व फुटबलको वरीयताक्रममा नेपालले तीन स्थान सुधार गरेको छ ।

विश्व फुटबलको सर्वोच्च निकाय फिफाले विहीबार जारी गरेको नयाँ वरीयताक्रममा नेपाल तीन स्थान सुधार गर्दै १७३औं स्थानबाट १७०औं स्थानमा आइपुगेको हो ।
दक्षिण एसियामा शीर्ष स्थानमा रहेको भारत विश्व वरीयतामा १३२औं स्थानमा रहँदा दक्षिण एसियामा माल्दिभ्स (१४०) दोस्रो तथा अफगानिस्तान (१५६) तेस्रो स्थानमा छन् ।
दक्षिण एसियातर्फ वरीयताक्रममा नेपालभन्दा पछाडि भुटान (१७७), बंगलादेश (१९३), श्रीलंका (१९७) र पाकिस्तान (१९८) रहेका छन् ।
विश्व वरीयतामा अर्जेन्टिना पहिलो, ब्राजिल दोस्रो तथा जर्मनी तेस्रो स्थानमा कायमै छन् ।

फागुन २३ । इङ्लिस प्रिमियर लिग फुटबल प्रतियोगिताअन्तर्गत आइतबार राति भएका खेलमा म्यानचेस्टर सिटी र टोटनह्याम हट्सपर विजयी भएका छन् ।

तालिकाको दोस्रो स्थानमा रहेको टोटनह्याह हट्सपरले एभर्टनलाई ३-२ ले हरायो । टोटनह्यामलाई विजयी गराउन ह्यारी केनले दुई तथा डेले अलीले एक गोल गरे ।
एभर्टनका रोमेलु लुकाकु र इनर भ्यालेन्सीयाले एक–एक गोल गरे । प्रिमियर लिगअन्तर्गत राति नै भएको अर्को खेलमा म्यानचेस्टर सिटीले सण्डरल्याण्डलाई २-० ले हरायो ।
म्यान सिटीको जीतमा सर्जीयो अगुएरो र लेरोए सानेले एक–एक गोल गरेका थिए । इङ्लिस प्रिमियर लिग फुटबलमा रातीका खेलपछि दोस्रो स्थानको टोटनह्यामले शीर्ष स्थानमा रहेको चेल्सीसँगको दुरी ७ अंकमा सिमित गरेको छ ।
२७ खेलबाट टोनह्यामको ५६ अंक भएको छ भने एक खेल कम खेलेको चेल्सी ६३ अंकको साथ शीर्ष स्थानमा छ । चेल्सीले सोमबार राती लण्डन प्रतिद्वन्द्वी वेष्ट ह्याम युनाईटेडको सामना गर्नेछ ।

फागुन २३ । पाकिस्तानमा सन २००९ यता पहिलो पटक विदेशी खेलाडीको सहभागितामा क्रिकेट म्याच सम्पन्न भएको छ ।

पूर्वी शहर लाहोरमा आइतबार पाकिस्तान सुपर लिग पिएसएलको फाइनल खेल खेलाइएको हो । गद्दाफी रंगशालामा भएको फाइनलमा क्वेटा ग्ल्याडिएटर्सलाई हराउँदै पेशावर जाल्मीले उपाधि जितेको थियो ।
तर, जित र हारभन्दा पनि यो खेल पाकिस्तानी क्रिकेटका लागि निकै महत्वपूर्ण थियो । सन् २००९ मा सोही गद्दाफी रंगशालामा श्रीलंकाको टोली क्रिकेट खेल्न आउँदा अतिवादीहरुले आक्रमण गरेका थिए ।
श्रीलंकाली टोलीको सुरक्षामा खटिएका ८ पाकिस्तानी सुरक्षाकर्मीको ज्यान गएको उक्त घटनापछि पाकिस्तानमा ठूला अन्तर्राष्ट्रिय क्रिकेट खेल भएको छैन ।
आइतबार पिएसएलको फाइनल खेल्न वेष्ट इन्डिजका ड्यारेन सामी र मार्लन स्यामुएल्स, इङ्ल्यान्डका क्रिस जोर्डनलगायतका खेलाडी लाहोर पुगेका थिए ।
भव्य हवाई सुरक्षासहित भएको फाइनल शान्तिपूर्ण रहेको आयोजकले बताएका छन् । यो खेलपछि पाकिस्तानमा अब अन्य अन्तर्राष्ट्रिय म्याच पनि हुने सम्भावना बढेको बताइन्छ ।
सन् २००९ यता पाकिस्तानले सबै घरेलु श्रृंखला युनाईटेड अरब ईमाईरेट्समा खेल्दै आएको थियो । आईसीसीले सुरक्षाको कारण देखाउँदै पकिस्तानलाई कुनै पनि औपचारिक प्रतियोगिता आयोजना गर्न दिएको छैन ।

फागुन २० । सुनसरीको तरहरामा शुक्रबारदेखि खुला राष्ट्रिय पुरुष भलिबल प्रतियोगिता सुरु भएको छ ।

