January 2017

माघ १८ । दृष्टिविहीन विश्वकप क्रिकेटमा आज नेपालले अष्ट्रेलियासँग खेल्दैछ ।

भारतको नयाँ दिल्लीमा जारी प्रतियोगिताको खेल नेपाली समय अनुसार विहान सवा ९ वजे सुरु हुनेछ । दृष्टिविहीन विश्वकप क्रिकेटको यो दोस्रो संस्रकण हो ।
पाँच वर्ष अघि भारतले नैं पहिलो संस्करण आयोजना गरेको थियो । त्यतिवेला पनि नेपाल र अष्ट्रेलिया भिड्दा नेपाल ७ विकेटले पराजित भएको थियो ।
यसपटक सुधारिएको प्रदर्शन गर्ने लक्ष्यसहित भारत पुगेको नेपाललाई उक्त हारको बदला लिने अवसर छ ।

माघ १८ । हिमालयन शेर्पा क्लव झापा गोल्डकप फुटबलको सेमिफाइनलमा प्रवेश गरेको छ ।


झापामा जारी प्रतियोगिताको पहिलो क्वाटरफाइनलमा सोमबार  सशस्त्र प्रहरीमाथि नाटकीय जित हासिल गर्दै हिमालयनले अन्तिम चारमा ठाउँ पक्का गरेको हो ।
८६ मिनेटसम्म २-० ले पछाडि परेको हिमालयनले अन्तिम चार मिनेटमा दुई गोल गरेसंगै खेल निर्धारित ९० मिनेटसम्म बराबरी भयो ।
थपिएको २० मिनेटको खेलमा गोल नभएपछि खेल टाइब्रेकरमा धकेलियो । टाइब्रेकरमा ३-२ ले विजयी हुँदै हिमालयन शेर्पाले सनसनीपूर्ण जित हासिल गरेको हो ।

माघ १६ । झापाको बिर्तामोडमा जारी रमपम झापा गोल्डकप फुटबल प्रतियोगिताको दोसो खेलमा न्यूरोड टिम (एनआरटी) विजयी भएको छ ।

आइतबार झापाको डोमलाल राजवंशी रंगशालामा भएको खेलमा एनआरटीले विभागीय टोली नेपाल पुलिस क्लबलाई २–१ ले हराएको हो ।
एनआरटीको जितमा अशोक थापा र राज पौडेलल १–१ गोल गरे ।
पुलिसका विक्रम धिमालले एक गोल फर्काए ।


माघ १६ । अस्ट्रेलियन ओपन टेनिसको उपाधि स्वीस खेलाडी रोजर फेडेररले जितेका छन् ।


आइतबार भएको फाइनलमा स्पेनिस खेलाडी रफाइल नदाललाई पराजित गर्दै फेडेररले उपाधि जितेका हुन् ।
पूर्वविश्व नम्बर एकहरुको भिडन्तमा फेडेरर ६–४, ३–६, ६–१, ३–६ र ६–३ ले विजयी भए ।
योसँगै सर्वाधिक ग्रान्डस्लाम जितको कीर्तिमानलाई अझ थप्नेक्रममा फेडेररले ग्रान्डस्लाम संख्यालाई १८ पुर्‍याएका छन् ।
१४ पटकका ग्रान्डस्लाम विजेता नदाललाई हराएसँगै फेडेररले अस्ट्रेलियन ओपन उपाधिको संख्या पनि पाँच पुर्‍याएका छन् ।
अष्ट्रेलियन ओपन पाँचपटक जितेसँगै फेडेररले तीनओटा छुट्टाछुट्टै ग्रान्डस्लाममा पाँच वा सोभन्दा बढी उपाधि जित्ने कीर्तिमान पनि रचेका छन् ।
फेडेररले अष्ट्रेलियन र युएस ओपन पाँच/पाँचपटक जितेका छन् भने विम्बल्डन टेनिस सातपटक जितेका छन् । फ्रेन्च ओपन भने फेडेररले एकपटक जितेका छन् ।
३५ वर्षीय फेडेररले सन् २०१२ को विम्बल्डन टेनिसपछि पहिलोपटक ग्रान्डस्लाम जितेका हुन् ।

माघ १६ । अस्ट्रेलियन ओपन टेनिसको पुरुष एकल तर्फको उपाधिका लागि आज रोजर फेडेरर र राफेल नाडालबीच प्रतिस्पर्धा हुँदैछ ।


१७ औं बरियताका स्वीस खेलाडी फेडेरर र नवौं बरियताका स्पेनी खेलाडी नाडालबीच प्रतिस्पर्धा हुन लागेको हो ।
सेमिफाइनलमा फेडेररले स्टानिसलास वावरिन्कालाई हराएर तथा नाडालले ग्रिगोर दिमित्रोवलाई हराएर फाइनल खेल्न लागेका हुन् । खेल नेपाली सयम अनुसार दिउँसो सवा दुई बजेपछि सुरु हुनेछ ।
फेडेरर र नाडालबिच यसअघि ८ पटकग्राण्ड स्लामको फाइनलमा भेट भएको छ । नाडालले अहिलेसम्म एक पटक तथा फेडेररले चार पटक अस्ट्रेलियन ओपनको उपाधि जितेका छन् ।
अस्ट्रेलियन ओपनमा पछिल्लो पटक सन् २००९ मा फेडेररलाई हराएर नाडालले उपाधि जितेका थिए ।

माघ १६  । पोखरामा सम्पन्न १५औं आहा–रारा गोल्डकप फुटबल प्रतियोगिताको उपाधि फेरि पनि मनाङ–मर्स्याङ्दी क्लबले नै जितेको छ ।


साविक विजेतासमेत रहेको मनाङले लगातार दोस्रोपटक उपाधि जित्नेक्रममा शनिबार भएको फाइनलमा आयोजक सहारा क्लबलाई १–० ले पराजित गर्‍यो ।
खेलको ७०औं मिनेटमा कमल श्रेष्ठले गरेको एकमात्र गोल नै मनाङलाई जिताउन पर्याप्त भयो ।
योसँगै मनाङले १२औं संस्करणमा फाइनलमा सहारासँग भोगेको १–० को हारकोसमेत बदला लिएको छ ।
मनाङले आहा–रारा गोल्डकपको उपाधि जितेको यो पाँचौंपटक हो ।
सेमिफाइनलमा आर्मीलाई हराउँदै सहारा तथा संकटालाई हराउँदै मनाङ फाइनलमा पुगेका थिए ।
जितसँगै मनाङले ५ लाख १ हजार १ र उपविजेता सहाराले २ लाख ५१ हजार १ रुपैयाँ पुरस्कार प्राप्त गरेका छन् ।
प्रतियोगितामा सर्वाेत्कृष्ट खेलाडी बनेका सहाराका गोलकिपर सुुजित गुरुङले स्कुटर पुरस्कार प्राप्त गरे भने प्रतियोगितामा सर्वाधिक ३ गोल गरेका झापा–११ का कर्ण लिम्बूले २५ हजार रुपैयाँ पुरस्कार प्रप्त गरे ।
यस्तै, मनाङका कमल श्रेष्ठ उत्कृष्ट डिफेन्डर, मनाङकै सुजल श्रेष्ठ उत्कृष्ट मिडफिल्डर, सहाराका शिव सुवेदी उत्कृष्ट स्टाइकर र सहाराका किरण श्रेष्ठ उत्कृष्ट प्रशिक्षक घोषित भए । उनीहरुले जनही १५ हजार रुपैयाँ पुरस्कार प्राप्त गरे ।
प्रतियोगितामा १२ टिमको सहभागिता रहेको थियो ।

माघ १३। जमैकन धावक उसेन बोल्टले आफ्नो एक ओलम्पिक स्वर्ण पदक फिर्ता गर्नु पर्ने भएको छ ।

जमैकन टिममेट निस्का कार्टर डोपिङ टेष्ट पोजेटिभ भेटिएपछि बोल्टको स्वर्ण खोसिएको हो । अन्तराष्ट्रिय ओलम्पिक कमिटीले गत वर्ष लिएको ४५४ जनाको स्याम्पलमा कार्टरको पनि थिए । र, प्रतिवन्धित पदार्थ भेटिएको छ ।
बेइजिङ ओलम्पिक २००८ मा जमैकाले ४ गुणा १०० मिटरमा स्वर्ण जित्दा कार्टर पनि टिममा थिए ।
३० वषर्ीय बोल्टले रियो ओलम्पिकमा टि्रपल टि्रपल पुरा गरेका थिए । उनले २००८ र ०१२ का साथै रियो ओलम्पिक २०१६ मा पनि १०० मिटर, २ सय मिटर र ४ गुणा १०० मिटर रिलेमा स्वर्ण जितेका थिए ।

माघ १३ । स्पेनिस फुटबल क्लव रियल मड्रिड किङ्स कप फुटबलबाट बाहिरिएको छ ।


लगातार ४० खेलमा अपराजित रहँदै कीर्तिमान बनाएपछि खराब लयमा झरेको रियाल मड्रिडलाई सेल्टा भिगोले किङ्स कपबाट बाहिर पठाएको हो । यो महिना खेलिएको ५ खेलमध्ये रियल मड्रिड एकमा मात्रै विजयी भएको छ ।
किङ्स कपअन्तर्गत गएराति भएको क्वाटरफाइनल दोस्रो लेगको खेलमा सेल्टा भिगोले रियाल मड्रिडलाई २÷२ गोलको बराबरीमा रोक्यो ।
खेलमा रियलका लागि क्रिस्टियानो रोनाल्डो र लुकास भाज्क्वेजले एक–एक गोल गरे । सेल्टा भिगोका ड्यानिएल वासले एक गोल गर्दा रियल मड्रिडका ड्यानिलोले एक आत्माघाती गोल गरेका थिए ।
दोस्रो लेगको खेल २-२ गोलको बराबरीमा सकिएपछि पहिलो लेगमा हात पारेको २-१ को जितको मद्दतमा सेल्टा भिगो सेमिफाइनलमा पुगेको हो । दुई लेगको समाप्तिपछि सेल्टा भिगो समग्र स्कोरमा ४-३ ले विजयी भएको हो ।
किङ्स कप अन्तर्गत गएराति भएको अर्को खेलमा एथ्लेटिको मड्रिड र आईबारले २-२ गोलको बराबरी खेलेका छन् । पहिलो लेगमा हात पारेको ३-० को जितको मद्दतले यो खेल एथ्लेटिकोेले समग्रमा ५-२ ले जितेको छ ।

माघ १३  । पूर्वविश्व नम्बर एक स्पेनिस खेलाडी रफाइल नदाल र बुल्गेरियन खेलाडी ग्रेगर दिमित्रोभ अष्ट्रेलियन ओपन टेनिसको सेमिफाइनलमा प्रवेश गरेका छन् ।


क्यानेडियन खेलाडी मिलोस राओनिकलाई पराजित गर्दै नदालले बुधबार अन्तिम चारमा ठाउँ बनाएका हुन् । नदाल ६–४, ७–६ र ६–४ ले विजयी भए ।
नदालको अबको भिडन्त १५औं वरीयताका दिमित्रोभसँग हुनेछ ।
दिमित्रोभले ११औं वरीयताका बेल्जियन खेलाडी डेभिड गोफिनलाई ६–३, ६–२ र ६–४ को सोझो सेटमा हराउँदै नदाललाई प्रतिद्वन्द्वी पाएका हुन् ।
अर्को सेमिफाइनलमा स्वीस खेलाडीहरु रोजर फेडेरर र जो वेल्फ्रेड सोंगा भिड्नेछन् ।
महिलातर्फ सेरेना र बारोनी सेमिफाइनलमा 
महिलातर्फ विश्व नम्बर दुई अमेरिकन खेलाडी सेरेना विलियम्स र क्रोएसियन खेलाडी मार्जाना लुसिक बारोनी सेमिफाइनलमा पुगेका छन् ।
२२ पटककी ग्रान्डस्लाम विजेता सेरेनाले नवौं वरीयताकी ब्रिटिस खेलाडी जोहान्ना कोन्टालाई ६–२ र ६–३ को सोझो सेटमा हराउँदै अन्तिम चारमा ठाउँ पक्का गरेकी हुन् ।
सेरेनाको अबको भिडन्त बारोनीसँग हुनेछ ।
बिनावरीयताकी बारोनीले पाँचौ वरीयताकी चेक खेलाडी कारोलिना प्लिस्कोभालाई ६–४, ३–६ र ६–४ ले हराउँदै सेरेनालाई प्रतिद्वन्द्वी पाएकी हुन् ।
अर्को सेमिफाइनलमा अमेरिकन खेलाडीहरु भेनस विलियम्स र कोको भान्डेवेगे भिड्नेछन् ।

माघ १३  । आयोजक सहारा क्लब पोखरामा जारी आहा ! रारा गोल्डकप फुटबल प्रतियोगिताको फाइनलमा प्रवेश गरेको छ ।

बुधबार भएको पहिलो सेमिफाइनलमा त्रिभुवन आर्मी क्लबलाई ‘टाइब्रेकर’मा ४–३ ले हराउँदै सहाराले फाइनलमा ठाउँ पक्का गरेको हो ।
निर्धारित् ९० मिनेट र थपिएको ३० मिनेटमा पनि गोल नभएपछि निर्णय टाइब्रेकरबाटै भएको हो ।
थपिएको अन्तिम मिनेटमा भने सहाराका बबीले आर्मीका भरत खवासलाई लडाएपछि रातोकार्ड पाएका थिए ।
टाइब्रेकरमा सहाराका लागि सुशन गुरुङ, शिव सुवेदी, प्रदीप गुरुङ र उत्तम गुरुङले गोल गरे भने लक्ष्मण जिसी असफल रहे ।
त्यस्तै, आर्मीका जितेन्द्र कार्की, सन्तोष तामाङ र दीपकुमार लामाले गोल गर्दा दीपक गुरुङ र गोलकिपर विकेश कुथु असफल भए ।
दोस्रो सेमिफाइनलमा बिहीबार मनाङ–मर्स्याङ्दी र संकटा क्लब भिड्नेछन् ।
क्वार्टरफाइनलमा मनाङले धरान फुटबल क्लबलाई तथा संकटाले बंगलादेशी क्लबलाई हराएका थिए ।

माघ ११। कम्युनिटी क्रिकेट विकासका लागि भन्दै ‘ब्याट एण्ड बल फाउण्डेसन’ स्थापना भएको छ ।