शुक्रबार भएको पहिलो खेलमा पूर्व क्षेत्रीय प्रहरी कार्यलयलाई हराउँदै सशस्त्र प्रहरी बल पूर्वाञ्चलले विजयी सुरुआत गरेको छ ।
सशस्त्रले जनपथलाई २५–१२, २५–२२ र २५–११ को सोझो सेटमा पराजित गरेको हो ।
शुक्रबारै भएको दोस्रो खेलमा आयोजक इटहरी खेलकुद समाजले सिराहलाई सोझो सेटमै पराजित गरेको छ ।
इटहरीले सिराहालाई २५–१४, २५–१७ र २५–१६ अंकले हराएको हो ।
प्रतियोगितामा नेपाल पुलिस क्लबका २ टिम, सशस्त्र प्रहरी बल, झापा टाइगर, संखुवासभा, मोरङ, सिरहा खेलकुद विकास समिति, डुमराह र आयोजक इटहरी खेलकुद समाज गरी ९ टिमको सहभागिता रहेको छ ।

फागुन २० । प्रधानमन्त्री कप महिला राष्ट्रिय क्रिकेट प्रतियोगिता शुक्रबारदेखि सुनसरीको इटहरीमा सुरु भएको छ ।

इटहरीको डी भि एम क्रिकेट खेल मैदानमा शुक्रबार भएको पहिलो दिनको खेलमा पूर्वाञ्चल र पश्चिमाञ्चलले विजयी सुरुआत गरेका छन् ।

पहिलो खेलमा पूर्वाञ्चलले मध्यमाञ्चललाई ७७ रनले हरायो ।
टस जितेर पहिले ब्याटिङ गरेको पूर्वाञ्चलले निर्धारित् २० ओभरमा ३ विकेट गुमाएर १२४ रन बनायो । जवाफमा मध्यमाञ्चलले ४७ रनमात्र जोड्न सक्यो ।
यस्तै, शुक्रबारै भएको दोस्रो खेलमा पश्चिमाञ्चलले मध्यपश्चिमाञ्चललाई ६ विकेटले पराजित गरेको छ ।
मध्यपश्चिमाञ्चलले १७ ओभरमा सबै विकेट गुमाएर ७३ रन बनाएको थियो । जवाफमा पश्चिमाञ्चलले १७ ओभरमा ६ विकेट गुमाउँदै विजयी लक्ष्य पूरा गर्‍यो ।
राष्ट्रिय खेलकुद परिषद्को आयोजनामा जारी प्रतियोगितामा पाँच विकास क्षेत्र र सशस्त्र प्रहरी गरी ६ टिम सहभागी छन् ।

क्रिस्टियानो रोनाल्डो स्पेनिस ला लिगामा पेनाल्टीमार्फत सर्वाधिक गोल गर्ने खेलाडी बनेका छन् ।
भिल्लेरियालविरुद्धको खेलमा १२ यार्डबाट ५७ औँ पटक गोल गर्दै रियल म्याड्रिडका स्टार रोनाल्डोले उक्त किर्तिमान बनाएका हुन् ।
गत जनवरी १५ मा सेभियाविरुद्ध २–१ को पराजयमा पेनाल्टीमार्फत गोल गर्दै म्याड्रिडका लिजेन्ड ह्युगो सान्चेजको ५६ गोलको किर्तिमानलाई बराबरी गरेका थिए ।

तर, आइतबार भएको खेलमा टोनी क्रुसले प्रहार गरेको बललाई विपक्षी खेलाडीले हातले छोएपछि पाएको पेनाल्टीलाई गोलमा परिणत गर्दै रोनाल्डोले उक्त किर्तिमान आफ्नो नाममा पारेका हुन् ।
उनको पेनाल्टीको मद्दतले रियलले खेल २–२ को स्थितिमा पुर्याएको थियो ।
बार्सिलोनाका सुपरस्टार लियोनेल मेस्सी ४३ गोलसहित पाँचौँ स्थानमा रहेका छन् । उनीअघि लुबोस्लाभ पेनेभ (४४) र रोनाल्ड कोमान (४५) रहेका छन् ।
रोनाल्डोले यस सिजन ला लिगामा १६ गोल गरिसकेका छन् ।

फागुन १८ । इटालीयन कप फुटबल अन्तर्गत सेमिफाइनल पहिलो लेगको खेलमा युभेन्टसले नापोलीलाई हराएको छ ।  

आफ्नै मैदानमा भएको खेलमा युभेन्टसले नापोलीलाई ३-१ ले हराएको हो । खेलमा युभेन्टसलाई विजयी गराउन पाउलो डिबालाले पेनाल्टीमार्फत दुई गोल गर्दा गोन्जालो हिगुवानले एक गोल थपे ।
पराजित टोली नापोलीका लागि होजे कालेयोनले एक गोल फर्काए । जीतसँगै युभेन्टसले ईटालीयन कप फुटबलको फाइनल प्रवेशको संभावना बलियो बनाउँदा नापोलीको यात्रा कठिन बनेको छ ।
इटालियन कप फुटबलको दोस्रो सेमीफाईनल खेलमा लाजियो र रोमा भिड्नेछन् ।

ARENA NEWS

{picture#https://1.bp.blogspot.com/-TSSsOHmNA9g/Xrc8t2Oo7HI/AAAAAAAAChU/cyhWCseUQbI5bY_90tYKATlVBOVhKdofwCK4BGAYYCw/s1600/arena%2BNEWS%2Blogo%2B%25281%2529%2Bcopy.pngL} NEWS AND SPORTS {facebook#https://www.facebook.com/arena.np/} {twitter#https://twitter.com/arenanepal} {google#www.google.com/kpcat} {pinterest#https://www.pinterest.com/} {youtube#https://www.youtube.com/channel/UC_ISHKB5xxLJnGLep4Y3JEw} {instagram#www.instagram.com/}

Contact Form

Name

Email *

Message *

Powered by Blogger.