फाउण्डेसनको सोमबार क्रिकेट कोट डेभ हृवाटमोरले उसको उद्घाटन गरे । यो संस्थाको अध्यक्ष पारस शाक्य छन् भने निर्देशकमा भावना घिमिरे छिन् । शाक्य बसन्त चौधरीका ज्वाइँ हुन् भने घिमिरे क्रिकेट संककी पूर्व सीईओ हुन् । क्रिकेट संघ निलम्बनमा परेपछि घिमिरेले नेपालमा आईसीसीको प्रतिनिधिका रुपमा समेत काम गरेकी थिइन् ।
फाउन्डेसनको संरक्षक बसन्त चौधरी छन् भने सल्लाहकार टिममा क्रिस नन, बन्दुला वर्नापुरा लगायत छन् ।
‘भौतिक पूर्वाधार बनाउन सहयोग गर्ने र ग्रासरुटबाट क्रिकेट विकास गर्ने उद्देश्यले खोलिएको गैरनाफामुलक संस्था हो’ निर्देशक घिमिरेले भनिन, ‘मोर्डन क्रिकेट टेक्निक, कोचहरु ल्याउँछौं ।’
ब्याट एण्ड बल फाउण्डेसनको पहलमा विश्व क्रिकेट लिग च्याम्पियनसिप अन्तरगत केन्यासँगको खेलका लागि तयारी गरिरहेको नेपाली टोलीलाई प्रशिक्षक डेभले प्रशिक्षण दिनेछन् । संस्थाकी निर्देशक घिमिरेका अनुसार १५ दिनको हाइ पफर्मेन्स क्याम्प राखिएको छ ।
‘ब्याट एण्ड बल फाउण्डेसन’ मूलत डोनेसनबाट चल्नेछ र फण्ड जुटाउन च्यारिटी कार्यक्रमहरु पनि गर्नेछ ।
डेभको यो प्रशिक्षणका लागि अहिले भने बसन्त चौधरी फाउण्डेसनले सहयोग गरेको छ ।

 माघ ११ । केन्याले विवादास्पद पूर्व कप्तान मौरिस ओडुम्बेलाई ब्याटिङ कोच नियुक्त गरेको छ ।
माघ
आईसीसी विश्व क्रिकेट लिग च्याम्पियनसिप अन्तर्गत नेपालसँगको खेल अघि ओडुम्बे केन्याली टोलीको ब्याटिङ कोचमा नियुक्त भएका हुन् ।

ओडुम्बे सन् १९९६ देखि २००१ सम्म केन्याको कप्तान थिए र, केन्याले तीन पटक विश्वकप खेल्दा उनको मूख्य भूमिका छ । तर, २००४ मा उनी विवादमा परे ।
किताब प्रकाशकबाट रकम लिएको आरोपमा उनीमाथि ५ वर्ष प्रतिवन्ध लाग्यो ।
अब उनी आफ्नो पूर्व टिममेट मुख्य प्रशिक्षक थोमस आडोयो र सहायक प्रशिक्षक लामेक ओनयानगोसँगै राष्ट्रिय टोलीको प्रशिक्षण टोलीमा आवद्ध भएका छन् ।
नेपाल र केन्याको खेल आगामी मार्च दोस्रो साता हुनेछ तर, औपचारिक घोषणा हुन बाँकी छ ।


माघ ११  । नेपाल एएफसी एसियन कप फुटबल छनोटको समूह ‘एफ’मा परेको छ ।

अबुधाबीमा सोमबार भएको ‘ड्र’अनुसार नेपाल यमन, ताजिकिस्तान र फिलिपिन्स रहेको समूह ‘एफ’मा परेको हो ।छनोट चरणका खेलहरु भने चैत १५ गतेदेखि हुनेछन् । पहिलो खेलमा नेपालले फिलिपिन्समा ‘अबे’ खेलकारुपमा उसकै मैदानमा खेल्नेछ ।मलेसियामा भएको सोलिडारिटी कप फुटबलको उपाधि जितेसँगै नेपालले छनोट खेल्ने मौका पाएको हो ।

माघ ११  । सशस्त्र प्रहरी बलले राजधानीमा ब्याडमिन्टन, लनटेनिस तथा महिला भलिबलका राष्ट्रिय प्रतियोगिता आयोजना गर्ने भएको छ ।

सशस्त्र सोमबार राजधानीमा पत्रकार सम्मेलन गर्दै आगामी माघ १६ देखि २० गतेसम्म १३औं राष्ट्रव्यापी कृष्णमोहन स्मृति खुला ब्याडमिन्टन प्रतियोगिता आयोजना गर्ने जानकारी गराएको हो ।
प्रतियोगितामा पुरुष एकल तथा युगल, महिला एकल तथा युगल, मिक्स डबल्स तथा विभिन्न उमेर समूहका गरी कुल १० विधामा प्रतिस्पर्धा हुनेछन् ।
यसैगरी, सहवीर स्मृति खुला लनटेनिस प्रतियोगिताको नवौं संस्करण माघ १३ गतेदेखि १८ गतेसम्म सन्चालन हुने भएको छ ।
प्रतियोगितामा पुरुष एकल तथा युगल, महिला एकल तथा युगललगायत विभिन्न १३ विधामा प्रतिस्पर्धाा हुनेछ ।
सशस्त्रले माघ १६ गतेदेखि २० गतेसम्म चौथो राष्ट्रिय खुला महिला भलिबल प्रतियोगिता पनि आयोजना गर्ने भएको छ ।
प्रतियोगिताका विजेताले २ लाख ५० हजार तथा उपविजेताले १ लाख २५ हजार प्राप्त गर्नेछन् ।
सशस्त्रले आफ्नो आधिकारिक वेबसाइटबाट यी तीनओटै प्रतियोगिताहरुकोबारेमा जानकारी लिन तथा सहभागिताको फारम भर्न सकिने बताएको छ ।

माघ ११ । स्पेनिस खेलाडी रफाईल नदाल अष्ट्रेलियन ओपन टेनिसको क्वाटरफाईनलमा प्रवेश गरेका छन्. ।


चौथो चरणको खेलमा फ्रान्सका गेल मोन्फिल्सलाई ६-३, ६-३, ४-६ र ६-४ ले हराँउदै नदाल क्वाटरफाईनलमा पुगेका हुन् ।
क्वाटरफाईनलमा अब नदालको भिडन्त क्यानाडाका मिलोस राओनिकसँग हुनेछ ।
चौथो चरणको खेलमा स्पेनका रोबर्टो बाउटिस्टालाई ७-६, ३-६, ६-४ र ६-१ ले हराँउदै तेस्रो वरियताका राओनिक अन्तिम आठमा पुगेका हुन् ।
चौथो चरणकै अन्य खेलहरुमा विजयी हुँदै बुल्गेरियाका ग्रिगोर दिमित्रोभ र बेल्जियमका डेभिड गोफिन पनि क्वाटरफाईनलमा पुगेका छन् ।
अष्ट्रेलियन ओपन टेनिसको महिलातर्फ ब्रिटेनकी योहाना कोन्टा, अमेरीकाकी सेरेना विलियम्स, क्रोएशियाकी लुसिच बारोनी र चेक गणतन्त्रकी क्यारोलिना प्लीस्कोभा क्वाटरफाईनलमा पुगेका छन् ।
क्वाटरफाईनलमा कोन्टा र सेरेना तथा प्लीस्कोभा र बारोनी भिड्नेछन् ।

 
माघ ११  । नेपाल ओलम्पिक कमिटीको कार्यालयमा रुक्मशमशेर राणा पक्ष

 प्रवेश गरेको छ ।

सर्वोच्च अदालतले ओलम्पिकको आधिकारिक पक्ष रुक्मशमशेर राणा भएको निर्णय गर्दै तत्काल कार्यान्वयन गर्न आदेश दिएपछि गृह मन्त्रालयले जिल्ला प्रशासन कार्यालय ललितपुरलाई राणा पक्षलाई सातदोबाटोमा भएको ओलम्पिकको कार्यालयमा प्रवेश गराउन निर्देशन दिएको थियो ।
सोमबार अपराह्न कार्यबाहक अध्यक्ष किशोरबहादुर सिंहको नेतृत्वमा सुरक्षाकर्मीसहित टोली ओलम्पिकको कार्यालयमा गएको हो । सिंहको टोलीले मंगलबारदेखि काम–कारबाही थाल्ने जनाएको छ ।
राणा टिमका सदस्य नारायणदेव राणाले सर्वोच्चको सातौं आदेशपछिमात्र बल्ल ओलम्पिकको कार्यालयमा पस्न सफल भएको बताए ।
वि.सं. २०६३ सालदेखि राणा पक्षले आफूहरु ओलम्पिक कमिटीको आधिकारिक पक्ष भएको बताउँदै आएको छ ।
पछिल्लोपटक सर्वोच्चले गत मंसिर २० गते राणा पक्षलाई ओलम्पिकका काम–कारबाही गर्न/गराउन गृह मन्त्रालयलाई आदेश दिएको थियो ।
योसँगै अन्तर्राष्ट्रिय मान्यताप्राप्त ओलम्पिक कमिटीका अध्यक्ष जीवनराम श्रेष्ठसहितको टोली कार्यालयबाट बाहिरिनुपरेको छ ।
यसअघि, कृष्णप्रसाद सिटौला गृहमन्त्री हुँदा पनि रुक्मशमशेर राणा पक्षले ओलम्पिकमा जाने मौका पाएको थियो ।
राणा पक्षले दाबी गरिरहे पनि अहिलेसम्म धु्रवबहादुर प्रधानले यसअघिको दुई कार्यकाल तथा जीवनरामले अहिलेको कार्यकाल ओलम्पिकको अध्यक्षको हैसियतमा काम गरिरहेका छन् ।
सुझबुझपूर्वक यो विषयलाई सुल्झाइएन भने ओलम्पिक कमिटी नै निलम्बनमा पर्नसक्ने ओलम्पिकका पदाधिकारीहरु बताउँछन् ।

माघ ९  । भाटभटेनी खुला फुटसल प्रतियोगिता शनिबारदेखि राजधानीमा सुरु भएको छ ।

आफ्नो पहिलो वार्षिकोत्सवको अवसर पारेर भाटभटेनी फुटसलले प्रतियोगिता आयोजना गरेको हो ।
विभिन्न ४६ फुटसल टोलीले प्रतिस्पर्धा गर्ने प्रतियोगिताको विजेताले १ लाख २५ हजार रुपैयाँ प्राप्त गर्नेछ ।
यस्तै, दोस्रो हुने टोलीले ७५ हजार रुपैयाँ हात पार्दा तेस्रो हुने टोलीले ५० हजार रुपैयाँ प्राप्त गर्ने आयोजकले जनाएको छ ।
प्रतियोगिताका सम्पूर्ण खेल भाटभटेनी फुटसलको मैदान चुच्चेपाटीमा हुनेछन् ।

माघ ९  । बाराको कलैयामा सम्पन्न बीपी स्मृति त्रिकोणीय महिला क्रिकेट प्रतियोगिताको उपाधि बाराले जितेको छ ।

शनिबार भएको फाइनलमा काठमाडौंलाई २८ रनले पराजित गर्दै बाराले उपाधि जितेको हो ।
खेलमा टस जितेर पहिले ब्याटिङ गरेको बाराले १९ ओभर ४ बलमा सबै विकेट गुमाउदै ९४ रन जोड्यो ।
जवाफमा काठमाडौंले १६ ओभर ५ बलमा सबै विकेट गुमाएर ६७ रनमात्र बनाउन सक्यो ।
उपाधिसँगै बाराले २० हजार रुपैयाँ पुरस्कार प्राप्त गरेको छ । उपविजेता काठमाडौंले १० हजारमा चित्त बुझाएको छ ।

माघ ९  । आयोजक सहारा क्लब पोखरामा जारी आहा ! रारा गोल्डकप फुटबल प्रतियोगिताको सेमिफाइनलमा प्रवेश गरेको छ ।

शनिबार भएको क्वार्टरफाइनलमा भारतको सिक्किम युनाइटेड फुटबल क्लबलाई ‘टाइब्रेकर’मा ४–२ ले पराजित गर्दै सहारा अन्तिम चारमा पुगेको हो ।
निर्धारित् ९० मिनेटको खेल र थपिएको ३० मिनेटको अतिरिक्त समयमा पनि गोल नभएपछि खेल टाइब्रेकरमा निर्णायक भएको हो ।
खेलमा सिक्किमका सञ्जय क्षेत्री ‘म्यान अफ द म्याच घोषित’ भए ।
सेमिफाइनलमा सहाराले झापा–११ र त्रिभुवन आर्मी क्लबबीचको विजेतासँग खेल्नेछ ।
प्रतियोगिताअन्तर्गत् आइतबार मनाङ–मर्स्याङ्दी र धरान फुटबल क्लब भिड्नेछन् ।

माघ ८  । पाँचपटकको विजेता नेपाल पुलिस क्लबलाई हराउँदै संकटा क्लबले १५औं आहा ! रारा गोल्डकप फुटबल प्रतियोगितामा क्वार्टरफाइनलको यात्रा तय गरेको छ । पोखरा रंगशालामा शुक्रबार भएको खेलमा विभागीय टिम पुलिसलाई २—१ ले हराउँदै संकटा अन्तिम आठमा प्रवेश गरेको हो ।

खेलको पहिलो हाफमा एक गोलले अग्रता लिएपनि दोस्रो हाफमा सम्हालिन नसक्दा पुलिस प्रतियोगिताबाट बाहिरिन पुग्यो ।
३५औं मिनेटमा रवी पासवानको गोलबाट अग्रता लिएको पुलिसविरुद्ध ६४औं मिनेटमा विश्व अधिकारीले बराबरी गोल फर्काए । ८५औं मिनेटमा अनिल गुरुङले संकटाको लागि दोस्रो गोल गर्दै जितको आधार बलियो बनाएका थिए ।
दोस्रो हाफमा निकै आक्रमक खेल प्रस्तुत् गरेको संकटाले अन्नतः पुलिसविरुद्ध जित निकाल्न सफल भयो ।
खेलमा ‘म्यान अफ द म्याच’ विश्व अधिकारी घोषित भए ।
प्रतियोगिताअन्तर्गत् शनिबार पहिलो क्वार्टरफाइनलमा आयोजक सहारा क्लब पोखरा र युनाइटेड सिक्किम भारत भिड्नेछन् ।

माघ ७  । झापा–११ आहा ! रारा गोल्डकप फुटबल प्रतियोगिताको क्वार्टरफाइनलमा पुगेको छ । पोखरामा जारी प्रतियोगिताअन्तर्गत् विहीबार भएको खेलमा अमेरिकी एएनए युएसए फुटबल टिमलाई ४–१ ले हराउँदै झापा–११ ले अन्तिम आठमा स्थान बनाएको हो ।

झापाको जितमा कर्ण लिम्बूले ह्याट्रिक गरे । उनले खेलको २४औं, ३०औं र ९०औं मिनेटमा गोल गर्दै जारी प्रतियोगिताकै पहिलो ह्याट्रिक पूरा गरेका हुन् ।
झापाको लागि अर्को गोल खेलको ‘म्यान अफ द म्याच’ घोषित कर्ण लिम्बूकै पासमा ७४औं मिनेटमा बुद्ध चेम्जोङले गरे ।
अमेरिकी फुटबल टिम एएनएको तर्फबाट खेलको ८५औं मिनेटमा शिशिर विश्वकर्माले एक सान्त्वना गोल फर्काएका थिए ।
प्रतियोतिगाअन्तर्गत् शुक्रबार संकटा र नेपाल पुलिस क्लबबीच प्रतिस्पर्धा हुने आयोजक सहारा क्लबले जनाएको छ ।

माघ ७ । नेपाली सेनाको आयोजनामा राजधानीमा राष्ट्रिय भलिबल तथा म्याराथन प्रतियोगिता आयोजना हुने भएको छ ।

विहीबार राजधानीमा पत्रकार सम्मेलन गर्दै सेनाले माघ ९ गतेदेखि १४ गतेसम्म दोस्रो प्रधानसेनापति राष्ट्रिय पुरुष भलिबल प्रतियोगिता हुने जानकारी दिएको हो ।
तीन विभागीय टोली र पाँच विकास क्षेत्रका गरी कुल आठ टोलीले प्रतिस्पर्धा गर्ने प्रतियोगितामा विजेता टोलीले ३ लाख रुपैयाँ प्राप्त गर्नेछ ।
यस्तै, दोस्रो हुनेले १ लाख ५० हजार र तेस्रो हुने टोलीले ७५ हजार रुपैयाँ प्राप्त गर्नेछन् ।
प्रतियोगितामा उत्कृष्ट घोषित हुने खेलाडीलाई एकथान मोटरसाइकल प्रदान गरिने छ ।
त्यसैगरी, सेनाले आगामी माघ २९ गते राजधानीमा प्रधानसेनापति खुला म्याराथन प्रतियोगिता पनि आयोजना गर्ने भएको छ ।
प्रतियोगितामा पुरुष म्याराथन, पुरुष तथा महिला हाफ म्याराथनलगायतका बिभिन्न विधामा प्रतिस्पर्धा हुनेछ ।
४२ किलोमिटरको पुरुष म्याराथनका विजेताले १ लाख रुपैयाँ तथा एकथान मोटरसाइकल प्राप्त गर्नेछन् । यो विधामा दोस्रो हुनेले ५० हजार र तेस्रो हुनेले २५ हजार रुपैयाँ हात पार्नेछन् ।
प्रतियोगिताअन्तर्गत् २१ किलोमिटर दुरीमा पुरुष तथा महिला म्याराथनका विजेताले २५ हजार तथा एकथान स्कुटर प्राप्त गर्नेछन् । यो विधामा दोस्रो हुनेले १५ हजार र तेस्रो हुनेले १० हजार रुपैयाँ प्राप्त गर्नेछन् ।

माघ ६। स्पेनिस  रियल मड्रिडले लगातार दोस्रो हार व्यहोरेको छ । कोपा डेल रेको क्वार्टरफाइनलको पहिलो लेगमा सेल्टाभिगाले रियल मड्रिडलाई २-१ गोल अन्तरले पराजित गरेको हो ।
४० खेलमा अपराजित स्पेनिस रेकर्ड बनाएको रियल ला लिगामा सेभिल्लासँग पराजित भएको थियो ।बुधबार राति रियल मड्रिडको घरेलु मैदानमा भएको खेलमा सेल्टाभिगोले ६४ औं मिनेटमा इयागो स्पासको गोलबाट अग्रता लिएको थियो । ६९ औं मिनेटमा मार्सेलोले घरेलु टोलीका लागि बराबरी गोल फर्काए । तर, एक मिनेट लगतै कास्ट्रो ओटोले गोल गर्दै सेल्टाभिगोलाई २-१ को अग्रता दिलाए ।
खेल सकिन ८ मिनेट बाँकी छँदा रियलले बराबरी गोल गर्ने मौका पाएको थियो । तर, उसका स्ट्राइकर करिम बेन्जिमाको प्रहार क्रसबारमा लाग्यो ।

माघ ६ । तेह्रथुममा सरकारी तवरको बहुउदेश्यीय कबर्ड हल निर्माण हुने भएको छ ।

जिल्ला खेलकुद विकास समितिले कबर्ड हल निर्माणका लागि नैनकुमार पयाङ्गोको अध्यक्षतामा ९ सदस्यीय कबर्ड हल निर्माण तथा उपभोक्ता समिति बनाई निर्माणको प्रक्रिया अघि बढाएको हो ।
सदरमुकाम म्याङलुङ्गस्थित जिल्ला खेलकुद विकास समितिको आफ्नै जग्गामा कबर्ड हल बनाउन चालु आर्थिक वर्षमा डिपीआर तयार पार्ने खेलकुद विकास समितिका अध्यक्ष केशवकुमार भट्टराईले बताए ।
गत फागुनमै शिलान्यास गरिएको हल बनाउन बल्ल निर्माण तथा उपभोक्ता समिति बनाइएको सचिव टिकाराम खुलालले जानकारी दिए ।

माघ ६  । धरान फुटबल क्लब पोखरामा जारी आहा ! रारा गोल्डकप फुटबल प्रतियोगिताको क्वार्टरफाइनलमा प्रवेश गरेको छ ।

बुधबार प्रिक्वार्टरफाइनलमा सशस्त्र प्रहरीलाई १–० ले पराजित गर्दै धरानले अन्तिम आठमा ठाउँ पक्का गरेको हो ।
निर्धारित् ९० मिनेटको खेल गोलरहित बराबरीमा सकिएपछि थपिएको २० मिनेटको अतिरिक्त समयमा गोल गर्दै धरानले बाजी मारेको हो ।
खेलको १०५औं मिनेटमा वर्तमान राईको पासमा दीपक राईले गोल गर्दै धरानलाई सफलता दिलाएका हुन् ।

माघ ५ । शीर्ष वरीयताका ब्रिटिस खेलाडी एन्डी मरे, स्वीस खेलाडीहरु रोजर फेडेरर र स्टानिस्लास वावरिंका तथा जापनिज खेलाडी केइ निशिकोरी अष्ट्रेलियन ओपन टेनिसको तेस्रो चरणमा पुगेका छन् ।

विश्व नम्बर एक मरेले बुधबार रसियन खेलाडी एन्ड्रे रुब्लेभलाई ६–३, ६–० र ६–२ को सोझो सेटमा पराजित गर्दै तेस्रो चरणमा ठाउँ बनाएका हुन् । अब मरेको भिडन्त अमेरिकन खेलाडी शाम क्विरीसँग हुनेछ ।
त्यस्तै, चारपटकका च्याम्पियन पूर्वविश्व नम्बर एक फेडेररले अमेरिकन खेलाडी नोव रुबिनलाई ७–५, ६–३ र ७–६ ले हराउँदै तेस्रो चरणमा ठाउँ बनाएका हुन् ।
घुँडामा चोट लागेपछि फेडेरर गत वर्षदेखि नै कोर्टबाहिर रहँदै आएका थिए । १७औं वरीयता पाएका फेडेररले अब दशौं वरीयताका चेक खेलाडी टमस बर्डिजसँग खेल्नेछन् ।
त्यस्तै, चौथो वरीयताका वावरिंकाले अमेरिकन खेलाडी स्टेभ जोन्सनलाई ६–३, ६–४ र ६–४ ले तथा पाँचौं वरीयताका निशिकोरीले फ्रेन्च खेलाडी येरेमी चार्डीलाई ६–३, ६–४ र ६–३ ले पराजित गर्दै तेस्रो चरणमा ठाउँ बनाए ।
महिलातर्फ केर्वर र भेनस पनि तेस्रो चरणमा
महिलातर्फ साविक विजेता एन्जेलिक केर्वर तेस्रो चरणमा पुगेकी छन् ।
शीर्ष वरीयताकी जर्मन खेलाडी केर्वरले आफ्नै देशकी कारिना विथोप्टलाई ६–२, ६–७ र ६–२ ले पराजित गर्दै तेस्रो चरणमा ठाउँ बनाएकी हुन् ।
त्यस्तै, ३६ वर्षकी सबैभन्दा पाकी अमेरिकन खेलाडी भेनस विलियम्स पनि तेस्रो चरणमा पुगेकी छन् ।
१९ वर्षदेखि अष्ट्रेलियन ओपन खेलेपनि भेनसले उपाधि भने जितेकी छैनन् ।

माघ ४ । आयोजक सहारा क्लबले १५औं आहा ! रारा गोल्डकप फुटबल प्रतियोगितामा उत्कृष्ट सुरुआत गरेको छ ।मंगलबार पोखरा रंगशालामा भएको उद्घाटन खेलमा सहाराले सुदूरपश्चिम–११ स्पोर्टिङ क्लबलाई ४–० ले हराउँदै क्वार्टरफाइनलमा ठाउँ बनाएको हो ।

एकतर्फी खेल खेलेको सहाराका लागि मार्टिन्सले २ तथा पिटर र रिचर्ड पुनले एक–एक गोल गरे ।
विजयी सहाराले क्वार्टरफाइनलमा युनाइटेड सिक्किम, भारतसँग खेल्नेछ ।
युनाइटेड सिक्किम, बंगलादेशी क्लब, त्रिभुवन आर्मी र मनाङ–मर्स्याङ्दीले सीधै क्वार्टरफाइनल खेल्ने अवसर पाएका हुन् ।
प्रतियोगिताको दोस्रो खेलमा बुधबार सशस्त्र प्रहरी र धरान फुटबल क्लब खेल्नेछन् ।
१२ टिम सहभागी प्रतियोगिताको विजेताले पाँच लाख एक हजार एक तथा उपविजेताले दुई लाख ५१ हजार एक रुपैयाँ पुरस्कार जित्नेछन् ।

माघ ४ । त्रिभुवन आर्मी क्लबलाई ४ विकेटले पराजित गर्दै नेपाल पुलिस क्लब दोस्रो रुस्लान कप ट्वेन्टी–२० क्रिकेट प्रतियोगिताको च्याम्पियन बनेको छ ।

मंगलबार कीर्तिपुर मैदानमा भएको फाइनलमा टस हारेर पहिले ब्याटिङ गरेको आर्मीले निर्धारित् २० ओभरमा ६ विकेट गुमाउदै १४२ रन बनायो ।
आर्मीका लागि कप्तान विनोद भण्डारीले सर्वाधिक ४० तथा राजेश पुलामीले ३८ रन जोडे ।
यस्तै, नरेश बुढाएरले २८ तथा अनिल मण्डल र सोमपाल कामीले समान १५ रन जोडे । 
पुलिसका ललितसिंह भण्डारी र कुशल भुर्तेलले २–२ विकेट लिए भने मन्जित श्रेष्ठ र ललित राजवंशीले १–१ विकेट झारे ।
जवाफमा पुलिसले १९ ओभरमा ६ विकेट गुमाउँदै विजय हासिल गर्‍यो ।
पुलिसलाई लगातार दोस्रोपटक प्रतियोगिताको च्याम्पियन बनाउन दीपेन्द्रसिंह ऐरीले ४२ तथा कुशल भुर्तेलले ३४ रन जोडे । यस्तै, दिलीप नाथले २४ तथा योगेन्द्रसिंह कार्कीले ११ रनको योगदान गरे ।
आर्मीका जितेन्द्र मुखिया र विक्रम शोबले २–२ विकेट लिए ।
उपाधिसँगै पुलिसले ३ लाख तथा उपविजेता आर्मीले २ लाख रुपैयाँ पुरस्कार जितेका छन् ।

माघ ४ । आठौं मिडिया कप फुटबल प्रतियोगिताको उपाधि कान्तिपुर ग्रुपले जितेको छ ।

मंगलबार दशरथ रंगशालामा भएको फाइनलमा ईमेज च्यानललाई ‘टाइब्रेकर’मा ५–४ ले हराउँदै कान्तिपुरले उपाधि जितेको हो ।
निर्धारित् ६० मिनेटको खेलमा दुबैतर्फ १–१ गोलको बराबरी भयो । खेलको सुरुआतमै सुनील ताम्रकारले एकल प्रयासमा गोल गर्दै ईमेजलाई प्रारम्भिक गोल दिलाए ।
तर, खेलको अन्त्यतिर कान्तिपुरका सन्तकुमार श्रेष्ठले फ्रिकिकमा गोल फर्काएपछि १–१ गोलको बराबरी भयो । त्यसपछि थपिएको १५ मिनेटको खेलमा दुबैतर्फ गोल नभएपछि टाइब्रेकरमा निर्णय भएको हो ।
सेमिफाइनलमा एपी वान टेलिभिजनलाई पराजित गर्दै ईमेज च्यानल र रेडियो नेपाललाई हराउँदै कान्तिपुर फाइनलमा पुगेको थियो ।
मिडिया कपको उपाधिमा ह्याट्रिक गरेको कान्तिपुरले ५० हजार तथा उपविजेता ईमेजले २५ हजार रुपैयाँ जितेको छ ।
ईमेज च्यानल दुईपटकको विजेता हो ।
ईमेज च्यानलका देवेन्द्र महर्जन प्रतियोगिताका उत्कृष्ट खेलाडी बन्न सफल भएका छन् ।
७ टिमले सहभागिता जनाएको प्रतियोगिताको ‘फेयर प्ले’को उपाधि भने रेडियो नेपालले जितेको छ ।

माघ ४ । वर्षको पहिलो ग्रान्ड स्लाम टेनिस प्रतियोगिता अष्ट्रेलियन ओपन सुरु भएको छ ।अष्ट्रेलियाको मेलबर्नमा सुरु भएको प्रतियोगिताको पहिलो चरणमा शीर्ष खेलाडीहरुले सहज जित हात पारेका छन् ।

लामो समयपछि ग्रान्ड स्लाम टेनिसमा फर्किएका स्विस खेलाडी रोजर फेडेररले पहिलो खेलमा अष्ट्रियाका यर्गेन मेल्जरलाई चार सेटमा हराए ।
मेल्जर विरुद्धको खेल ३५ वर्षीय फेडेररले ७-५, ३-६, ६-२ र ६-२ को सेटमा जितेका हुन् ।
चार पटकका विजेता फेडेरर घुँडाको चोटका कारण पछिल्लो ६ महिनदेखि टेनिस कोर्टमा देखिएका थिएनन् ।
अष्ट्रेलियन ओपन पहिलो चरणका अन्य खेलहरुमा विजयी हुँदै स्विट्जरल्याण्डका स्टान वावरिङ्का, जापानका केई निशिकोरी, ब्रिटेनका एण्डी मरे, क्रोएसियाका मारिन सिलिच र फ्रान्सका जो विल्फ्रेड सोङ्गा पनि दोस्रो चरणमा पुगेका छन् ।
उता महिलातर्फ अमेरिकाकी भेनस विलियम्सले युक्रेनकी कोज्लोभालाई ७-६ र ७-५ ले हराउँदा रुसकी स्वेतलाना कुज्नेत्सोभा, स्पेनकी गार्बीने मुगुरुजा र सर्वीयाकी यलिना याङ्कोभिच पनि दोस्रो चरणमा पुगेका छन् ।

माघ ४ । १५ औं आहा रारा गोल्डकप फुटबल आज(मंगलबार)बाट पोखरामा सुरु हुँदैछ । उद्घाटन खेलमा आयोजक सहारा क्लब पोखरा र सुदूरपश्चिम–एघार स्पोर्टिङ क्लब भिड्ने भएका छन् ।


उद्घाटन खेलको विजेताले माघ ८ गते युनाइटेड सिक्किम भारतसँग अन्तिम चारका लागि प्रतिस्पर्धा गर्नुपर्नेछ ।
युनाइटेड सिक्किम, बंगलादेशी क्लब, आर्मी क्लब र मनाङ मस्र्याङदी क्लब बाई पाएर सिधै क्वाटरफाइनल खेल्नेछन् ।
प्रतियोगितामा तीन विभागीय र तीन विदेशी टिमसहित १२ टिम सहभागी हुने छन् । प्रतियोगिताको फाइनल खेल माघ १५ गते हुनेछ ।
प्रतियोगिताको विजेताले पाँच लाख एक हजार एक नगद सहित शिल्ड मेडल र प्रमाणपत्र प्राप्त गर्नेछ ।
उपविजेतालाई दुई लाख ५१ हजार एक रुपैयां नगद पुरस्कार प्रदान गरिने क्लबका महासचिव एबं प्रचार संयोजक केशबराज बरालले जानकारी दिए ।
प्रतियोगिताको सर्वोकृष्ट खेलाडीलाई एक थान हिरो स्कुटर प्रदान गरिने भएको छ । त्यस्तै उत्कृष्ट गोलकिपर, डिफेन्स, मिडफिल्ड, स्ट्राईकर र प्रशिक्षकलाई जनही १५ हजार रुपैयाँ प्रदान गरिने आयोजकले जनाएको छ ।
प्रतियोगिताको सर्वाधिक गोलकर्ताले २५ हजार रुपैयाँ प्राप्त गर्नेछ ।

माघ ३ । इङ्लिस प्रिमियर लिग फुटबलअन्तर्गत गएराति भएको खेलमा म्यानचेस्टर युनाईटेड र लिभरपुलले बराबरी खेलेका छन् ।म्यानचेस्टर युनाईटेडको मैदान ओल्ड ट्राफोर्डमा भएको खेल १–१ गोलको बराबरीमा सकिएको हो । खेलको २७ औं मिनेटमा जेम्स मिल्नरले पेनाल्टीमार्फत गोल गर्दै लिभरपुललाई अग्रता दिए । तर दोस्रो हाफको ८४ औं मिनेटमा म्यानचेस्टर युनाइटेडका ज्लाटन ईब्राहिमोभिचले एक गोल फर्काउँदै खेल बराबरी गरेका हुन् ।

गएराति भएको अर्को खेलमा एभर्टनले म्यानचेस्टर सिटीलाई ४–० ले हराएको छ । खेलमा एभर्टनलाई विजयी गराउन रोमेलु लुकाकु, केभिन मिरालास, टम डेभिज र लुकम्यानले एक–एक गोल गरे ।
एकतर्फी खेलमा म्यानचेस्टर सिटीले बनाएका केही अवसर खेर फालेको थियो ।
गएरातिका खेलपछि प्रिमियर लिगको अंक तालिकामा २१ खेलबाट ५२ अंक जोडेको चेल्सी शीर्ष स्थानमा छ । ४५/४५ अंक जोडेका टोटनह्याम हट्सपर र लिरभपुल क्रमशः दोस्रो तथा तेस्रो स्थानमा छन् । चौथो स्थानको आर्सनलको ४४ अंक छ भने ४२ अंकको साथ म्यानचेस्टर सिटी पाँचौ स्थानमा छ ।

माघ ३ । स्पेनिस फुटबलमा रियल मड्रिडको ४० खेल लामो अपराजित यात्रामा पुर्णविराम लागेको छ । लिग अन्तर्गत गएराति भएको खेलमा सेभियासँग २–१ ले पराजित भएपछि रियाल मड्रिडको कीर्तिमानी यात्रा तोडिएको हो । गएरातिको खेलमा रियलका क्रिस्टियानो रोनाल्डोले पेनाल्टीमार्फत पहिलो गोल गरेका थिए । तर ८४ औं मिनेटमा सर्जियो रामोसले आत्माघाती गोल गरेपछि खेल बराबरीमा पुग्यो । यसपछि ईन्जुरी समयमा सेभियाका जोभेटिचले एक गोल थप्दै टोलीलाई विजयी गराए ।

यो हारपछि जिनेदिन जिदानको प्रशिक्षणमा रहेको रियल मड्रिडले दोस्रो स्थानको सेभिया र तेस्रो स्थानको बार्सिलोनासँग अंक दुरी बढाउने अवसर गुमाएको छ । लिगमा १७ खेलबाट ४० अंक जोडेको रियाल मड्रिड शीर्ष स्थानमा छ । एक खेल बढी खेलेको सेभिया ३९ अंकसहित दोस्रो स्थानमा छ भने तेस्रो स्थानको बार्सिलोनाको ३८ अंक छ ।
यसअघि रियल मड्रिडले लगातार ४० खेलसम्म अपराजित रहँदै स्पेनिस लिग फुटबलमा नयाँ कीर्तिमान राखेको थियो । त्यसअघि लगातार ३९ खेलसम्म अपराजित रहादै बार्सिलोनाले यो कीर्तिमान राखेको थियो ।

माघ ३ । १२ औं ढोरपाटन डबल लिग महिला भलिबल प्रतियोगिताको शीर्ष स्थानमा रिड मोडल कलेज उक्लिएको छ ।

भारतीय राष्ट्रिय खेलाडीको बर्चश्व रहेको स्वयम्भू ठूलो भर्‍याङमा अवस्थित रिड मोडल कलेज आफ्नो अपराजित यात्रा कायम राख्दै शीर्ष स्थानमा उक्लिएको हो ।
बालाजु नयाँ बसपार्कस्थित ढोरपाटन स्पोर्टस् ट्रेनिङ सेन्टरको नवनिर्मित कोटमा आइतबार भएका दुबै खेलमा विजय हासिल गर्न सफल रिड मोडलले पहिलो खेलमा बिजेश्वरी ज्ञान मन्दिर स्कुललाई पराजित गर्‍यो भने दोस्रो खेलमा नेपाल पुलिस क्लवलाई पाखा लगाउन सफल भयो ।
आइतबार भएको पहिलो खेलमा बिजेश्वरी ज्ञान मन्दिरलाई २५–६, २५–४ र २५–६ को सोझो सेटले पराजित गरेको रिड मोडलले दोस्रो खेलमा नेपाल पुलिसलाई २५–७, २५–१२ र २५–२० को सोझो सेटमा पाखा लगाउन सफल भयो ।
लिगमा ७ खेल खेलेको रिड मोडलले अपराजित रहँदै २१ अंक जोडेको छ ।
सशस्त्र प्रहरीको एपीएफ क्लव र न्यु डायमन्ड एकेडेमीको पनि २१ अंक नै भए पनि अपराजितका आधारमा रिड मोडलले शीर्ष स्थानमा रहन सफल भएको हो । रिड मोडलसँग एपीएफ र न्यु डायमन्ड दुवै पराजित भएका थिए ।
सोमबार हुने न्यु डायमन्ड र एपीएफबीचको खेलबाट दोस्रो र तेस्रो स्थानमा रहने टिमको छिनोफानो हुनेछ ।
रिड मोडलले सोमबार पहिलो खेल आयोजक ढोरपाटन स्पोर्टस् क्लवसँग खेल्ने छ भने दोस्रो खेलमा नेपाल आर्मीको सामना गर्नेछ ।
आइतबार नै भएको अर्को खेलमा पुरानो नैकापको न्यु डायमन्ड एकेडेमीले पश्चिमाञ्चल क्षेत्रीय भलिबल संघलाई ३–० को सोझो सेटमा पराजित गरेको छ । प्रतिभा माली हावी भएको खेलमा न्यु डायमन्ड २५–१३, २५–१५ र २५–१९ ले विजयी भयो । आफ्नो सातौं खेलमा विजयी भएको न्यु डायमन्ड एकेडेमीले ८ खेलबाट २१ अंक जोडेको छ ।
आइतबारै दोस्रो खेल खेलेको पश्चिमाञ्चलले न्यु डायमन्ड स्पोर्टस् क्लवलाई ३–० को सेटमा पराजित गर्‍यो । पश्चिमाञ्चल २५–१४, २५–९ र २५–८ को सेटमा विजयी भयो । त्यसैगरी नेपाल आर्मीले आयोजक ढोरपाटन स्पोर्टस् क्लवलाई २५–१४, २५–१६ र २५–२० को सोझो सेटमा पराजित गर्‍यो ।
पश्चिमाञ्चल आफूले खेलेका ९ खेलमध्ये ५ मा जित र ४ मा हार बेहोर्दै १५ अंक जोडेर पाँचौं स्थानमा झरेको छ । नेपाल पुलिस क्लवले ९ खेलबाट १८ अंक जोड्दै लिगको चौथो स्थान कब्जा गरेको छ ।
त्यसैगरी ८ खेल खेलेको नेपाल आर्मीले ४ जितसँगै १२ अंक जोडेको छ भने आयोजक ढोरपाटन स्पोर्टस् क्लवको ८ खेलबाट ८ अंक जोडेको छ । रामेछापको चन्डेश्वरी युवा क्लवले ९ खेलबाट ७ अंक जोडेको छ । न्यु डायमन्ड स्पोर्टस् क्लवको ९ खेलबाट २ अंक छ भने लिगको पुछारमा रहेको बिजेश्वरी ज्ञान मन्दिरले ९ खेलबाट एक अंक जोडेको छ ।
लिग अन्तर्गत सोमबार पहिलो चरणको अन्तिम ३ खेल हुँदैछ ।

माघ २ । इङ्लिस प्रिमियर लिग फुटबल अन्तर्गत शनिबार राती भएका खेलहरुमा चेल्सी, आर्सनल र टोटनह्याम हट्सपर विजयी भएका छन् ।

लण्डन क्लव चेल्सीले लेष्टर सिटीलाई उसैको मैदानमा ३-० ले हरायो । खेलमा चेल्सीलाई विजयी गराउन मार्कस अलन्सोले दुई तथा पेड्रोले एक गोल गरे ।
राती भएको अर्को खेलमा लण्डन क्लव आर्सनलले स्वान्सी सिटीलाई ४-० ले हरायो । वेल्सस्थित स्वान्सी सिटीको मैदानमा भएको खेलमा आर्सनलका लागि ओलिभर जिरु र अलेक्सीस सान्चेजले एक एक गोल गरे ।
स्वान्सी सिटीका ज्याक कर्क र कायल नउटनले दुई आत्माघाती गोल गरेपछि आर्सनल ४-० ले विजयी भएको हो ।
प्रिमियर लिगकै अर्को खेलमा टोटनह्याम हट्सपरले वेष्ट ब्रोमलाई ४-० ले हरायो । टोटनह्यामको जितमा ह्यारी केनले ह्याट्रिक गरेभने वेष्ट ब्रोमका ग्यारेथ म्याक्वेलीले एक आत्माघाती गोल गरे ।
इंग्लीश प्रिमियर लिग फुटबल अन्तर्गतका अन्य खेलहरुमा वेष्ट ह्याम युनाईटेडले क्रिष्टल प्यालेसलाई ३-० ले, हल सिटीले बर्नमाउथलाई ३-१ ले, स्टोक सिटीले सण्डरल्याण्डलाई ३-१ ले तथा बर्न्लेले साउथह्याम्पटनलाई १-० ले हराएका छन् । वाट्फोर्ड र मिडिल्सब्रोले भने गोलरहित बराबरी खेलेका छन् ।
रातीका खेलहरुपछि २१ खेलबाट ५२ अंक जोडेको चेल्सी शिर्ष स्थानमा यथावत छ । दोस्रो स्थानको टोटनह्यामको ४५ अंक छ भने ४४ अंकको साथ आर्सनल तेस्रो स्थानमा उक्लिएको छ ।
एक खेल कम खेलेको लिभरपुल ४४ अंकको साथ चौथो स्थानमा झरेको छ । प्रिमियर लिग फुटबलमा आज राती दुई खेल हुनेछन् । आज एभर्टन र म्यान्चेस्टर सिटी तथा म्यान्चेस्टर युनाईटेड र लिभरपुल भिड्नेछन् ।

 इंग्लिस क्लब चेल्सीका स्ट्राइकर डिएगो कोस्टालाई लिगअन्तर्गत लिसेस्टर सिटीसँगको खेलको टिमबाट हटाइएको छ ।

फिटनेशका बारेमा प्रशिक्षकसँग विवाद भएपछि कोस्टालाई शनिबार राति हुने लिसेस्टर सिटीसँगको खेलको टिमबाट निकालिएको हो ।
कोस्टाको फिटनेश प्रशिक्षक जालियो टोउससँग विवाद भएको थियो । तीन दिनदेखि प्रशिक्षणमा नरहेका कोस्टालाई चिनियाँ क्लबबाट प्रस्ताव आएको खबर पनि सार्वजनिक भएको छ ।
कोस्टाले यस सिजनको प्रिमियर लिगमा १४ गोल गरिसकेका छन् र पाँच गोलका लागि सहयोग गरेका छन् ।
चेल्सीले लिसेस्टरसँगको खेलका लागि कोस्टा नभएको बारेमा केही बताएको छैन । सन् २०१४ मा चेल्सी आएका कोस्टाको चेल्सीसँगको सम्झौता सन् २०१९ मा सकिनेछ ।

माघ २  । न्यू होराइजन क्रिकेट क्लब राजधानीमा जारी रुस्लान कप ट्वेन्टी–२० क्रिकेट प्रतियोगिताको क्वार्टरफाइनलमा प्रवेश गरेको छ ।


कुलेश्वर क्रिकेट क्लबलाई ११३ रनको फराकिलो अन्तरले पराजित गर्दै न्यू होराइजनले अन्तिम आठमा स्थान सुरक्षित गरेको हो ।
शनिबार कीर्तिपुर मैदानमा भएको समूह चरणको आफ्नो अन्तिम खेलमा न्यू होराइजनले शंकर रानाको शतकको मद्दतले १९९ रन बनायो ।
शंकरले ७१ बलमा १४ चौका र ४ छक्काको मद्दतले अविजित रहँदै ११५ रन बनाए ।
जवाफमा २०० रनको विशाल लक्ष्य पछ्याएको कुलेश्वर क्रिकेट क्लबले निर्धारित् २० ओभरमा ९ विकेट गुमाउँदै मात्र ८६ रन जोड्न सक्यो ।
न्यू होराइजनले क्वार्टरफाइनलमा नेपाली राइनोजको सामना गर्नेछ ।
प्रतियोगिताअन्तर्गत् शनिबारै भएको अर्को खेलमा वीरगन्जको अनुभूति एजुकेसन फाउन्डेसनलाई ५ विकेटले हराउँदै सुदूरपश्चिम एकेडेमी (एसपीए) क्लब क्वार्टरफाइनल प्रवेश गरेको छ ।
खेलमा अनुभूतिले प्रस्तुत् गरेको १०३ रनको विजयी लक्ष्य पछ्याएको एसपीएले १८ दशमलव २ ओभरमा ५ विकेट गुमाउँदै लक्ष्य पूरा गर्‍यो ।
एसपीएलाई विजयी गराउन राजवीर सिंहले अविजित ३३ रनको योगदान गर्दा रोमन बमले २१ रन जोडे ।
एसपीएले क्वार्टरफाइनलमा आइतबार (भोलि) आयोजक रुस्लान केसीटीसीको सामना गर्ने छ ।

त्रिभुवन आर्मी क्लब र नेपाल पुलिसले क्लब भने यसअघि नै प्रतियोगिताको सेमिफाइनलमा स्थान सुरक्षित गरिसकेका छन् ।

ARENA NEWS

{picture#https://1.bp.blogspot.com/-TSSsOHmNA9g/Xrc8t2Oo7HI/AAAAAAAAChU/cyhWCseUQbI5bY_90tYKATlVBOVhKdofwCK4BGAYYCw/s1600/arena%2BNEWS%2Blogo%2B%25281%2529%2Bcopy.pngL} NEWS AND SPORTS {facebook#https://www.facebook.com/arena.np/} {twitter#https://twitter.com/arenanepal} {google#www.google.com/kpcat} {pinterest#https://www.pinterest.com/} {youtube#https://www.youtube.com/channel/UC_ISHKB5xxLJnGLep4Y3JEw} {instagram#www.instagram.com/}

Contact Form

Name

Email *

Message *

Powered by Blogger.